Nodi Khoje Hatimare Mae Jiu 146 - Buka Blahi Ka Cheke Holo

Sam 146 Cheke fakelini nanghagnaLord

¹ Cheke fakelini nanghagna Lord! Iara magnahagheni te cheke fakelini nanghagna mana na!

² Kate au teu iara ka nauthoglu igne, iara magnahaghei te koje fafnaknoni nanghagna nogu God na ghilei lehe.

³ Tore, thosei fatutuanidi hatimare mae funeigna nauthoglu igne, eigna mare theome tangomana te fakarhi ghami ghotilo na.

⁴ Kate lehe na, mare ginauna vuhai glose kolho, eghuteuna unha teke ghathoni mare na ginauna ari theo nafugna kolho.

⁵ Iheire te fatutuani ni nogna God mae Jekop te mala toghodi na, mare thono keli tadi fara.

⁶ Lord mae ihei teke vuavuhadi maloa, nauthoglu, nhorora nei gobigna lepo teu te au ke lamnadi. Mana theome chaichaghi ghita, nu mana tathajini fabrahu nogna nhaꞌa cheke na.

⁷ Mana toghodi fabrahu iheire te au papara, nei faghamudi iheire te rofo. Eghuteuna hata fajifladi iheire te au ka suga sosolo ka khamedi hatimare mae naoka.

⁸ Mana tothora tathadi iheire te dofu nei togho haghedi iheire te au pari lahu ka nakarhadire. Eghuteuna mana namhadi nei toghodi eghu fabrahu iheire te doglo puhidire.

⁹ Mana reireghi fakelidi iheire te posa mei ka namonodare, nei toghodi naikno biꞌo tela lehehi khetodire ba goro sua te glehe kokoi, nu mana fanogra nabroudi iheire te diꞌa puhidire mala theome eni mare unha te magnahagheni na.

¹⁰ Lord ginauna funei fruni ghita tahati naiknoda Saion ra nei iheire nate karha mei thogheiro tifa tifa. Tahati cheke fakelini nanghagna Lord!