Nodi Khoje Hatimare Mae Jiu 69 - Buka Blahi Ka Cheke Holo

Sam 69 Mana toreni God mala toghoni

Nogna khoje mae Devet malagna mae kwaemasta.

¹ God, ghose mei togho ghau iara! Iara gne la thoke ghau puhi biꞌo! Jateula khoꞌu te haghe posa ka graragu iara na ia eghu.

² Iara gne knoho ka naoro te fodu ka chopu, eghuteuna theo kaisei vido te khapra te mala tapla iara na. Uve, iara au ke lamna khoꞌu te nabritha biꞌo, iara gne thafru la namo knohohi.

³ God, iara tore nigho koba mala togho ghau iara, la ghilei babaꞌo nogu fara, la ghilei khaprani thotomnogu gne. Iara filo ari ka iagho te mala togho ghau na, la ghilei kabru tathagure.

⁴ Naikno te tirodi ghau iara gre la thono kmana fara, mare kmana fara uludi khakla ka phaꞌugu iara na. Nogu naoka iara gre mare toutonu chaghi eigu iara. Mare thono nheta fara nei magnahaghei falehe ghau iara. Mare huhuru ghau iara mala ke tusu fapulo glepo teke theome blau iara re.

⁵ God, iagho la kulu lase ghauhi iara, iara fagoigoli fara puhigu na. Nakhibogu iara gre theome poru ka tathamu iagho na.

⁶ Lord God, te thofno nolaghi, thosei snakreni kaisei glepo mala thoke ghau iara eigna glepo igne ginauna naikno teke fatutuani nigho iagho nake theome fatutuani nigho iagho. Iagho nomi God ghehati mae Israel. Iara theome magnahaghei te eni kaisei glepo te mala famamajadi naikno te pogho soru nigho re.

⁷ Mare cheke fadiꞌa ghau nei famamaja ghau eghu iara, naugna iara ne pogho soru nigho iagho.

⁸ Gognaro, mae thabusigu iara gre filo mei ka iara jateula te keha vikei eghu kolho. Eghuteuna tharakna gu iara na filo mei ka iara jateula maegu iara ka namono delei eghu.

⁹ God, leuleghu fata na iara thono ghatho tahuni fara nou Sugablahi iagho gne, eghuteuna leuleghu fata na gaoghatho igne loku fabrahu ke lamnagu iara jateula khaꞌaghi eghu. Thua cheke te diꞌa te edi mare ranghi nigho iagho igre, fadiꞌa ghau iara.

¹⁰ Kate tarai iara te funu theome ghamu na, naiknore maꞌe ghau iara.

¹¹ Kate pipichi iara pohe te thonare, fagaglana eigna te diꞌanagnafa iara na, mare maꞌe ghau iara.

¹² Leuleghu fata na mare salo fodu ka namono na mala buiburi ghau iara, eghuteuna mae te koꞌu te dranga re jaola edi keha khoje te diꞌa eigu iara.

¹³ Nu Lord God, iagho nogu God iara, gognaro na iara tore koba ka iagho. Cheke tughu mei ranghi ghau ka vido te vahini iagho na. Leuleghu fata na iagho namha ghau iara fara, eghuteuna iagho tajini nou nhaꞌa cheke te mala fakarhi ghau iara, eghume iagho cheke tughu mei ranghi ghau iara.

¹⁴ Fakarhi ghau iara sagho, na eghu nu knoho iara ka naoro igne eghu. Uve, fakarhi ghau iara sagho, na eghu nu lalama ghau nogu naoka gre eghu.

¹⁵ Thosei snakreni khoꞌu te britha igne mala toku tafru ghau, thosei snakre ghau mala knoho ke lamna nhorora, nei thosei snakre ghau mala giugilui ke lamna beku.

¹⁶ Lord God, eigna iagho namha ghau iara fara, cheke tughu mei ranghi ghau. Iagho kokhoni ni fara naikno na, eghume iagho filo mei ghau iara.

¹⁷ Iara gne nou mae gloku iagho, eghume iagho thosei poru ka iara eghu. Puhi biꞌo fara te thoke ghau iara gognaro gne, ghosei cheke tughu mei ka iara.

¹⁸ Mei fakarhi ghau, nei mei atha fajifla ghau eghu ka khamedi nogu naoka gre.

¹⁹ Iagho lasenihi te cheke fapari ghau iara mae igre. Uve, mare la cheke faparinihi nanghagu iara na, nei mare famamaja ghau iara gognaro na. Iagho lasedihi nogu naoka iara gre.

²⁰ Nodi cheke mare te diꞌa fara igre, thofno goigonini fara gaoghathogu iara na. Eghuteuna gaoghathogu iara na thofno glaꞌe soru gognaro na. Iara ofoni kolho ihei te kokhoni ghau na, nu theo kaisei.

²¹ Kate rofo iara na, mare tusu mei poesen ka iara, eghuteuna kate rogu koꞌu iara na, mare tusu mei waen te raha.

²² Ka vido te gnokro fodu teu nogu naoka iara gre ka gaghamu biꞌo na, mei paradi sagho mala diꞌa theo tokadi mare.

²³ Fadodofu tathadire mala theome fifilo mare. Eghuteuna thinidire mala papara fara ka thua nafnata hoholo.

²⁴ Diꞌatamu sagho nei paradi eghu mare, uve, mala thokedi mare hoholo.

²⁵ Falehedi gnafa sagho mala theo kaisei naikno te karha teu ka nogna suga tapuale na.

²⁶ Eni sagho igne, naugna mare ne fakokhoanadi iheire teke paradihi iagho ra, nei cheke fadiꞌadi iheire teke fagorehodihi iagho ra.

²⁷ Fatedi sagho eidi nakhibo teke edi mare ra. Thosei snakreni kaisei naikno mala karha ka mare.

²⁸ Te keli na iagho ghiha koko nanghadi mae naokare ka buka te au nanghadi naikno te au ka karhare, thosei kaha fodu baludi ka nou naikno iagho re.

²⁹ God, iara gne au kokhoni ghau fara, eghuteuna gaoghathogu na la funu glaꞌe soru. Farhetani gaoghathogu gne nei fakarhi ghau eghu.

³⁰ Iara na cheke fakelini God ka khoje, iara ginau na tegio ka mana nei fafnaknoni nanghagna mana na.

³¹ Gloku te cheke fakelini iara nanghagna mana na igne thofno keli fara ranghini God ke tulao gnai te fafara lao buluka tahati ka mana na.

³² Naikno te theome fahaehaghere ginauna filoni igne na keli tadi fara. God ginauna farerheta gaoghathodi iheire te pogho soruni mana re.

³³ Lord na fanomho ka nodi thore iheire te kuma, eghuteuna mana theome ghatho ihodi iheire te au ka suga sosolo.

³⁴ Gobigna lepo te au ka maloa gne nei gobigna lepo te au ka nauthoglu igne eghu ghotilo cheke fakelini God. Uve, gobigna lepo te au ke lamna nhorora ra, ghotilo jaola cheke fakelini mana.

³⁵ God ginauna fakarhidi naikno te au ka namono Jerusalem, eghuteuna nake babana fapulo namono te au ka nohi Juda. Nogna naikno mana re ginauna au jare, eghuteuna mare ginauna na khotogna glose tuana.

³⁶ Naikno nate karha mei ka nogna naikno mana re ginauna na ke atha kasa glose igne, eghuteuna iheire te namhani God igre mare ginauna nate au ka vido tuana.