Nodi Khoje Hatimare Mae Jiu 18 - Buka Blahi Ka Cheke Holo

Sam 18 God na tangomana te togho ghita ka magra na

Mae Devet neke kojeni khoje igne ka Lord kani teke fakarhini Lord mana ka mae Sol nei ka hatimare nogna mae naoka mana re.

¹ God, iara namha nigho fara. Iagho ngala nogu nolaghi iara na.

² God na jateula nogu bara eghu iara, mala bara fothi ghau fabrahu. Mana tangomana teke hata fapulo ghau iara ka khamedi nogu naokare. Nogu God na jateula kaisei thina biꞌo eghu te mala tei te porudi iara nogu naokare. God na jateula kaisei greoreo eghu te mala tafra iara ka nogu naokare. Mana au nolaghi biꞌo te mala fakarha ghau nei reireghi ghau teu iara fabrahu na.

³ Iara kiloni God, eghuteuna mana togho ghau iara, eghuteuna mae naokare theome tangomana te mei goigoni ghau iara na. Tahati mala pala hagheni nanghagna Lord.

⁴ U glehe na theome tei fakhaba ghau iara. Glehe na jateula dogi te haru famaku ghau iara ia eghu, ba jateula galo te mei toku tafru ghau iara ia eghu.

⁵ U glehe na loku famaku ghau iara jateula phighoro eghu mala hata tei ghau iara kau gluma.

⁶ Kate au diꞌanagnafa na iara eha fabiꞌo ka nogu God mala togho ghau. Mana au neku ka sugagna na neke nomhini naoglagu iara na.

⁷ Gognaro na God ne thono diꞌatagna fara ka nogu naoka iara re. Aonu mana ne fakheuni glose na, eghuteuna thogele te gnafa re ne kafe nghali tongana.

⁸ Gagahu na ne jifla mei ka nehugna mana na. Eghuteuna khaꞌaghi nei thina ngire eghu ne jifla mei ka foflogna mana na ne nhako gobigna lepore.

⁹ Mana tothora maloa na ne soru mei. Eghuteuna kaisei gromno ne au ke paridi phei ghahegnare.

¹⁰ Kaisei engel ne palani mana ne ghosei flalo ne mei ka nuri biꞌo na.

¹¹ Mana ne eni gromno te thuta na mala toku tafruni thegna jateula kaisei pohe neu. Eghuteuna gromno gna nakhete na ne toku tafruni mana.

¹² Nu nakafli na ne mei funugna ka mana, eghuteuna nakhete thina balu khaꞌaghi na ne jifla mei funugna ka gromno te thuta na ne khoko soru pari.

¹³ Lord na au neu kligna ne cheke fabiꞌo jateula fila neu ka maloa na. God au neu kligna ka maloa na ne cheke, eghuteuna khaꞌaghi nei nakhete thina teure ne khoko ne soru pari.

¹⁴ Mana hohoro nakafli ka khoveo ne jateula jata neu ne fadi di nogna naokare, aonu mare ne rikha ne theo tokadi.

¹⁵ Kate diꞌatagna mana te cheke faheta ka nogna naokare, khotogna nhorora na thakle haghe ne kakhana. Eghuteuna famamhakugna nauthoglu na ne jaola ne kakhana kate gae na.

¹⁶ Lord na au neu kligna ne ngafa soru ne hata fapulo ghau iara kau karha. Kate plulu iara ka nhorora na mana ne loku ka phei khamegu iara re ne korho haghe ghau iara.

¹⁷ Nogu naoka iara re thono nheta fara ne theome tangomana iara te tapla sorudi mare na. Nu God ne hata fapulo ghau iara ka khamedi mare re.

¹⁸ Kate khale iara ka puhi na, mae naokare neke magri ghau iara. Nu Lord neke reireghi ghau iara.

¹⁹ Mana neke togho ghau iara neke hata fajifla ghau iara ka u glehe. Naugna mana neke keli tagna ka iara.

²⁰ Iara thofno leghudi puhi te doglo na, naugna igne Lord ne tusu ranghi ghau iara kmana glepo te keli. Kate theome eni iara kaisei najafra na, Lord ne fablahi ghau iara.

²¹ Iara leghu fakelini nogna vetula Lord na. Iara neke theome figri tagruni nogu God na, nei iara neke theome eni kaisei puhi te diꞌa.

²² Iara ghaoghathoni fabrahu nogna vetula mana na. Eghuteuna iara neke theome huhughuni nogna famane cheke mana na.

²³ Mana laseni te theome eni iara kaisei najafra na. Iara fiofilo fakelini nathaplagu na, glahula eni iara kaisei najafra.

²⁴ Lord ne ghathoni puhi te doglo te eni iara na ne taba ghau iara. Naugna iara ne au klino ka tathagna mana na.

²⁵ God, ihei te au balumu fabrahu, iagho na au balugna mana fabrahu. Ihei te eni puhi te doglo na iagho tabani mana ka puhi te doglo.

²⁶ Ihei te leghuni puhi te klino na, iagho falalase ka mana puhi themu te klino na. Nu ihei te leghuni puhi te diꞌa na, iagho parani mana ka puhi te diꞌa.

