Nodi Khoje Hatimare Mae Jiu 40 - Buka Blahi Ka Cheke Holo

Sam 40 Khoje mala kilofnaknoni nanghagna God

Nogna khoje mae Devet.

¹ Iara neke ofoni Lord mala mei togho ghau, aonu mana neke kokhoni ghau iara neke nomhidi nogu tharai iara re.

² Iara gne jateula kaisei mae te au teu ke lamna glodu te mamhara nei ka naoro te fodu ka chopu ra eghu. Nu Lord neke korho haghe ghau iara neke fakegra ghau iara ke tagrugna kaisei thina, eghuteuna iara gognaro na kegrau ka vido te keli.

³ Mana neke farirhiu ghau iara kaisei khoje majaghani mala koje kilofnaknoni ngala God. Kate filoni igne ka iara na kmana naikno ginauna pala hagheni nei fatutuani ni eghu nanghagna Lord.

⁴ Ihei te fatutuani ni Lord na, mana keli tagna fara. Nafnata mae igne theome leghuni naikno te ghatho tahuni thegna na, eghuteuna ihei te ghatho ihoni God nei jaola tarai lao ka mumuju.

⁵ Nogu Lord God, iagho neke edi kmana glepo fara malami ghehati neku, jare na theo kaisei God te jateula iagho teuna! Iagho neke edi famane gaoghatho te keli te mala leghudi ghehati teku re. Iara theome tangomana te kahadi unha teke edi iagho mala togho ghami ghehati teku re.

⁶ Iagho theome magnahaghei fafara ba toreni kaisei bosu mala gahu ke kligna olta mala hata koko nakhibo. Nu iagho tusu mei khuli ka iara mala tangomana iara te nomhidi nei leghudi teu nou cheke iagho re. Igne unha te magnahaghei iagho te mala eni iara na.

⁷ Kate cheke iagho na, iara eghu, “God, iara gne la meihila. Nou cheke iagho te mala farirhiu ghau iara na la kulu auhi ka nou buka vetula iagho na.

⁸ Nogu God, iara magnahaghedi fara te edi unha te magnahaghedi iagho re. Leuleghu fata na iara theome ghatho ihodi nou cheke iagho re ka nagnafagu na.”

⁹ God, iara neke toutonuni u nonomho te keli igne kate khapru teu nou naikno iagho re, neke cheke eghu, “Lord, na tangomana te fakarhi ghita tahati na.” Lord, iagho laseni, iara ginauna theome tangomana te gnafa na nafnata cheke igre.

¹⁰ Iagho neke togho ghau nei fakarhi ghau neku iara, eghume iara na theome poruni igne. Iara la chekenihi eigna iagho te leghuni nou nhaꞌa cheke na te fakarhi ghami ghehati na. Iagho namhadi nei tajidi eghu koba nou naiknore, eghume iara na theome poru ni igne ka naikno te khapru mei te mala tarai re.

¹¹ Lord, kokhoni ghau iara koba sagho! Reireghi ghau iara fabrahu! Iara tore nigho iagho te mala eni igne naugna iara lase nigho iagho te namha ghau nei tajini teu fabrahu nou u nhaꞌa cheke na.

¹² Gognaro na kmana puhi biꞌo fara te mei ka iara na. Iara theome tangomana te kahadire. Nakhibo teke edi iara re te bukri soru ghau iara re. Eghume iara gognaro na la theome tangomana te filoni kaisei nabrou aheva nate tei iara na. Nakhibo igre la kmana fara la uludi khakla te au ka phaꞌugu iara gre eghuteuna gaoghathogu iara na la theome au blagna.

¹³ Lord, faghose mei mala togho ghau nei fakarhi ghau eghu iara.

¹⁴ Keha naiknore magnahaghei te falehe ghau iara. Te keli na sagho tapla sorudi mala mamaja nodi kolho mare. Eghuteuna keha naiknore keli tadi fara kate diꞌanagnafa iara na. Te keli na iagho brue fapulodi mala theo nafudi mare.

¹⁵ Iheire te maꞌe ghau iara igre te keli na iagho tapla faparidi kolho ka magra te eni mare igne mala jaglo nodi kolho mare.

¹⁶ Nu iheire te mei ka iagho re mare keli tadi fara te cheke fakeli nigho na naugna iagho neke fakarhadi mare. Eghuteuna mare keli tadi fara ka gloku te eni iagho ka mare na, naugna iagho teke fakarhadi teuna, mare na te cheke eghu na, “Lord na thofno mae keli fara!”

¹⁷ Tore, iara kuma, nei theo nogu nolaghi eghu, nu iagho na theome ghatho iho ghau iara, iagho ghatho ghau iara fabrahu. Nogu God, iagho ngala mae te mala togho ghau iara na. Faghose mei mala fakarha ghau iara.