Nodi Khoje Hatimare Mae Jiu 73 - Buka Blahi Ka Cheke Holo

Fatilo Buka ( Sam 73–89 ) Sam 73 Puhigna God na thofno doglo fara

Nogna khoje mae Asaf.

¹ Tutuani fara, God na keli fara ka tahati naiknoda Israel, eigna gaoghathoda tahatire thofno gae fara.

^2-3 Nu kate filodi iara nodi glepo te keli naikno te diꞌare, nei fahaehaghedi fara teu mare na, nogu gaoghatho nheta nei fatutuani teu iara re namo ari luvu theo tokadi kolho. Naugna iara goghotu fara kate au nodi glepo te keli naikno te diꞌa puhidi igre.

⁴ Naikno igre theome au papara nei fogradi eghu, eghuteuna thinidire thofno nheta fabrahu ngala.

⁵ Mare theome au papara jateula keha naikno gre eghu, nei mare theome au puhi tadi jateula keha naikno gre eghu kolho.

⁶ Naugna igne, nodi fahaehaghe mare na jateula famane chen te babaꞌo mare ka graradi na are eghu, eghuteuna puhi glalama te au ka mare na jateula pohe te pipichi mare are eghu.

⁷ Leuleghu fata na, glepo te diꞌa na ngala te jifla mei ka gaoghathodire, eghuteuna leuleghu fata na nagnafadire fodu kolho ka majora.

⁸ Mare maꞌedi naikno te doglo puhidire, eghuteuna mare chekedi ngala glepo te diꞌare. Mare thono fahaehaghedi fara, eghuteuna mare loku ka majora na malagna te goigonidi keha naiknore.

⁹ Mare cheke fadiꞌani God mae ihei te au teu kligna na, eghuteuna mare fahaehaghedi fara e cheke eghu, “Ghehati ngala te funei frunidi naikno te au ka nauthoglu igne!”

¹⁰ Aonu nogna naikno God re jaola leghudi mare, eghuteuna mare fatutuanidi glepo te chekedi mare re.

¹¹ Naikno te diꞌare ne cheke eghu, “God na theome tangomana te lasedi glepo te edi ghehati gre. God na au kligna fara, mana theo kaisei nabrou te mala mei te hirodi puhimi ghehatire.”

¹² Tuana puhidi mare na. Mare au nodi kmana glepohi, nu leuleghu fata na mare hata nodi glepo kmana fara ngala.

^13-15 Keha naiknore jame buiburi eghu ka iagho God, “Theo kaisei nafugna kolho iara te mala bara fothini gaoghathogu na te mala gae te mala theome eni iara nakhibo na. Leuleghu hamerane na iagho para ghau iara. Eghuteuna iagho fakokhoana ghau iara fabrahu, funu hamerane ghilei posa fei grafi.” Nu jame te cheke eghu iara na, eghume ghehati na theome leghuni kolho puhidi nou naikno iagho re eghu.

¹⁶ Iara fariuriu gaoghatho tonganadi gaoghatho igre, nu ninhigrana ranghi ghau fara eghu.

¹⁷ Ghilei posa ka narane te tei te ruma iara te mala pogho soru nigho ka sugamu te blahi na. Ka vido tuana ngala ne laseni nga iara unha nate thokedi naikno te diꞌa gre ginauna.

¹⁸ Iagho ginauna lisa laodi mare ka vido te totoglo, eꞌei puhi ranghidi sagho mala uka kokhonidi mare.

¹⁹ Iagho ginauna ghosei goigonidi kolho naikno tuare, eghuteuna glehedire naikno tuare ginauna thono diꞌa fara.

²⁰ Lord, nakarhadire ginauna jateula kaisei mifi te dofra haghe fei hamerane te ghatho ihoni ra eghu kolho. Kate mei iagho te togho ghau iara na, mare ginauna ari ghatho iho nodadi kolho.

²¹ Kate ninhigrana ranghi ghau fei nakarha na, iara thono diꞌatagu fara ka gobigna lepore kolho.

²² Tifa na, iara neke thono fagoigoli fara jateula glepo te tautagu te theome lalasera neku neke theome ghatho nigho.

²³ Neubane eghu ngau, iagho theome tei koko ghau iara, iagho batu ghau iara jateula mae te loku ka khamegna thugna na ia eghu.

²⁴ Iagho farirhiu ghau iara fabrahu mala leghudi iara puhimu iagho re, eghuteuna ke leghu na, iagho ginauna ghatho tahu ghau iara nei hata ghau iara mala au balumu.

²⁵ God iagho te au teu kligna, kaisei iagho ngala te rouronu nigho iara na. Eigna iagho ngala nogu God iara na, iara theome magnahagheni kaisei glepo ka nauthoglu igne.

²⁶ Gaoghathogu nei thinigu teu iara gre tangomana te glaꞌe na, nu iagho God ngala te mala farheta ghau iara na, iagho ngala te au fabrahu ka nakarhagu iara na.

²⁷ Iheire te figri tagru nigho iagho re ginauna lehe dofidi. Eghuteuna iheire teke leghu nigho iagho tifa ra, mare gognaro na kela tei koko nigho iaghohi. Iagho ginauna goigonidi mare.

²⁸ Nu iara thofno keli tagu fara te au namo ka iagho God. Lord God, iagho nogu vido keli mala poru iara, eghume iara magnahagheni fara te toutonudi gobigna lepo teke edi iagho ra.