Nodi Khoje Hatimare Mae Jiu 106 - Buka Blahi Ka Cheke Holo

Sam 106 God na keli fara ranghidi naiknore

¹ Tahati kilo fnaknoni Lord! Tahati tegioni mana, naugna mana thofno keli fara. Uve, mana namha ghita fabrahu.

² Ihei gne te nabagna te mala toutonudi glepo te keli te edi Lord re? Ihei gne te nabagna te mala kilo fnaknoni nanghagna na ka puhigna thegna te keli na? Thono theo fara!

³ Iheire te leghudi nogna cheke, nei iheire te edi glepo te doglo re eghu, mare keli tadi fara.

⁴ Lord God, ghatho ghau ka vido te mei iagho te toghodi nou naiknore. Uve, ka vido te mei iagho te mala fakarhidi re, iagho jaola mei fakarhi ghau iara.

⁵ Jame te eghu na, iara ginauna filoni nakarha te keli na ka nou naikno iagho re, nei iara ginauna tangomana te glealeꞌa baludi. Uve, mala tangomana ghau iara te mala kaisei baludi te mala kilo fnaknoni nanghamu iagho na.

⁶ Tahati gne au nakhiboda jateula ku'eda tifa ra eghu. Uve, tahati neke leghudi puhi te diꞌare neke edi glepo te diꞌare.

⁷ Tifa, kani au teku Ijep mae kuꞌedara, mare neke theome filo glanidi u kofubobhoi teke edi God ra. Uve, kmana fata mare ghatho ihodi kolho puhi teke fakakhana mana nogna namha te biꞌo na ka mare ra. Mare neke figri tagruni mana ka Thongna Ukru na.

⁸ Nu Lord neke fakakhana ka mare nogna nanheta na neke fakarhidi, leghuni nogna nhaꞌa cheke na.

⁹ Mana neke cheke ranghini kolho u Thongna Ukru na, aonu thongna na ne jateula glose te khapra neu kolho, ne batudi nogna naiknore ne kasa ka keha phile na.

¹⁰ Mana neke fakarhidi nogna naiknore. Uve, mana neke atha fajifladi ka khamedi mae naokare.

¹¹ Mae naoka igre neke kafe knoho neke lehe ka khoꞌu, theo kaisei ka mare te karha na.

¹² Aonu nogna naiknore ne fatutuanidi nogna nhaꞌa cheke mana re, ne koje kilo fnaknoni mana.

¹³ Nu theome raugha kolho mare neke ghatho ihodi kolho unha teke edi God re. Eghuteuna mare tirodi ofoni te mala laseni unha te magnahagheni God te mala eni mare na.

¹⁴ Kate au teu mare ka namono nagou na, mare neke rofo fara, aonu mare neke tore gano ka God mala fariuriuni mana.

¹⁵ Aonu mana ne tusu ranghidi unha teke magnahagheni mare na. Nu mana jaola neke tusu ranghidi kaisei fogra te thono diꞌa fara.

¹⁶ Jare ke lamnagna namono nagou na, keha mae ka mare ne goghotudi fara mae Moses ghe mae Eron, nogna mae pris Lord na.

¹⁷ Aonu ka narane tuare, glose na ne diha ne thafru mae Datan ghe mae Abiram baludi vikedi nei iheire eghu teke leghudi phia mare re.

¹⁸ God ne kuru soruni khaꞌaghi na ke klignadi naikno teke leghudi phia mare re ne nhako ne theo tokadi.

¹⁹ Ka Thogele Sanai, mare neke hohoro kaisei mumuju buluka ka gol neke pogho soru tagna.

²⁰ Mare neke tughu nodi God te fnakno fara na ka mumuju gna buluka te ghamu buburu na ne tarai tagna. Ka puhi igne mare thofno tapla faparini nanghagna God na.

²¹ God na neke edi glepo te biꞌo fara Ijep, neke fakarhidi mare, nu mare neke theome ghathoni mana kolho eghu.

²² Kofubobhoi teke edi God Ijep ra thono biꞌo fara, eghuteuna glepo teke edi mana ka Thongna Ukru ra, thono glepo mala jaglo nodi fara, nu mare theome ghathoni mana kolho eghu.

²³ Aonu te chekeni God na, mana ginauna roꞌedi nogna naiknore. Nu mae Moses, mae ihei teke vavahi thegna Lord na ne theome magnahagheni gaoghathogna God na. Aonu mana ne kegra ke ulugna God ne fanograni te diꞌatagna mana ka naiknodi Israel re.

