Nodi Khoje Hatimare Mae Jiu 78 - Buka Blahi Ka Cheke Holo

Sam 78 Puhigna God nei puhidi nogna naiknore

Nogna khoje mae Asaf.

¹ Ghotilo nogu naikno iara ra fanomho mei ka nogu farirhiu iara gre. Uve, ghotilo famane fanomho fakeli mei ka unha nate chekedi iara gre.

² Kate cheke ka ghotilo na, iara ginauna toutonu ka cheke naba. Iara na toutonudi unha teke edi teke mei tifa tela theo kaisei ka ghotilo te lasedire.

³ Glepo igre tahati la nomhidihi nei la lasedihi eghu. Glepo igre neke toutonudihi mae kmadara ka tahati.

⁴ Tahati thosei pophoru ka thudare glepo igre, nu tahati toutonu ranghidi thudare nei ranghidi iheire nate karha mei thogheiro. Tahati toutonu ranghidi eigna nogna nolaghi te mala edi koba kofubobhoi nei gloku te biꞌo teure.

⁵ Lord neke tusu laohi nogna vetula nei nogna cheke teure tifa ka vikegna mae ku'eda Jekop. Eghuteuna mana neke chekehi ka mare mala farirhiudi thudire u vetula igre.

⁶ Eghume thudi mare nate karha mei thogheiro re ginauna sikoludi vetula igre, eghuteuna mare ginauna nake toutonu ranghidi la thudire.

⁷ Ka puhi igne mare na jaola fatutuani ni God, nei na ghathodi unha teke edi mana re eghu, nei leghudi koba nogna cheke mana re eghu.

⁸ Ka puhi igne mare ginauna na theome jateula mae kmadi tifara eghu, eigna mare neke huhughuni God, nei tirodini mana neku. Hatimare neke tirodi ghatho tahuni God, nei mare neke jaola neke tirodi fatutuani ni God.

⁹ Hatimare mae soldia ka vikegna mae Efrem, mare neke kulu kaikaliti hi nodi phaloho te mala magra re, nu ka narane te mala magra na, mare neke rikha kolho.

¹⁰ Mare neke theome leghuni kolho u nhaꞌa cheke teke eni God ka mare na, nei mare jaola neke tirodi te leghudi kolho nogna vetula mana re.

¹¹ Mare theome ghatho tahudi unha teke edi mana tifara nei mare theome ghathodi u kofubobhoi teke edi mana ka tathadi mare ra.

¹² God neke eni kaisei kofubobhoi mala filoni mare neku ka sare na jare Soa ka kantri Ijep.

¹³ God neke alha pea thongna na ka phei vido neke fakegra haghe jateula phei gringni thina biꞌo neku, eghuteuna hata fakasadi nogna naiknore ka keha phile na.

¹⁴ Ka narane tuana, mana neke eni kaisei nafnata khoveo mala batudi mare, eghuteuna fei bongiro na, mana neke batudi ka naphaegna kaisei nafnata khaꞌaghi.

¹⁵ Kate au mare ka namono nagou na, God neke piphike thina biꞌore, aonu khoꞌu na neke loloro mei mala koꞌu naiknore.

¹⁶ Mana neke eni khoꞌu te jifla mei ka thinare igne ne soru mei jateula kaisei khoꞌu biꞌo neku.

¹⁷ Neubane eghu ngau, kate au ka namono nagou na, naiknore neke theome gnafa te eni nakhibo ra ranghini God mae ihei te fnakno fara na.

¹⁸ Mare magnahaghei te fariuriuni God mala tusu ranghidi mana u gano te magnahagheni mare na.

¹⁹ Mare ne ke cheke faparini God, ne ke cheke eghu, “God na theome tangomana te tusu mei gano te keli ka tahati ka namono nagou igne.

²⁰ Uve, tutuani fara, God na neke piphike thina re ne loloro mei fabiꞌo khoꞌu na, nu mana theome tangomana te tusu mei gano ka tahati na eghu.”

²¹ Aonu, kate nomhini Lord nodi cheke mare igne, mana ne thono diꞌatagna fara, diꞌatagna mana ka mare na thono biꞌo fara jateula kaisei khaꞌaghi te dudulu fabiꞌora eghu. Uve, diꞌatagna mana na raꞌe ne heta fara.

