Nodi Khoje Hatimare Mae Jiu 144 - Buka Blahi Ka Cheke Holo

Sam 144 Mae king ne tegio ka God eigna mana ne uluni u magra na

Nogna khoje mae Devet.

¹ Iara kilo fnaknoni Lord, naugna mana ne baubatu ghau nei farirhiu ghau te mala magra na.

² Mana ngala te baubatu ghau nei reireghi ghau teu iara na. Uve, mana ngala te mala fakarhi ghau nei nogu vido mala poru la ngau teu iara na. Iara na tei au fakeli ka mana, naugna iara ne au nogu grouronu biꞌo ka mana. Manau ngala te tusu mei nolaghi ka iara na te mala funei frunidi iara naiknodi keha kantri gre.

³ Lord God, naikno gre jateula te theo nafudi eghu kolho ka iagho. Thosei filo lao ka mare nei theome naba langau eghu iagho te ghathodi mare na.

⁴ Nakarhadi naikno igre jateula nuri ikoi eghu kolho gaghafa mei katha vido kmo'ei nu kela huila teura eghu kolho. Uve, mare jateula naungo te chari sala'ura eghu kolho.

⁵ Lord God, tora sagho maloa na mala soru mei. Habo sagho khamemu are ka thogele are mala jifla mei gagahu.

⁶ Kuru meini sagho u nakhafli ana mala rikha sopa thei nogu naoka iara gre. Uve, fada jatadi sagho mala rikha mare.

^7-8 Ngafa soru pari sagho khamemu na mala korho haghe ghau iara mala karha iara ka hoholo. Uve, atha fajifla ghau iara sagho ka nodi nolaghi naiknodi keha kantri te chaichaghi fara are. Eghuteuna nodi nhaꞌa chekere jaola chaichaghi kolho.

⁹ God, iara ginauna na kojeni kaisei khoje majaghani ka iagho. Uve, iara na atha gita mala koje ka iagho.

¹⁰ Iagho themu ngala te toghodi hatimare mae king di Israel gre te ulu koba mare kau magra na. Iagho themu ngala teke fakarhini mae king Devet nou mae gloku iagho ia.

¹¹ Fakarhi ghau iara sagho ka puhidi te diꞌa hatimare mae naoka gre. Atha fajifla ghau ka nodi nolaghi naiknodi keha kantri te lase chaichaghi fara gre. Eghuteuna nodi nhaꞌa chekere jaola theome tutuani kolho.

¹² Ghehati magnahaghedi hatimare mae thumi nalhaꞌu majaghani gre te mala nheta jateula gaju te famane kotura eghu. Uve, ghehati magnahaghedi thumi gaꞌase gre te mala famane fara jateula famane thotogale te lilisei ka gringnigna nogna suga biꞌo mae king ia eghu.

¹³ Ghehati magnahaghedi ghemi nagare gre te au kmana ganodi fara, mala fodu nomi belare ka gano te keli. Ghehati jaola magnahaghedi nomi sipure te au kmana thudi.

¹⁴ Uve, ghehati magnahaghedi nomi bulukare te vuragha fara, nei theo kaisei sua buluka te snivi na. Ghehati theome magnahaghei kaisei naoka te ruma mei ka nomi namono gne eghuteuna ghehati theome magnahagheni kaisei naikno ka ghehati te tanhi nei diꞌanagnafa teu ke lamna nabrou ka namonomi gre.

¹⁵ Naikno te jateula tuana teu te athini glepo te keli na thofno keli tadi fara. Eghuteuna naikno te Lord na ngala nodi God na, mare ngala te keli tadi na.