Nodi Khoje Hatimare Mae Jiu 77 - Buka Blahi Ka Cheke Holo

Sam 77 God na toghoni naikno te au papara na

Nogna khoje mae Asaf malagna mae kwaemasta nanghagna mae Jedutun.

¹ Iara tanhi fabiꞌo ka God. Iara magnahagheni mana te nomhidi nogu tharai re.

² Kate thoke ghau puhi na iara tarai ka noda Lord. Funu grafi posa hamerane, iara ngafa haghe fabrahu khamegure ka tharai. Neuba, gaoghatho gu iara na theome nheta kolho.

³ Kate ghatho laoni iara God na iara ne tanhi, eghuteuna gaoghathogu iara na ne thono glaꞌe fara.

⁴ God theome snakre ghau iara te thuru na funu grafi posa hamerane, naugna igne iara ne nanga nogu fara ne theome tangomana iara te tarai na.

⁵ Iara kela ghatho laodi narane tela salaꞌu ari hira, eigna u nakarhagu iara tifa ka narane tuare neke thofno keli fara.

⁶ Leuleghu bongi na iara gaoghathodi fabrahu eidi narane teke koje iara teke glealeꞌa nagnafagu na, aonu iara ne cheke eghu:

⁷ “Ba? Nomi Lord ghehati gne la tirogna ghami hila ghehati fabrahu signea? Ba? Mana ginauna tirogna phile hila ka ghehati?

⁸ Ba? Nogna namha biꞌo mana ka ghehati ia la theo hila sia? Ba? Nogna nhaꞌa cheke mana ka ghehati ia la theo hila sia?

⁹ Ba? God na theome kokhoni ghami ghehati sia? Ba? Diꞌatagna mana ka ghehati na salaꞌuni puhi te keli ranghi ghami ghehati na sia?”

¹⁰ Aonu iara ne cheke eghu ka gaoghathogu na, “Tore, God mae ihei te fnakno fara igne, tirogna ghauhila iara gognaro na. Glepo igne la thofno fadiꞌani gaoghathogu iara na.”

¹¹ Lord God, iara ginauna ghathodi glepo biꞌo teke edi iagho ra. Uve, iara ginauna ghathodi glepo biꞌo teke edi iagho tifara.

¹² Iara ginauna ghathodi fara glepo te keli te gnafa nei glepo biꞌo te gnafa eghu teke edi iagho ra.

¹³ God, puhimu iagho na thofno blahi fara. Uve, theo kaisei god aheva nga te jateula iagho teuna.

¹⁴ God, kaisei iagho ngala te tangomana te edi kofubobhoire. Uve, tifa na iagho neke fakakhana nou nolaghi na ka keha naiknore.

¹⁵ Ka nou nolaghi, iagho neke fakarhidi nou naiknore. Uve, iagho neke fakarhi ghami ghehati vikegna mae Jekop nei vikegna mae Josep.

¹⁶ God, kate mei iagho na thongna gne ginauna jateula naikno te filo nigho te mhaghura eghu. Uve, nhorora gne na jateula naikno te rhana ra eghu.

¹⁷ Kate mei iagho na khoveo biꞌo na mei balu nakhete biꞌo, eghuteuna fila na poha ka maloa gne, eghuteuna nakafli na fada tafri heva heva jateula khuali eghu.

¹⁸ Iagho neke eni fila gne mala poha fabiꞌo, eghuteuna iagho neke eni nakafli gne mala khafli ka namono te gnafa ka nauthoglu igne, eghuteuna glose gne na nghali jateula kaisei mae te mhaghura eghu.

¹⁹ Iagho neke nonolo ke kligna galo, eghuteuna iagho neke kasa farihotei nhorora, nu theo kolho kaisei naikno teke filo nigho na eghu.

²⁰ Kani teke batudi iagho mae Moses ghe mae Eron ra, iagho jaola neke batudi nei reireghidi eghu naiknore jateula kaisei mae te batudi nei reireghidi teu nogna sipura neku.