Nodi Khoje Hatimare Mae Jiu 139 - Buka Blahi Ka Cheke Holo

Sam 139 God na thofno lase ghau iara nei reireghi ghau iara eghu

Nogna khoje mae Devet malagna mae kwaemasta.

¹ Lord God, iagho la kulu filonihi nakarhagu iara na, nei iagho jaola lase fakeli ghauhi iara.

² Iagho la kulu lasedihi gobigna lepo teke edi iara ra. Neuba iagho ne au neu delei fara, iagho la kulu lasedihi gaoghathogu te gnafa iara re.

³ Iagho filodiu ngala vido te loku ne vido te gnafa teu iara re, nei lasedi gobigna lepo te edi iara re.

⁴ Neuba iara ne theome cheke neu, iagho la kulu lasedihi unha nate chekedi iara ginau re.

⁵ Iagho batu ghau iara ka vido aheva te tei iara na, nei reireghi ghau ka nou nolaghi na.

⁶ Iagho thofno lase fakeli ghau fara ngala iara, nu iara theome lase thokeni eigna igne.

⁷ Jame te magnahaghei poru nigho iara na, aheva nate tei te poru iara na?

⁸ Neuba iara ne haghe kligna, nu iagho auhi jare. Neuba iara ne lehe te tei ke pari gluma, nu iagho jaola auhi jare.

⁹ Neuba iara ne rikha ne tei ke maghati, ba iara ne tei fakhaba ke mosu,

¹⁰ nu iagho kulu auhi jare mala batu ghau nei togho ghau eghu iara.

¹¹ Jame te chekeni iara gromno na te mala pophoru ghau, ba chekeni iara u naphae na mala ke romno fapulo teuna,

¹² igne theome ke nhogri ngala ka iagho. Naugna gromno na theome romno kolho ka iagho, eghuteuna bongi na phae kolho jateula narane eghu kolho ka iagho. Uve, bongi ghe narane gre kaisei nanaba ngala ka iagho.

¹³ Kani au nga teku iara ka thi'agna idogu na, iagho themu ngala teke edire vido te gnafa ka thinigu iara igre, neke tudu fodudi ngala iagho.

¹⁴ Iara cheke fakeli nigho iagho naugna u nafnata puhi teke vuavuha ghau iara iagho igne thofno keli fara nei jajaglo ana eghu fara. Ka gaoghathogu fateo iara na, iara thofno laseni eidi gobigna lepo te edi iara ra e thofno keli fara.

¹⁵ Kani au nga teku iara ka thi'agna idogu na, iagho neke filo ghauhi iara. Uve, iagho la filodihi te kotu mei nhubragu iara re. Kate biꞌo haghe iara ka thi'agna idogu na, iagho lase nihi te au teu iara jare na.

¹⁶ Kate theome karha nga teu iara na, iagho filo ghau iara. Ame fufunu nga narane gre ka nakarhagu iara na teuna, iagho neke tutu fakelihi igre neke rioriso soruhi ka nou buka na.

¹⁷ God, iagho au nou kmana soasopai gaoghatho te theome ghatho thokedi iara re.

¹⁸ Iara theome tangomana te kaha fahuidire, naugna kmana fara jateula nusu eghu. Kate thokeni iara fahuhuigna nakarhagu na, iara ginauna na au balumu iagho.

¹⁹ God, iara magnahaghei nigho iagho fara te falehedi naikno te diꞌa are. Eghuteuna iara magnahaghedi fara mae iheire te khuru magra igre te tei delei na!

²⁰ Iheire te cheke fadiꞌa nigho, nei iheire te cheke faparini eghu nanghamu iagho na.

²¹ Lord God, iara tirogudi fara iheire te tirodi nigho iagho re. Uve, iara thofno tirogudi fara, naugna mare ne theome leghu nigho iagho.

²² Te filo lao iara ka mare na, mare jateula nogu mae naoka iara eghu ngala. Ka igneu te tirogudi fara ngala iara mae tuare.

²³ God, filo glani sagho gaoghathogu iara gne, filo fakelidi sagho unha te ghathodi iara gre.

²⁴ God, filo meini sagho nakarhagu iara gne, glahula me au meu keha thona tagna. Baubatu ghau iara sagho ka puhimu iagho te keli fara te au fabrahu te tifa te tifa ana.