Nodi Khoje Hatimare Mae Jiu 132 - Buka Blahi Ka Cheke Holo

Sam 132 Mala cheke fakelini Sugablahi nogna God

Mare koje khoje igne kate haghe ka gaghamu bi'o Jerusalem.

¹ Lord God, ghathoni sagho nakarha te ninhigrana tela au telau mae king Devet ke lamnagna igne.

² Lord God, iagho nogna God mae Jekop, nolaghi te gnafa gre nou iagho. Ghathodi sagho u nhaꞌa cheke teke edi mae Devet ka iagho ra.

^3-5 Mana neke nhaꞌa cheke eghu agne, “Lord God, iagho nogna God mae Jekop, nolaghi te gnafa gre nou iagho. Iara magnahaghei te filoni kaisei vido te mala aumu iagho na. Jame te theo na iara ginauna na theome tangomana te tei ruma ka sugagu na te mala gnafa ba te mala thuru na.”

⁶ Kate au teu ghehati Betlehem, ghehati neke nomhini thoutonu eigna Bokis Blahi gna nou nhaꞌa cheke iagho ia. Aonu kate mei ghehati jare Kiriat Jearim na ghehati ne filoni nou Bokis Blahi iagho na jare.

⁷ Eghuteuna ghehati ne cheke eghu, “Tahati na atha ari Bokis Blahi igne ka nogna Sugablahi Lord ia. Tahati mala pogho soruni mana ka vido aheva te gnokro teu mana ka nogna sape nafnakno.

⁸ Lord God, Sugablahi igne te mala aumu iagho na. Mei sagho au fabrahu agne balugna Bokis Blahi te falalase ni nou nolaghi biꞌo iagho na.

⁹ Toghodi sagho nou mae pris are mala edi fabrahu koba mare puhi te doglore. Mala glealeꞌa nei eha fabiꞌo ame ghu nou naiknore eghu.”

¹⁰ Lord God, funu tifa te mei na iagho neke eni kaisei nhaꞌa cheke ka nou mae gloku king Devet. Eghume thosei figri tagruni nomi king teke vavahi iagho igne eghu.

¹¹ Iagho neke eni kaisei nhaꞌa cheke te theome bligi ka mae Devet te theome tangomana iagho te fakhusui na. Uve, iagho neke nhaꞌa cheke eghu agne, “Iara ginauna vahini kaisei mae thumu iagho mala king, eghuteuna mana ginauna mala funei frunidi naiknore ke leghumu iagho.

¹² Nu mae thumu nalhaꞌu iagho re mala leghu fakelidi nogu nhaꞌa cheke iara gre baludi vetula teke farirhiudi iara ra. Eghuteuna thudi nalhaꞌu mare nate karha mei thogheirore ginauna nake gnokro ka nou sape nafnakno iagho na mala funei frunidi naiknore tifa e tifa.”

¹³ Lord, neke vahini Saion. Mana magnahagheni mala nogna namono.

¹⁴ Mana neke cheke eghu, “Igne vido nate au fabrahu iara tagna na. Vido igne ginauna mala namonogu iara, naugna iara ne khaeni fara.

¹⁵ Iara ginau tusu lao glepo kmana te keli ka naikno te au ka namono Saion are. Iara ginauna na tusu lao kmana gano ka iheire te kuma te au ka vido tuana mala glealeꞌa mare.

¹⁶ Iara ginauna na fablahidi gobigna lepo te edi hatimare mae pris are. Naikno gna vido tuana ginauna koje nei eha fabiꞌo eghu, naugna mare ne glealeꞌa fara.

¹⁷ “Iara ginauna vahini kaisei mae ka mae iheire nate karha mei ke leghugna King Devet mala kaisei mae king biꞌo.

¹⁸ Iara ginauna na tusu ranghidi nakarha te keli iheire fateo te au ka kantri tuana, nu hatimare mae naokare ginauna mamaja nodi fara.”