Nodi Khoje Hatimare Mae Jiu 148 - Buka Blahi Ka Cheke Holo

Sam 148 Nauthoglu fateo gne mala kilo fnaknoniLord

¹ Tahati kilo fnaknoni Lord! Uve, ghotilo naikno te hui te au klignara, ghotilo mala kilo fnaknoni Lord.

² Ghotilo nogna engel mana ra, ghotilo mala kilo fnaknoni Lord.

³ Ghopa naprai ghe glabara, ghopa mala kilo fnaknoni mana. Uve, ghotilo nathunura, ghotilo jaola kilo fnaknoni mana.

⁴ Maloa, iagho kilo fnaknoni mana, nei khoꞌu te au ka maloa klignara, ghotilo kilo fnaknoni mana.

⁵ Uve, glepo te gnafa igre te keli na mala kafe kilo fnaknoni nanghagna Lord na, naugna kate cheke kolho mana na, gobigna lepo igre neke thakle mei.

⁶ Mana neke lisei sorudi ka vido te mala audi te tifa te tifa na. Nei mala thosei ke tughu vido.

⁷ Ghotilo gobigna lepo fateote'o ka nauthoglu ra, ghotilo kilo fnaknoni Lord. Uve, ghotilo sasa biꞌo nei glepo fateo te au ka khotogna nhorora ra, ghotilo kilo fnaknoni mana.

⁸ Ghotilo nakhafli, nakhete, khoveo nei nuri blahi teu te leghudi nogna cheke Lord ra, ghotilo kilo fnaknoni mana.

⁹ Ghotilo thogele te gnafa, gukhu te gnafa, gaju te ure nei gaju nathuꞌa teura, ghotilo kafe kilo fnaknoni Lord.

¹⁰ Ghotilo glepo te oho te namha ka namono, ba glepo te mhaumhaghu ka namhata, ba mogo nei nanghaji teura kilo fnaknoni mana.

¹¹ Ghotilo mae king nei naikno teu te au ka namonora, ghotilo mae biꞌo nei mae lida teura, ghotilo kilo fnaknoni mana.

¹² Ghotilo goro gaꞌase majaghani nei mae nalhaꞌu majaghani, goro khaekave nei mae khueku'e nei goro sua ikodi langau teura, ghotilo kilo fnaknoni mana.

¹³ Tutuani fara, tahati te gnafa mala kafe kilo fnaknoni nanghagna Lord! Nanghagna mana biꞌo fara tei salaꞌudi keha nanghare, eghuteuna nogna nolaghi mana na thofno nheta salaꞌudi fara gobigna lepo te au kligna ba te au ka nauthoglu igne.

¹⁴ Lord na reireghi fakeli ghita tahati nogna naikno Israel, eghume, tahati cheke fakelini mana! Mana namha ghita fara. Tahati kilo fnaknoni Lord!