²² Naugna mare ne theome rouronu ni mana, nei theome fatutuani ni mana eghu nate fakarhidire.

²³ Neubane eghu ngau mare, mana neke eni maloa na neke thora jateula kaisei grengatha neu.

²⁴ Aonu mana ne tofa soru ganogna kligna te kiloni mare, “Manna” igne mala ima mare.

²⁵ Aonu God ne tusu ranghidi naba gano ne imani mare ghedi gano engel na.

²⁶ Ka nogna nolaghi igne mana neke eni nuri na mala gaghafa mei ke maghati, nei jaola gaghafa mei ke mata.

²⁷ Nanghajire neke soru mei pari ne ke thafru glose na jateula nusu ka glilihi na ra neu, aonu naiknore ne au ghedi naba nafnahi te mala ima na.

²⁸ Nanghaji gre ne khoko soru ka vido te gnafa faligohoni suga thapuale te au naiknore.

²⁹ Aonu naiknore ne ima ne glealeꞌa. Uve, God ne tusu ranghidi unha teke magnahagheni fara mare na.

³⁰ Nu kate ima teu mare gano teke magnahagheni fara mare igne na,

³¹ God ne thono diꞌatagna fara ka mare. Aonu mana ne falelehe keha mae majaghani te nheta fara ka mare.

³² Neuba God ne edi kofubobhoi igre ka mare, mare heta ghedi fara ngala ka puhi nakhibo na nei te theome rouronu ka mana na eghu.

³³ Aonu mana ne eꞌei puhi biꞌo ranghidi mare mala ghosei lehe kolho mare.

³⁴ Leuleghu fata kate lehe na kehare neke tughu nagnafa neke pulo ka mana neke pogho ka mana.

³⁵ Gognaro na mare ne ke ghatho fapulo eigna God na thofno fnakno fara, mana ngala teke reireghidi nei fakarhidi teku mare na.

³⁶ Nu mare thono mae chaichaghi fara, nei theome chekeni kaisei glepo te tutuani.

³⁷ Gaoghathodire theome nheta ka God. Naugna igne mare huhughuni nhaꞌa cheke teke eni God ka mare na.

³⁸ Neuba mare ne eghu ngau, God na kokhoni nognadi fara, aonu mana ne hata koko nakhibodire ne theome paradi. Kmana fata mana diꞌatagna ka mare, nu mana loku fapulo diꞌatagna na.

³⁹ Mana laseni te naikno kolho mare na. Mare jateula kaisei nuri te tei nei ke theome pulo mei teu ia eghu kolho.

⁴⁰ Kmana fata kate au mare ke lamna namono nagou na, mare tirodini, nei fadiꞌa nagnafani eghu mana.

⁴¹ Kmana fata mare magnahaghei te fariuriuni noda God tahati naiknoda Israel. Uve, mare tirodini mae ihei te blahi fara na.

⁴² Mare theome ghathoni kolho nogna nolaghi biꞌo God na. Uve, mare theome ghathoni kolho narane teke fakarhidi mana ka hatimare mae naokare.

⁴³ Ka narane tuana God neke edi kofubobhoi ka sare Soan jare Ijep, nu mare neke theome ghathodi kolho neku.

⁴⁴ God neke figri kho'ure neke vuhai dadara, mala theome koꞌu naiknore.

⁴⁵ Mana neke kuru mei sisimi mala kathidi nei paradi eghu mare, mana jaola neke kuru mei groma mala goigoni namonodire.

⁴⁶ Mana neke kuru mei cheche mala ghamu fahui nagare re, nei goigoni fahui gano ka nagare re.

⁴⁷ Mana neke kuru mei aes neke soru mei jateula nakhete neku neke lehe fahui nodi grep nei gaju fig teu re.

⁴⁸ Nodi bulukare neke jaola neke lehe ka aes, nei nodi sipu nei nanigot teure neke lehe ka nakafli.

⁴⁹ Mana neke thono diꞌatagna fara, aonu mana neke eꞌei puhi biꞌo mala thokedi mare. Diꞌatagna mana na jateula bukrei engel neu ne soru mei mala au papara mare.

