Nodi Khoje Hatimare Mae Jiu 149 - Buka Blahi Ka Cheke Holo

Sam 149 Khoje mala kilo fnaknoniLord

¹ Tahati kilo fnaknoni Lord! Tahati kojeni kaisei khoje majaghani ranghini Lord. Uve, tahati kilo fnaknoni mana ke uludi iheire te kafe mei te pogho soruni ka nogna Sugablahi na.

² Tahati vikegna mae Jekop, ba mae Israel ra, tahati glealeꞌa naugna Lord neke vuavuha ghita. Uve, tahati nogna naikno mana te au Saion ra, tahati glealeꞌa naugna mana ngala noda mae King tahati na.

³ Tahati ragi balu kilo fnaknoni nanghagna mana na, tahati belo balu gita mala kilo fnaknoni mana.

⁴ Lord na keli tagna fara ka tahati, naugna igne mana ghatho tahu ghita tahati nogna naiknore mala uluni tahati u magra na.

⁵ Tahati nogna naikno mana tekura, tahati glealeꞌa naugna tahati la uluni hila u magra na. Uve, tahati glealeꞌa mei koje eghu ghilei rane.

⁶ Tahati atha naflahi fnonu balu koje mala kilo fnaknoni mana.

⁷ Tahati eni igne mala goigonidi keha kantri are, nei mala paradi mare eghu.

⁸ Eghuteuna tahati ginauna mala haru ka chen nodi king nei nodi mae lida teu mare re.

⁹ Uve, tahati ginauna na jateula te chekeni God ia eghu mala paradi kantri tuare. Nogna naikno God re tangomana te ulu ka magra jateula tuana teuna. Tahati kilo fnaknoni Lord!