Nodi Khoje Hatimare Mae Jiu 135 - Buka Blahi Ka Cheke Holo

Sam 135 Khoje mala cheke fakeliniLord

¹ Ghotilo cheke fakelini Lord! Ghotilo nogna mae gloku mana ra, ghotilo cheke fakelini nanghagna mana na.

² Ghotilo iheire te kegra lamna ka Sugablahi ra, cheke fakelini mana.

³ Ghotilo cheke fakelini Lord, naugna mana ne keli fara ranghi ghita fara. Ghotilo koje cheke fakelini nanghagna mana na, naugna mana ne kokhoni ghita fara.

⁴ Lord neke vahini vikegna mae Jekop mala nogna naikno mana. Uve, mana la vahidihi naiknodi Israel mala thofno nogna naikno mana.

⁵ Iara laseni eigna Lord te fnakno kligna lahu na. Uve, noda mae funei tahati na fnakno fara kligna lahu ke uludi keha god te chaichaghi are.

⁶ Lord na eni unha te magnahagheni mana ka maloa kligna ba ka nauthoglu ba ka thongna ba ke lamna nhorora.

⁷ Mana neke vuavuha khoveo mala au ka maloa kligna, nei nakhete mala mei balu saeklon, nei nuri na mala gaghafa mei ka tahati kate brana ghita na.

⁸ Mana neke falelehe goro sua teke kulu karha ka naiknodi Ijep re, nei jaola nodi buluka ba sipu ba nanigot, ba hose eghu teke kulu karha re.

⁹ Mana jaola neke edi kofubobhoi nei fagaglana eghu jare Ijep mala parani nodi mae king mare na nei nogna mae biꞌo te gnafa mana re.

¹⁰ Mana neke roꞌe fahuidi vike te gnafa ka keha kantri are, nei falelehe fahuidi hatimare mae king, mae iheire nheta tulao.

¹¹ Mana neke faleheni mae king Sihon, mae ihei te king ka vikegna Amoro, nei mae king Og, nodi king hatimare maedi Besan, nei jaola falelehe fahui hatimare mae king te gnafa ka kantri Kenan.

¹² Mana neke tusu mei ka tahati nodi glose hatimare mae king ra ka tahati nogna naikno Israel gre.

¹³ Lord naikno igre ginauna laseni fabrahu nou nafnakno iagho na. Uve, naiknore ginauna theome gnafa te toutonu eigna te iagho ngala God na teuna.

¹⁴ Lord iagho ginauna chekeni te doglo nou naiknore, nei kokhoni ni nou mae gloku gne.

¹⁵ Nodi god mae bongihehe gre neke hohoro kolho naikno ka silva nei gol eghu.

¹⁶ Nodi god mare igre au foflodi nu theome tangomana te cheke na eghu. Mare au tathadi nu mare theome tangomana te fifilo na eghu.

¹⁷ Mare au khuli nu mare theome tangomana te nomhini kaisei glepo na eghu. Mumuju igre theome au karha na tadi.

¹⁸ Uve, iheire te hohoro mumuju nei pogho soru ka mumuju igre teuna, naikno tuare ginauna na jateula mumuju eghu theo karha na ke lamnadi.

¹⁹ Tahati naiknoda Israel mala cheke fakelini Lord. Uve, ghotilo nogna mae pris mana ra mala jaola cheke fakelini mana.

²⁰ Ghotilo vikegna Livae ra mala cheke fakelini Lord. Tahati te gnafa te ghatho tahuni mana ra kafe cheke fakelini mana.

²¹ Ghotilo naikno Jerusalem ra cheke fakelini Lord ka Thogele Saion. Uve, tahati kafe cheke fakelini mana!