²⁴ Nu ke leghu na mare ne tirodi fara te tei posa ka famane kantri Kenan, naugna mare neke theome fatutuani ni nogna nhaꞌa cheke God na.

²⁵ Mare au neu ka nodi suga thapuale re ne cheke buiburini God, ne tirodi leghuni mana.

²⁶ Aonu mana ne eni kaisei cheke te thono nheta fara te mala lehe mare ke lamnagna namono nagou na.

²⁷ Eghuteuna mana ginauna brue fajifladi iheire nate karha mei ka vikedi mare thogheiro mala tei au tafri farihoteidi naikno te bongihehere, nei lisa laodi mala tei lehe mare ka keha kantri delei.

²⁸ Naugna mare ne kegra fodu baludi naikno khulumono re mala tarai ka mumuju Baal ka thogele Pio. Mare ne kafe ima nafnahi teke fafara naiknodi Pio re ka mumuju te theo karha tagna na.

²⁹ God ne thono diꞌatagna fara ka unha te edi mare igre, aonu kaisei fogra te thono diꞌa fara ne thokedi mare.

³⁰ Nu mae Finihas ne kegra haghe ne falehedi phei mae teke baubatugna puhi tuana, aonu fogra tuana ari ne khusu.

³¹ Funu gognaro te haghe na famane puhi te doglo te nomhini tahati teke eni mae Finihas igne, naikno nate karha mei thogheiro re na theome ghatho ihoni.

³² Kate au teu mare ka khoꞌu Meriba na, Lord neke thono diꞌatagna fara ka naiknore, aonu mae Moses ne nhotei ka puhi, naugna eidi unha teke edi naiknore.

³³ Mae Moses ne thono diꞌatagna fara ka naiknore ne cheke ne ghilei theome doglo nogna cheke re.

^34-35 God neke cheke ka nogna naiknore mala falehedi naikno te bongihehere. Nu naiknore neke theome leghudi kolho neke tolaghi ngala ka naikno te bongihehere, nei jaola leghudi nodi kastom mare re.

³⁶ Mare tarai ka mumuju. Eghuteuna naiknore ne kafe khale ka puhi te jateula phighoro teu igne.

³⁷ Mare ne falelehe thudi nalhaꞌu nei gaꞌase teure ne fafara ka mumuju.

³⁸ Uve, mare neke falelehe neke fafara lao famane suare ka mumuju. Ka puhi igne nodi kantri mare na ne thono diꞌa fara ka tathagna God na.

³⁹ Uve, ka puhi igne na mare fathonadi fara thedi ka tathagna God na, nei figri tagruni nei theome leghuni eghu nogna nhaꞌa cheke mana na.

⁴⁰ Aonu Lord ne thono diꞌatagna fara ne tirognadi nogna naiknore.

⁴¹ Mana ne lisa laodi ka khamedi naikno te bongihehere mala au ke paridi mae nodi naokare.

⁴² Hatimare mae naoka gre ne paradi fara mare ne ghilei kokhonidi fara.

⁴³ Kmana fata, God neke fakarhidi, nu leuleghu fata na mare vahini kolho puhi te mala figri tagruni mana na, naugna mare au ka nakarha te fodu ka nakhibo.

⁴⁴ Nu kate tanhi lao mare ka mana na, mana nomhidi mare ne kokhoni nognadi, naugna mare ne au fari hotei hoholo.

⁴⁵ Mana kokhoni nognadi fara neke ghatho fapuloni nogna nhaꞌa cheke na, neke figri gaoghathogna na.

⁴⁶ Mana neke fifigri gaoghathodi mae naoka te funei frunidi nogna naiknore mala kokhonidi.

⁴⁷ Lord, iagho nomi God ghehati! Fakarhi ghami nei atha fajifla ghami eghu khamedi naikno bongihehe gre. Atha fafigri ghami ka namonomi ra. Te eghu na, ghehati ginauna tegio ka iagho, nei ghehati na cheke fakelini nanghamu iagho te blahi na.

⁴⁸ Tahati cheke fakelini Lord, mae ihei te noda God tahati naiknoda Israel! Uve, tahati cheke fakelini mana gognaro gne nei tifa tifa! Ghotilo te hui na cheke eghu, “Amen!” Cheke fakelini Lord!