Nodi Khoje Hatimare Mae Jiu 23 - Buka Blahi Ka Cheke HoloSam 23 God na reireghi fakeli ghita Nogna khoje mae Devet. 1 Lord na reireghi fakeli ghau iara jateula kaisei nogna sipu eghu. Eghume iara theome kmoꞌe kaisei glepo. 2 Mana filoni kaisei vido te au buburu te keli mala tei ghamu nei gnafa fakeli eghu iara. Mana batu tei ghau iara ka vido aheva te muana te au khoꞌu te keli mala koꞌu iara. 3 Mana tusu mei gaoghatho majaghani ka iara. Eghuteuna farirhiu ghau iara mala leghuni iara puhi te doglo na, naugna puhigna thegna Lord na thofno doglo fara. 4 God, neubane tei iara ka vido aheva te romno fara, iara theome mhaghu nogu, naugna iagho au balugu iara. Tutuani fara, iara laseni nou nanala nei khodo teu iagho gre ngala te fameomego ghau iara na. 5 Iagho tarabana kaisei gaghamu biꞌo malagu iara ka tathadi nogu naokare. Iagho taji fakeli ghau iara jateula kaisei mae biꞌo eghu ka suga muna. Eghume nogu glealeꞌa iara na thono biꞌo fara jateula kaisei kapu khoꞌu te fodu te salauꞌi ra eghu. 6 Tutuani fara, kate au teu iara ka nauthoglu gne, iagho ginauna kokhoni ghau iara nei namha ghau iara eghu fabrahu. Eghuteuna iara magnahaghei te au balumu fabrahu tifa tifa. |
© 2022, Wycliffe Bible Translators , Inc. All rights reserved.
Wycliffe Bible Translators, Inc.