Nodi Khoje Hatimare Mae Jiu 147 - Buka Blahi Ka Cheke Holo

Sam 147 Khoje mala kilo fafnaknoni God

¹ Tahati cheke fakelini Lord! Thofno keli fara tahati te cheke fakelini noda God. Uve, nabada fara tahati te cheke fakelini mana na, naugna puhigna mana na keli fara.

² Lord kela babana fapulo Jerusalem. Uve, mana kela hata fapulo kherada teke sneka teke tei sosolo ka kantri Babilon te khaba fara.

³ Iheire teke au diꞌanagnafa ra kela glealeꞌa fapulo, eghuteuna iheire teke kabru ra kela gaota fapulo.

⁴ Mana kaha nathunure ne fangangha ne hui.

⁵ Noda Lord na kaisei mae nafnakno nei nolaghi eghu fara, nei theo kaisei naikno te tangomana te fananaba nogna glalase na.

⁶ Mana togho haghedi iheire te au kokhonidi, nu koko sorudi pari iheire te gnognoro.

⁷ Tahati koje kilo fnaknoni Lord. Uve, tahati koje ka gita ranghini God.

⁸ Mana lilisei gromno ka maloa, aonu mana kuru mei nakhete ka nauthoglu igne mala teku haghe buburu ke kligna thogele.

⁹ Mana tusu lao ghedi gano buluka, nei faghamudi sua nanghaji ka vido te rofo te magnahaghei ghedi gano na.

^10-11 Lord na keli tagna fara ka iheire te ghatho tahuni mana re, ba iheire te au nodi grouronu ka nogna namha biꞌo mana na. Nu mana theome keli tagna ka iheire te au nodi grouronu ka nogna nanheta hose kolho, ba ka nodi nolaghi hatimare mae soldia kolho.

¹² Tahati naiknoda ka namono Jerusalem, tahati kilo fnaknoni Lord. Uve, tahati naiknoda ka namono Saion, tahati kilo fnaknoni noda God.

¹³ Mana eni famaku grengathagna noda namono tahati igne, nei fablahi ghita tahati naikno te au teu ke lamnagna.

¹⁴ Mana tusu ranghi ghita pharikeli mala au fakeli tahati ka kantri igne, nei tusu ranghi ghita gano te keli mala glealeꞌa tahati.

¹⁵ Kate cheke lao mana ka nauthoglu igne na, unha te chekeni mana na ginau ghosei thakle mei tutuani fara ngala.

¹⁶ Mana kuru mei khoveo mala jateula pohe eghu toku tafrudi thogele gre.

¹⁷ Mana kuru mei nakhete maku mala soru mei jateula thina eghu, eghuteuna theo kaisei naikno te tangomana te au fakeli ka vido te reka fara na.

¹⁸ Kate cheke kolho mana na, u khoveo na ginau blalho, eghuteuna kate gaghafa nuri na khoveo igne ginau funu nakhete na jateula khoꞌu eghu.

¹⁹ Lord na tusu mei nogna cheke nei vetula teure mala farirhiu ghita tahati naiknoda Israel.

²⁰ Mana theome edi glepo igre maladi naiknodi keha kantri delei. Theo, mare theome lasedi nogna famane farirhiu mana re. Tahati kilo fnaknoni Lord!