Nodi Khoje Hatimare Mae Jiu 137 - Buka Blahi Ka Cheke Holo

Sam 137 Nodi natanhi naiknodi Israel kani au teku Babilon

^1-2 Kani au teku Babilon na, ghehati neke gnokro soru pari ka geri khoꞌu na neke diꞌanagnafa kolho. Aonu ghehati fagefe haghe nomi gitare ka grege gajure kligna ne tanhi nomi kolho, naugna ghehati neke ghatho fapulo Saion.

³ Iheire teke sesekai ghami ghehati teke tei Babilon gre mare ne tore ghami ghehati mala koje. Mare ne cheke eghu ka ghehati, “Kojeni si ghotilo kaisei khoje gna Saion.” Mare magnahaghei ghami ghehati te koje mala glealeꞌa nodi eghu, nu mare khogla maꞌe ghami ghehati kolho eghu.

⁴ Nu ghehati ne cheke eghu ka mare, “Faꞌunha eghu koje lao ka God site au teu ghehati ka keha kantri delei gnea?”

⁵ Jerusalem, jame te theome ghatho nigho iara na, tibrini iagho khamegu iara gne eghu mala theome laseni iara te lalahu gita na.

⁶ Jame te theome ghatho nigho iara na Jerusalem, faluti haghe iagho glapigu iara gne ka doadohagu gne eghu mala theome tangomana iara te koje na eghu. Eghu jame te theome ghathoni iara nogu glealeꞌa biꞌo eigna Jerusalem.

⁷ Lord God, ghathodi sagho glepo te diꞌa te cheke meidi ka ghehati naiknodi Idom gre, ka narane teke mei mae Babilon teke magra ka ghehati Jerusalem ia. Naiknodi Idom gre neke cheke eghu fabrahu, “Paꞌe soru namono biꞌo tuana, paꞌe soru pari!”

⁸ Ghotilo naiknomi Babilonia ra, God ginauna goigoni ghami ghotilo. Naikno teke tughu fapulo ka ghotilo unha teke eni ghotilo ka ghehati na, mare ginauna keli tadi fara. Mare ginauna na para ghami ghotilo eigna unha teke eni ghotilo ka ghehati na.

⁹ Mare ginauna keli tadi fara kate hata thumi ghotilo are te mala fada ruaruja ka thina na.