Nodi Khoje Hatimare Mae Jiu 140 - Buka Blahi Ka Cheke Holo

Sam 140 God na reireghi fakelini mae ihei te tarai ka God na

Nogna khoje mae Devet malagna mae kwaemasta.

¹ Lord God, fakarhi ghau ka naikno te diꞌa igre. Baubatu fadelei ghau ka naikno te rodi magra igre.

² Mare roghedi kolho glepo te diꞌare, eghuteuna nodi chekere jaola mala fa eꞌei magra kolho.

³ Foflodire jateula khe'i phanaga eghu. Uve, cheke te diꞌare jateula poesen te jifla ka foflogna u phanaga ia eghu.

⁴ Lord God, baubatu fadelei ghau iara sagho ka naikno te diꞌa gre. Taji fakeli ghau ka iheire te khuru magra te roghe mala falehe ghau iara teu are.

⁵ Naikno te fahaehaghe are la kulu roghenihi te mala loki ghau iara na. Uve, mare la kulu kaikalitihi te mala loki ghau iara na, jateula naikno te kaikaliti fangna te mala ugra sasa ra eghu.

⁶ Leuleghu fata na iara cheke eghu, “Lord God, iagho nogu God iara.” Nomhini sagho nogu tharai iara gne.

⁷ Lord, iagho ngala te fakarhi ghau iara ka nou nolaghi na. Iagho reireghi fakeli ghau iara kate magra na.

⁸ Lord God, thosei tusu lao ka naikno te diꞌa gre unha te magnahagheni mare na. Thosei snakredi groghe te diꞌa tuare mala edi mare.

⁹ Thosei snakredi sagho mae naokare mala tapla fapari ghau iara ka magra na. Ke figri sagho nodi fangiri ngiri nei cheke te diꞌa teu are mala ke pulo ka thedi.

¹⁰ Jame te keli na iagho koko soru kaisei khaꞌaghi ke klignadi mala nhako mare. Nei te keli na iagho jame koko sorudi ka glave te mamhara na mala theome tangomana mare teke jifla na.

¹¹ Jame te keli na naikno te susurei chaichaghi eidi nodi vido glose keha naiknore igre nabadi na mala lus fabrahu ka kot. Jame te keli na glepo te diꞌa fateote'o gre kolho jame te thokedi mae te magra gre mala kokhoana mare.

¹² Lord God, iara lase nigho iagho te toghodi iagho naikno te kumare, nei tusu ranghidi unha te nabadi.

¹³ Tutuani fara, naikno te doglore ginauna au balumu iagho, eghuteuna mare ginauna na cheke fakeli nigho iagho fabrahu.