Nodi Khoje Hatimare Mae Jiu 50 - Buka Blahi Ka Cheke Holo

Sam 50 Thofno puhi te mala tufru soruni God

Nogna khoje mae Asaf.

¹ Noda Lord God te thofno nolaghi fara. Mana te kilo meidi naikno te gnafa ka nauthoglu igne funu maghati posa ke mosu.

² God na au Saion, namono keli tutuani, famane namono fara, naphaegna God na au ka namono te keli nei famane namono tutuani fara. Naphaegna God na jifla mei funu Saion ka vido te snagla ne tei heva heva ka nauthoglu igne.

³ Noda God na la meihi, nu mana na theome au kmu. Khaꞌaghi te mala nhako gobigna lepore na mei ke ulugna mana, eghuteuna nuri blahi balu nakhete na au faligohoni mana.

⁴ Mana eha lao ka maloa kligna na nei ka nauthoglu pari igne mala au jare balugna mana mala fatedi mana nogna naiknore.

⁵ Ghopa maloa ghe nauthoglu ra fanomho ka God kate cheke teu mana ka nogna naiknore. Mana na cheke eghu, “Ghotilo nogu naikno iara teke nhaꞌa cheke balugu iara ra, nei fafara mala farerhetagna u nhaꞌa cheke igne teura, ghotilo khapru mei ke ulugu iara.”

⁶ Gobigna lepo ka maloa na are cheke thakleni puhigna God te doglo na, eghuteuna mana ngala te tangomana te fateni naikno na.

⁷ Aonu God ne cheke eghu, “Ghotilo nogu naikno iara Israel ra. Ghotilo fanomho ka iara, iara magnahaghei te facheke ka ghotilo. Iara ginauna fate ghami ghotilo. Eigna iara nomi God ghotilo.

⁸ Iara theome diꞌatagu ka ghotilo eidi fafara teke edi ghotilo ra. Theo. Kate filo ghami iara te gahu koba ghotilo ka khaꞌaghi nomi fafara ra tuare keliu kolho.

⁹ Nu neuba ngau, iara theome magnahaghedi buluka nalha'udi nei nanigot nalha'udi teu ka nomi bara ghotilo are. Theo.

¹⁰ Gobigna lepo te au ka namhata na are nogu iara, buluka te au ka nhebei thogha thogele na are nogu iara.

¹¹ Nanghaji nei gobigna lepo karha teu te au tafri ka namhata na are nogu iara.

¹² Eghuteuna jame te rofo na, iara ginauna na theome tore ka ghotilo, naugna nauthoglu igne baludi gobigna lepo te au ke lamnagna igre nogu iara.

¹³ Ba? Ne ghamu nafnahi buluka nei na koꞌu dadara nanigot eghu iara neu si ghotilo ia? Theo!

¹⁴ “Iara God, ka maloa kligna, eghuteuna te keli na ghotilo cheke fakeli ghau iara fabrahu. Igne thofno nomi fafara ghotilo na. Eghume te keli na ghotilo edi glepo teke nhaꞌa chekedihi ghotilo ka iara ra.

¹⁵ Eghume jame te eha ghotilo ka iara kate au ghotilo ka hoholo na iara na togho ghami ghotilo, eghuteuna ghotilo ginauna na pala hagheni nanghagu iara na.”

¹⁶ Nu God ne cheke eghu ka naikno te diꞌa re, “Mala unha si ghotilo te iju polodi nogu vetula iara grea? Mala unha si ghotilo te toutonudi nogu nhaꞌa cheke iara teke edi iara ka mae kuꞌemi ghotilo tifa ra? Ghotilo mae chaichaghi kolho.

¹⁷ Ghotilo tiromi fara te mala farirhiu ghami iara na, eghuteuna leuleghu fata na ghotilo tiromidi chekegu iara re.

¹⁸ Leuleghu fata na ghotilo fofodu ka mae te khuru blau are, nei au fodu baludi mae iheire te tolaghi pedo are eghu.

¹⁹ Leuleghu fata na ghotilo snakredi foflomi are te mala cheke diꞌa nei cheke chaichaghi teuna.

²⁰ Eghuteuna ghotilo cheke faparidi nei cheke fadiꞌadi eghu ngala nanghadi thabusimi themi are.

²¹ Ghotilo neke edi gobigna lepo igre, eghuteuna iara neke theome cheke ka ghotilo neku. Aonu gaoghathomi ghotilo na iara gne jateula ghotilo eghu kolho. Nu thono theo fara eghu. Iara gognaro na diꞌatagu fara ka ghotilo, eghuteuna iara na falalase ari ke ulumi ghotilo unha teke eni fadi ghotilo na eghu!

²² “Ghotilo naikno te ghatho iho ghau iara ra, ghotilo fanomho fakeli ka gobigna lepo igre. Te theo ghotilo na, iara ginauna na fadidiꞌa ghami ghotilo, eghuteuna ginauna na theo kaisei mae te nabagna te mala fakarhi ghami ghotilo na.

²³ Mae ihei te cheke fakeli ghau iara na, tuana jateula te fafara eghu ka iara, mana pala hagheni nanghagu iara na. Mae ihei te leghuni chekegu iara na, iara ginauna fakarhini mana.”