Nodi Khoje Hatimare Mae Jiu 107 - Buka Blahi Ka Cheke Holo

Falima Buka ( Sam 107–150 ) Sam 107 Tahati thofno gleale'ani puhigna God te keli

¹ Tahati tegio ka Lord, naugna mana thofno keli fara! Uve, naugna mana namha ghita fabrahu!

² Tahati naikno teke atha fapulo ghita Lord ka khamedi hatimare mae naoka ra, tahati kafe pala hagheni nanghagna Lord.

³ Mana neke atha fapulo ghita ka kantri ke maghati, ke mosu, ke raru nei ke mata, mala ke pulo ka noda kantri igne.

⁴ Keha ka tahati tei tafri ka namono nagou te theo nabrougna na, eghuteuna mare theome tangomana te filo deni kaisei namono biꞌo te mala au tagna na.

⁵ Mare rofo nei roi koꞌu, aonu, mare ne glaꞌe soru gaoghathodire.

⁶ Kate au teu mare ka hoholo na, mare tanhi lao ka Lord mala toghodi. Aonu mana ne fakarhidi ka thua hoholo fateote'o.

⁷ Mana neke baubatudi neke tei ka kaisei nabrou te doglo, neke ghilei tei posa ka kaisei namono biꞌo aheva te mala au fakeli mare tagna na.

⁸ Eghume, mare ne tegioni God eigna nogna namha biꞌo mana ranghidi mare na, nei eidi glepo te biꞌo teke edi mana te toghodi mare re.

⁹ Mana neke tusu lao khoꞌu ka iheire te roi koꞌu fara, nei tusu lao gano te keli ka iheire te rofo, mala boho nei glealeꞌa eghu mare.

¹⁰ Kehare neke haru mare ka chen neke au ka suga sosolo te thono romno fara na.

¹¹ Naugna mare neke thono figri tagruni fara chekegna God na, nei tirodi fanomho ka nogna farirhiu God mae ihei te thofno fnakno fara na.

¹² Mare glaꞌe fara ne uka pari eigna mare neke loku heta fara. Nu theo kaisei naikno te toghodire.

¹³ Kate au teu mare ka hoholo na, mare tanhi lao ka Lord mala toghodi. Aonu mana ne fakarhidi ka thua hoholo fateote'o.

¹⁴ Uve, mana neke kukusu chen teke au ka thinidire ne atha fajifladi ka suga sosolo te romno fara na.

^15-16 Mana neke fadidiꞌa grengathagna suga sosolo teke hohoro mare ka bras na, nei lolhopa aean teke loku mare na. Uve, mana neke atha fajifladi hui. Eghume mare tegioni nogna namha biꞌo God na, nei glepo te biꞌo teke edi mana teke toghodi mare na eghu.

¹⁷ Keha ka tahati fogra ne au papara fara, naugna mare ne meomekro fara ne edi puhi te diꞌare.

¹⁸ Mare tirodi ima ne namo lehe kate fogra te au papara na.

¹⁹ Kate au teu mare ka hoholo na, mare tanhi ka Lord mala toghodi. Aonu mana ne fakarhidi ka thua hoholo fateote'o.

²⁰ God neke cheke ranghidi neke keli fapulo thinidire. Uve, mana neke fakarhidi kau glehe.

²¹ Eghume, mare ne tegioni God eigna nogna namha biꞌo mana ranghidi mare na, nei eidi glepo te biꞌo teke edi mana te toghodi mare re.

²² Mare fafara mala tegio ka mana, mare mala toutonu ka khoje glealeꞌa eidi thua nafnotu teke edi mana re.

²³ Eghuteuna keha ka tahati loku ka vaka.

²⁴ Mare la filodihi unha te edi Lord re. Nei mare lasedi fara glepo biꞌo teke edi mana ka thongnare.

²⁵ Kate cheke mana na, u nuri biꞌo na neke mei neke malu nhorora na.

²⁶ U maraghata na neke pala haghedi vakare kligna, eghuteuna ke koko sorudi pari neku neke namo lodu. U maraghata igne faglaꞌedi fara gaoghathodi mae te loku ka vakare.

²⁷ Mare neke khoko soru pari neke phili tafri pari ka vaka na jateula mae te dranga ra neku neke theome tangomana te mala eni kaisei glepo te mala toghoni u vaka na.

²⁸ Kate au teu mare ka hoholo na, mare tanhi lao ka Lord mala toghodi. Aonu mana ne fakarhidi ka thua hoholo fateote'o.

²⁹ Mana neke cheke ranghini nuri na mala snoto, nei thongna na ne muana.

³⁰ Mare neke keli tadi fara kate muana thongna na, eghuteuna God neke batudi mare neke tei thoke ka vido aheva te mala tei mare na.

³¹ Eghume, mare ne tegioni God eigna nogna namha biꞌo mana ranghidi mare na, nei eidi glepo te biꞌo teke edi mana te toghodi mare re.

³² Mare kilo fnaknoni mana ke uludi naiknore nei cheke fakelini mana kate haidu hatimare mae biꞌo.

³³ God na tangomana te fakhapradi khoꞌu biꞌore, eghuteuna glokha re theome tangomana teke loloro na. Aonu glose na mojani theo tokagna.

³⁴ Eghuteuna mana na edi glose igre mala fodu ka solt mala theo kaisei glepo te kotu jare na. Naugna naikno te au ka vido tuana ra ne diꞌa fara puhidire.

³⁵ God neke vuavuha khoꞌu mala jifla mei lamna khora ke lamna namono nagou, nei glokha mala loloro tei ka vido te moja.

³⁶ Mana neke snakredi naikno te rofo re mala au ka vido tuana, nei mala ei nodi namono biꞌo mala au jare.

³⁷ Mare tobi neke joꞌu grep. Aonu mare neke au ghedi kmana gano nei sisi eghu ka nagare.

³⁸ Mana fablahidi koba naiknore, mala vuragha e thovu nei mala kmana nodi buluka eghu.

³⁹ Kate tapla fapari ghita noda naokare kau magra na, mare fakokhoana ghita nei para ghita eghu fara tahati.

⁴⁰ Nu kate eni mare igne na, Lord na ne kakhana nogna nolaghi na ka mare eigna mana te theome magnahaghedi mare te goigoni ghita tahati na. Aonu mana neke fanonolodi mare ka namono nagou na, eigna jare na theo kaisei nabrou te mala leghui na.

⁴¹ Nu mana neke fakarhi ghita tahati naikno te kuma gre ka hoholo. Eghuteuna mana toghodi tharaknada tahati gre mala au kmana sua.

⁴² Kate filodi glepo igre naikno te doglore, mare ne thono keli tadi fara. Nu kate filodi naikno te diꞌare glepo igre, mare neke theome gagri kaisei cheke ne faꞌikodi.

⁴³ Ihei te au tagna glalase te keli na, ginauna ghathodi glepo igre. Mana ginauna ghathoni fabrahu eigna nogna namha biꞌo Lord ranghi ghita tahati na.