Nodi Khoje Hatimare Mae Jiu 138 - Buka Blahi Ka Cheke Holo

Sam 138 Tharai mala cheke fakelini God

Nogna khoje mae Devet.

¹ Lord God, iara thofno cheke fakeli nigho ka gaoghathogu fateote'o. Iara koje kilo fnakno nigho ke uludi nodi god iheire te theome laseni God.

² Iara pogho soru nigho mala cheke fakelini nanghamu na ka sugamu te blahi igne, naugna iagho ne namha ghau iara nei theome ghatho ihoni nou nhaꞌa cheke na. Iagho neke togho ghami ghehati mala laseni nanghamu na nei chekemu eghu te nolaghi fara te salaꞌudi thua nafnotu fateote'o.

³ Ka vido te eha ari iara ka iagho na, iagho nomhi ghau iara, aonu ke farerheta ghau ka nou nolaghi na.

⁴ Lord God, hatimare mae king te gnafa ka nauthoglu igne ginauna cheke fakeli nigho, naugna mare la nomhi nihi nou nhaꞌa cheke iagho ia.

⁵ Lord God, mare ginauna koje eidi gobigna lepo teke edi iagho ra, naugna ka iagho ngala te au nolaghi biꞌo na.

⁶ Neuba iagho ne fnakno fara, iagho reireghidi koba iheire te au faparadi thedire. Nu naikno te fahaehaghedi thedire theome tangomana te poru ka iagho na.

⁷ Kate thoke ghau iara hoholo na, iagho fakarhi ghau iara. Iagho tapla fapari nodi mae nogu naoka iara re, iheire te diꞌa tadi fara ngala ka iara. Iagho fakarhi ghau ka nou nolaghi na.

⁸ Lord God, iara laseni, iagho ginauna edi unha teke nhaꞌa chekedi iagho ka iara ra, naugna nou namha iagho ka ghehati na theome tangomana te hui na. Thosei tei koko ghami ghehati nou naikno iagho teke vuavuha themu gre sagho.