Nodi Khoje Hatimare Mae Jiu 59 - Buka Blahi Ka Cheke Holo

Sam 59 Nogna tharai mae ihei te tore ka God mala fakarhini

Nogna khoje mae Devet malagna mae kwaemasta. Mana neke eni koje igne ke leghugna teke kuru teidi mae king Sol nogna mae glokure neke tei ka sugagna mae Devet mala faleheni mana.

¹ Nogu God, togho ghau iara, mala theome mei goigoni ghau iara nogu naoka iara gre. Bara fothi ghau kate mei te magri ghau iara mare na.

² Mae igre mae diꞌa nei mae mala falehe naikno eghu. Hata fajifla ghau ka khamedi mae igre eigna mare magnahaghei te falehe ghau iara.

^3-4 Filo sagho. Mare poru mala falehe ghau iara. Mae te diꞌa igre mare khapru poru au mala magri ghau iara. Lord, iara gne neke theome eni kaisei najafra nei neke theome huhughuni eghu nou vetula iagho na, ba iara neke theome eni kaisei nakhibo. Nu mare ghosei ne tei poru mala magra ka iara.

⁵ Lord God, iagho mae ihei te au nolaghi biꞌo ia faghosei mei mala togho ghau iara. Iagho nodi God mae Israel ra, filodi mae igre. Faghosei mei mala fathasudi mae bongihehe igre, thosei kokhonidi naikno te diꞌa te fakokhoanadi kheragu iara gre.

⁶ Leuleghu bongi na mare ke pulo mei ka iara ke eha faligohoni namono biꞌo na jateula khuma eghu.

⁷ Fanomho sagho nodi chekere thono diꞌa fara pari lahu. Nodi chekere fnonu fara jateula naflahi te ravedi naikno ra eghu. Nu mare ne cheke eghu, “Ihei gne nate nomhi ghami ghehati na?” Theo ihei nga nate nomhidi mare na.

⁸ Nu Lord, iagho maꞌe noudi kolho mae bongihehe tuare.

⁹ God, leuleghu fata na iara rouronu kolho ka nou nolaghi iagho na. Ka iagho kolho te mala ari te poru iara na.

¹⁰ Nogu God, iagho namha ghau iara fara, eghuteuna iagho ginauna na mei mala togho ghau iara. God iagho ginauna snakre ghau iara mala filodi nogu naokare te ari te theo nafudi kolho are.

¹¹ God, tapla sorudi sagho, nu thosei falehedi eghu, na eghunu ghatho ihoni naiknodi Israel gre glepo igre eghu. Mare mala ghatho fakelini u puhi teke paradi iagho nou naokare. Iagho nomi mae funei ghehati ia, bara fothi ghami mala thosei khale ghami puhi biꞌo. Brue teidi sagho mae naokare ka nou nolaghi na mala rikha tei mare.

¹² Nakhibo na au fabrahu ka foflodire eigna nodi chekere thono diꞌa fara. Te keli na nodi puhi fahaehaghe thedi tuare mala ke fakokhoanadi kolho thedi. Eigna mare tibri ghami ghehati na nei chaichaghi koba eghu.

¹³ Eghume te keli na iagho diꞌatamudi nei falehedi eghu. Fahui aridi sagho naikno te diꞌa tuare. Te eghu iagho na, naiknore ginauna laseni te iagho ngala God na, mae ihei te funei fruni ni Israel, nei nou nolaghi iagho na tei posa ka namono te gnafa ka nauthoglu igne.

¹⁴ Leuleghu bongi na mare ke pulo mei ka iara ke eha faligohoni namono biꞌo na jateula khuma eghu.

¹⁵ Mare jateula khuma eghu leuleghu suga tafri hirogna gano na, eghuteuna kate ari te theome naba gano te mala ghamu na mare thono diꞌatadi fara.

¹⁶ Nu iara ginauna na koje mala cheke thakleni nou nolaghi iagho na. Leuleghu hamerane na iara ginauna koje fabiꞌo mala cheke thakleni iagho te namha ghau iara na. Naugna iagho jateula nogu vido te keli eghu mala poru iara ka vido te au ka hoholo na.

¹⁷ God, kaisei iagho ngala nogu nanheta iara na. Eghume iara magnahaghei te koje, mala pala hagheni nanghamu iagho na. God, iagho namha ghau iara, eghuteuna iagho nogu thoa maku iara.