Nodi Khoje Hatimare Mae Jiu 130 - Buka Blahi Ka Cheke Holo

Sam 130 Mana tore ka God mala toghoni

Mare koje khoje igne kate haghe ka gaghamu bi'o Jerusalem.

^1-3 Nogu Lord God, kate eha ari iara na, mei sagho togho ghau iara. Puhi te thoke ghau iara gre thono faglaꞌedi fara gaoghathogu iara na. Jame rioriso soru iagho nakhibomi ghehati gre meuna, ihei gne te tangomana ni nate kegra teu ke ulumu iagho ginauna, te mala theome fateni iagho na?

⁴ Nu atha kokodi sagho nakhibomi ghehati gre mala tangomana ghehati te ghatho tahu nigho nei tufru soru nigho teuna.

⁵ Iara ofoni kolho Lord, naugna iara magnahagheini fara mana te togho ghau na. Eigna iara fatutuani ni fara unha te chekeni mana na.

⁶ Iara ofoniu nogu Lord, eigna iara magnahaghei fara te filoni mana te mala togho ghau ke tulao gnai mae ihei te dofra bongiro te magnahaghei te ghosei te phage naprai na ia eghu.

⁷ Tahati naiknoda Israel ra, tahati mala au noda grouronu ka Lord, naugna nogna namha mana thono biꞌo fara, nei magnahaghei fara fakarha ghita na.

⁸ Uve, mana ginauna na fakarhi ghita tahati nogna naikno mana te au agne Israel ra ka nakhiboda fateote'o.