Nodi Khoje Hatimare Mae Jiu 127 - Buka Blahi Ka Cheke Holo

Sam 127 Khoje kilo fnaknoni puhigna God te keli na

Nogna khoje mae Solomon. Mare koje khoje igne kate haghe ka gaghamu bi'o Jerusalem.

¹ Jame te theome totogho Lord ka ihei te loku ka suga na, gloku te eni mana igne theo nafugna kolho. Eghuteuna jame te theome reireghi fakeli Lord balugna mae ihei te reireghi gna nogna namono na glahula mei ruma naokare ka nogna namono na teuna, reireghi te eni mana igne theo nafugna kolho.

² Thono theo nafuda kolho tahati te nangani kolho nakarhada theda na, te loku hetani gano na kolho funu hamerane boibongi te ghilei rafi na. Naugna Lord ngala nate togho ghita ginauna ka unha te nabada tahati na, neuba ne loku heta ba thuru iho eghu tahati.

³ Goro sua te karha mei ka tahati igre, igne kaisei nogna namha biꞌo Lord ranghi ghita tahati.

⁴ Goro sua te karha mei ka tahati naikno majaghani nga teu igre, mare mala jateula nogna jata soldia eghu mala togho ghita tahati.

⁵ Eghume mae ihei te au kmana thugna na, mana thono keli tagna fara. Glahula te hatani mana te tei nogna naoka re ka fate na, thugna mana re ginauna toghoni mana mala kegra haghe balugna mala tapla sorudi nogna naoka re.