Nodi Khoje Hatimare Mae Jiu 145 - Buka Blahi Ka Cheke Holo

Sam 145 Khoje mala kilo fnaknoni nanghagna God

Nogna khoje kilo fnakno mae Devet.

¹ Iara ginauna cheke thakleni nanghamu iagho na, naugna iagho ngala nogu God, nei King teu iara na. Iara ginauna na cheke fakeli nigho koba leuleghu fata.

² Leuleghu narane na iara ginauna cheke fakeli nigho iagho. Uve, iara ginauna cheke fakeli nigho koba leuleghu fata.

³ Lord na thofno fnakno fara, eghuteuna naikno te gnafa gre mala fafnaknoni mana. Theo kaisei naikno te nabagna te mala laseni nogna nolaghi mana na.

⁴ Lord God, nou naikno iagho gre ginau kilo fnakno nigho eidi glepo te keli teke edi iagho ranghidire baludi goro sua teke karha mei ka vikedi mare gre. Uve, mare ginauna cheke thakledi koba nou gloku biꞌo iagho ra.

⁵ Iagho King, naiknore ginauna toutonu eidi nou nolaghi nei nanghamu teu iagho re, eghuteuna iara ginauna na ghatho fabrahudi nou kofubobhoi iagho ra.

⁶ Naiknore ginauna toutonudi glepo biꞌo teke edi iagho ra, nei iara na toutonuni eigna fnakno fara iagho na.

⁷ Mare ginauna toutonuni famane puhimu iagho na, nei na koje glealeꞌa eigna puhimu iagho te thofno keli fara na.

⁸ Lord na thofno keli fara, nei kokhoni ghita eghu. Mana theome ghosei diꞌatagna, naugna nogna namha mana ranghi ghita tahati na thono biꞌo fara.

⁹ Leuleghu fata na thono keli fara ranghi ghita hui, nei mana tangomana te kokhoni ghita na eghu.

¹⁰ Lord God, gobigna lepo teke edi iagho ra ginauna kilo fnakno nigho, nei nou naikno te gnafa iagho gre ginauna tegio ranghi nigho iagho.

¹¹ Iagho mae King, naikno gre ginauna toutonu eidi glepo te keli teke edi iagho ra, nei mare ginauna na jaola toutonuni nou nolaghi biꞌo iagho na.

¹² Ka igne naikno te gnafare ginauna laseni nou gloku te biꞌo, nei glepo te keli eghu teke edi iagho ka nou nolaghi ra.

¹³ Iaghou ngala mae King na, iagho mala funei fruni fabrahu tifa e tifa. Leuleghu fata na Lord na tajidi nogna nhaꞌa chekere nei ka gobigna lepo te edi mana re eghu mana falalase ka tahati te keli fara ranghi ghita na.

¹⁴ Leuleghu fata na mana toghodi iheire te au ka hoholo nei farerheta gaoghathodi iheire te nigra.

¹⁵ Lord God, gobigna lepo te karha gre filo ari ka iagho, eghuteuna iagho tusu ranghidi gano ka vido te rofo na.

¹⁶ Uve, iagho tusu ranghidi kmana gano mala keli tadi mare.

¹⁷ Gobigna lepo te edi Lord gre thofno doglo fara, eghuteuna gobigna lepo te edi mana re falalase ranghi ghita te mae keli fara mana ka tahati na.

¹⁸ Leuleghu fata na mana kaikalitiu kolho te mala toghodi iheire fateo te eha lao ka mana ka nagnafa te doglo na.

¹⁹ Leuleghu fata na mana tusu lao glepo ka iheire te ghatho tahuni mana re. Mana jaola nomhidi nodi tharai re nei fakarhidi.

²⁰ Mana ginauna na roꞌe fahuidi naikno te diꞌare, nu mana na reireghidi iheire te namhani mana re.

²¹ Leuleghu fata na iara ginauna kilo fnaknoni Lord. Eghuteuna ghotilo gobigna lepo teke vuavuha mana ra, ghotilo mala jaola kilo fnaknoni nanghagna mana na tifa tifa.