Nodi Khoje Hatimare Mae Jiu 142 - Buka Blahi Ka Cheke Holo

Sam 142 God ginauna toghoni mae ihei te tore ka mana na

Nogna khoje mae Devet kani teke poru mana ke lamna gluma.

¹ Iara tarai fabiꞌo ka Lord mala togho ghau mana.

² Iara thofno chekedi ka mana nogu puhi nei diꞌanagnafa teure.

³ Kate glaꞌe soru iara gaoghathogu na iagho laseniu puhi mala teke farerheta fapulo ghau iara na. Hatimare mae naoka gre mare la kulu roghe nodihi te mala goigoni ni u nakarhagu iara na.

⁴ Kate filo tafri na, iara theome filoni kaisei naikno te mala togho ghau na, ba te mala bara. Fothi ghau na. Thono theo fara kaisei mae te mei reireghi ghau na.

⁵ Lord God, iara eha mei ka iagho mala togho ghau, naugna iagho ngala vido keli te mala poru iara na. Iara magnahaghei kaisei glepo kolho, glepo igne mala au balumu iagho fabrahu.

⁶ Fanomho mei sagho ka nogu tharai thotogho iara gre, naugna gaoghathogure la thofno glaꞌe soruhi. Mei fakarhi ghau iara sagho naugna hatimare mae naoka gre theome tangomana iara te tapla sorudire.

⁷ Atha fasnagli ghau iara ka puhi te thoke ghau iara igre sagho. Naugna iagho thofno keli fara ka iara, iara ginauna cheke fakeli nigho ke uludi naikno te keli puhidi gre.