⁵⁰ God na neke theome loku fapulo diꞌatagna na ka mare, aonu mana ne tirogna fakarhidi ne kuru mei kaisei fogra biꞌo te thono diꞌa fara mala lehe mare.

⁵¹ Mana neke falelehe fahui goro sua nalhaꞌu teke kulu karha mei ka tharakna te gnafa ka namono Ijep.

⁵² Ke leghugna igne, mana neke batu fajifladi nogna naiknore Ijep, nei reireghidi ke lamnagna namono nagou na.

⁵³ Mare ne sa tirodi mhaghu kolho, naugna mana ne batu fakeli ne tei kolho, nu nodi naokare ne knoho kolho ka thongna.

⁵⁴ God neke hata teidi ka nogna glose thegna na. Uve, mana neke hata teidi ka vido thogele teke hata mana ka nogna nolaghi na.

⁵⁵ Aonu kate theome posa nga teu naiknore ka vido tuana, mana neke brue fajifladi naikno bongihehe teke kulu au teku jare re. Aonu mana ne tufa nodi glose naikno bongihehere ka naiknodi Israel, eghuteuna snakredi nogna naikno thegnare mala ke khotodi nodi suga tapuale naiknore.

⁵⁶ Neubane eghu ngau, mare heta ghedi te figri tagruni God mae ihei te thofno fnakno fara na. Uve, mare magnahaghei fara te fariuriuni mana na. Eghuteuna mare jaola theome tajini nogna vetula mana na.

⁵⁷ Mare figri tagruni, nei theome ghatho tahuni eghu kolho mana. Ku'edire neke jaola tifa na, eghume theo kaisei naikno te tangomana te rouronudire.

⁵⁸ Mare fa eꞌei mala diꞌatagna fara God eghu, ka puhi te tarai mare ka keha god delei ka thogele na. Ka puhi te fakegra haghe mare mumuju na igne ngala te thofno diꞌatagna fara God na.

⁵⁹ Kate filodi mana glepo igre, mana ne hongoni fara ka mare ne thono diꞌatagna fara.

⁶⁰ Mana neke tei kokoni nogna suga thapuale na Saelo, jare teke au mana baludi nogna naiknore.

⁶¹ Mana neke snakredi mae naokare neke mei atha Bokis Blahi Nhaꞌa Cheke na. Bokis igne kaisei fagaglana gna nogna nolaghi God na.

⁶² Mana neke diꞌatagna fara ka nogna naiknore, aonu mana snakredi mae naokare mala falehedi nogna naiknore.

⁶³ Hatimare mae nalhaꞌu majaghani ra ne kafe lehe ka magra, aonu goro gaꞌase majaghani ra theo kaisei mae nalhaꞌu te mala tolaghi ka reꞌe na.

⁶⁴ Hatimare mae pris jaola ne lehe ka magra, eghuteuna khetodire ne thono mhaghu nodi fara ne theome tanhi kolho.

⁶⁵ Ke leghu na igne, Lord ne kegra haghe jateula kaisei mae teke dofra nathuru ra neu. Uve, mana jateula kaisei mae nheta te dranga ka waen ra neu ne kaikaliti mala magra.

⁶⁶ Mana neke tapla sorudi nogna naokare kau magra na, neke ngolho fapulodi. Uve, mana neke famamajadi fabrahu, eghuteuna mare theome naba teke magra na.

⁶⁷ Mana neke theome vahini vikegna mae Efrem. Uve, mana thono tirognani fara vike igne.

⁶⁸ Nu mana neke vahini vikegna mae Juda, nei Thogele Saion te thono magnahagheni fara mana na.

⁶⁹ Jare teke hohoro mana nogna Sugablahi na, jateula nogna suga mana te au kligna na eghu. Uve, mana neke hohoro famamhaku fara suga igne, jateula mana teke hohoro famaku fabrahu nauthoglu igne eghu.

^70-71 Mae Devet na mae mala reireghi sipu, nu God neke vahini mana mala kaisei nogna mae gloku. Aonu mana neke atha fajiflani mae Devet ka gloku tuana mala nodi king vikegna Israel. Gognaro na mana mae mala reireghidi nogna naikno mana re.

⁷² Mae Devet neke ghatho tahuni nogna gloku na neke reireghi fakelidi naiknore ka puhi te thofno doglo fara, nei batudi ka thofno puhi te keli.