Nodi Khoje Hatimare Mae Jiu 141 - Buka Blahi Ka Cheke Holo

Sam 141 Tharai Grafiro

Nogna khoje mae Devet.

¹ Lord God, faghose mei togho ghau. Fanomho mei kate kilo ari nigho iara na.

² Iara magnahaghei nigho iagho te glealeꞌa ka nogu tharai iara gre, jateula iagho te glealeꞌa kate gagahu haghe ka iagho u insens te gahu mare pris ra eghu. Uve, Lord, iara magnahaghei nigho iagho te glealeꞌa ka iara kate ngafa haghe iara khamegu na te tarai ka iagho na, jateula iagho te glealeꞌa kate fafara grafiro ra eghu.

³ Lord God, fadoglidi nogu cheke fateote'o gre.

⁴ Togho mei ghau mala theome edi iara glepo te diꞌa gre, nei togho ghau mala theome fofodu iara ka naikno te diꞌa puhidi gre. Uve, togho ghau iara sagho mala theome ghamu iara ka gano te fafara mae bongihehe gre ka nodi mumuju god re.

⁵ Keli kolho ka iara jame te mei cheke ghau nei farirhiu ghau teu kaisei mae te keli puhigna na, te mala doglo iara nakarhagu na. Nu iara thono tirogu fara te leghuni kaisei mae te diꞌa puhigna na te mala nogna naikno mana na, naugna leuleghu fata na iara toreni Lord koba mala paradi mana naikno te diꞌa puhidire tuare.

⁶ Kate fatedi iagho hatimare mae biꞌore ke uludi naiknore eidi puhi diꞌa teke edi mare re, naiknore ginauna filo glanidi nogu cheke iara eidi mae biꞌo igre na thofno tutuani fara ngala.

⁷ Kate lehe mae biꞌo igre na, nhubradi mare te ginauna naga tafri ka bekudire jateula ngau naplamha gaju teke alha soru te chara teura eghu.

⁸ Lord God, iara au nogu grouronu biꞌo ka iagho, reireghi fakeli ghau, thosei snakre ghau mala lehe.

⁹ Baubatu fakeli ghau ka nodi phighoro naikno te diꞌa puhidi gre.

¹⁰ Nu iara ginauna na theome snoꞌo ka phighoro tuare, te keli na phighoro tuare mala ke snoꞌo kolho thedi.