²⁷ Iagho lisei haghedi iheire te nhaꞌa faparidi thedi. Nu iagho ke nhaꞌa faparidi iheire te nhaꞌa fahaghedi thedi.

²⁸ Nogu Lord, iagho nogu juta iara, iagho hata fadelei gromno te toku tafru ghau iara igne.

²⁹ God, ka nou tothogo iagho, iara ginauna na tangomana te tapla sorudi bukrei naoka igre. Eghuteuna jame te tusu mei iagho nanheta ka iara na, iara nabagu te apla ka nodi bara mare na.

³⁰ Puhigna God na e thofno keli fara nei doglo eghu. Jame te nhaꞌa chekeni mana kaisei glepo na, nogna cheke mana tuana ginauna na tutuani fara. God na jateula kaisei greoreo mala magra eghu, eghuteuna mana reireghi fakelidi iheire te tei poru ka mana.

³¹ God mae ihei te tufru soruni tahati igne, kaisei mana ngala God na. Kaisei mana ngala te jateula kaisei thina teu te mala bara ghita na.

³² Kaisei God igne ngala mae ihei te mala fakegra heta ghau nei mala reireghi fakeli ghau teu kate tei iara na.

³³ Mana fahetadi phei gahegu iara gre mala maku jateula ghahe nanigot eghu. Eghuteuna nogu naoka iara gre na filo ghau iara te theome uka iara kate tei ka phegu te ninhigrana na.

³⁴ Mana farirhiu ghau iara eigna puhi te mala magra na. Mana fahetadi phei khamegu iara gre mala tangomana iara te gaoni phaloho te maku na.

³⁵ God, iagho fakarhi ghau iara ka khamedi naoka gre. Iagho pophoru ghau iara ka nou greoreo iagho ana. Iagho loku haghedi khamegu gre mala kegra heta iara. Kate cheke tughuni iagho nogu thore iara na, iara na fnakno ka tathadi naikno gre.

³⁶ Iagho neke reireghi fakeli ghau iara mala theome mei hati ghau nogu naokare. Eghume mare theome tangomana te tapla soru ghau iara na.

³⁷ Iara theome gnafa te ngolhidi fabrahu mare na. Iara magnahaghei te ngolhidi mare ghilei tei thokedi nei goigonidi eghu mare.

³⁸ Kate fadi sorudi iara te thuru lehe teu mare pari ke uludi phei gahegu gre, mare na theome tangomana teke kegra haghe na.

³⁹ Eigna iagho neke tusu mei nolaghi ka iara te mala magra na te mala tangomana iara te tapla sorudi mare pari na.

⁴⁰ Iagho neke famamhagudi nogu naoka iara re neke figri neke rikha. Iara falehedi mae iheire teke tirodi ghau iara re.

⁴¹ Mare neke eha naikno mala mei toghodi neku, nu theo kaisei naikno te mei fakarhidire. Mare neke tanhi ka God, nu God neke tirogna nomhidi mare.

⁴² Iara neke puri ngujadi neke jateula gaughavu glose te flalo tafri ka nuri ra neku kolho mare. Iara neke tapla ghiaghihadi neke jateula gnagnapa ka nabrou ra neku kolho mare.

⁴³ Kate naoka ghau iara naiknore, iagho neke mei togho ghau iara te mala tapla sorudi iara mare. Eghuteuna iagho neke snakre ghau iara mala funei frunidi keha naikno teke theome lasedi iara tifa re.

⁴⁴ Kate nomhi ghau iara na, naiknodi keha kantri re ne ghosei ne mei pogho soru ke ulugu iara nei leghudi nogu cheke iara re.

⁴⁵ Kate laseni tela ari tela theo nafudi hila nodi gaoghathore, mare ne jifla kokodi nodi vido mala poru re ne mei balu fififri ke ulugu iara.

⁴⁶ God, iara lase nigho iagho karha te tifa! Iara te cheke fakeli nigho eigna iagho ne reireghi fakeli ghau iara. Iara pala hagheni nanghamu na eigna iagho ne fakarhi ghau iara.

⁴⁷ Iagho neke foli fapulodihi puhi te diꞌa teke edi ranghi ghau iara nogu naokara. Eghuteuna lilisei soru kmana naikno ke parigu iara.

⁴⁸ Iagho neke hata fapulo ghau iara ka khamedi nogu naokare. Tutuani fara, God, iagho neke fafnakno ghau iara ka tathadi nogu naokare. Iagho neke togho ghau iara neke theome tangomana naiknore te magra falehe ghau iara na.

⁴⁹ Eghume iara ginauna na pala hagheni nanghamu iagho na ke uludi iheire te theome lase nigho. Eghuteuna iara ginauna na koje fafnakno nigho eigna nanghamu iagho na.

⁵⁰ God, iagho neke vahi ghau iara mala king neku. Eghuteuna iagho neke togho ghau iara mala tapla sorudi nogu naokare. Iara thofno laseni te thofno namha ghau iara iagho na. Eghuteuna iagho ginauna na jaola namhadi fara mae king Devet nei vikegna mana nate karha mei thogheiro re.