Proveb 8 - Buka Blahi Ka Cheke Holo

Cheke ghatho tahu eigna gaoghatho te keli

¹ Gaoghatho te keli nei doglo teu igne jateula kaisei famane gaꞌase te kegra haghe te eha mei ka tahati ra eghu.

^2-3 Naꞌa eha ke kligna thogele, ba ka geri nabrou. Ka farerege nabrou nei ka grengathadi namono biꞌo te gnafa, naꞌa kegra mala eha eghu mei,

⁴ “Iara eha ari ka ghotilo nalhaꞌura mala cheke fajiflani gaoghathogu na ka ghotilo naikno te gnafa ka nauthoglu igne.

⁵ Ghotilo iheire te theome ghaoghatho fadoglo ra, ghotilo mei, iara ginauna fadoglidi gaoghathomi ghotilo re. Ghotilo te theome lalase ra, ghotilo mei, iara ginauna togho ghami ghotilo mala hata glalase.

⁶ Famane fanomho mei, naugna nogu cheke iara igre thofno keli fara, eghuteuna gobigna lepo te chekedi iara igre thofno doglo fara.

⁷ Nogu cheke te gnafa iara igre thofno tutuani fara, naugna iara theome magnahaghei te chaghi na.

⁸ Cheke te gnafa te chekedi iara igre thofno doglo fara, iara theome tangomana te chekeni cheke te theome doglo na.

⁹ Gaoghathogna cheke igne thofno glola fara ka ihei te autagna gaoghatho te keli nei lalase teuna, eghuteuna mana laseni nogu cheke iara igne thofno doglo fara.

¹⁰ Ghotilo mala vahini glalase te keli na, naugna nogu cheke iara na keli fara uludi silva ghe gol.

¹¹ Glalase na thofno keli fara uludi buli ghe daemon, theo kaisei glepo te magnahagheni fara iagho na te uluni na.

¹² “Iara ngala u glalase na, eghuteuna iara au balugna gaoghatho te doglo.

¹³ Jame te ghatho tahuni iagho Lord na, iagho na theome magnahagheni puhi te diꞌa na. Iara theome magnahagheni puhi te fahaehaghe na, puhi te filo faparini ihei na, puhi te diꞌa na, nei cheke te diꞌa na.

¹⁴ Iara tangomana te tusu lao gaoghatho te keli ka naiknore, eghuteuna iara tangomana te toghodi mare te mala eni gloku te keli na. Iara ngala gaoghatho te keli na, nei nolaghi te biꞌo na.

¹⁵ Iara toghodi hatimare mae lida mala funei fruni, nei gavman mala lilisei vetula te keli.

¹⁶ Iara toghodi hatimare mae funei, nei goro mae biꞌo mala jaola batu fakelidi naiknore.

¹⁷ Namha ghau iara, iara ginauna namha nigho iagho. Hiro ghau iara, iagho ginauna dei ghau iara.

¹⁸ Iara tangomana te tusu lao dedei nei nafnakno teu ka naiknore. Iara tangomana te togho nigho iagho mala au fabrahu nou kmana glepo te keli, nei leghuni nabrou te doglo.

¹⁹ Glepo te tusu ari iara na, keli fara salaꞌudi silva ghe gol.

²⁰ Leuleghu fata na iara leghuni puhi te keli na, eghuteuna eni kolho unha te doglo na.

²¹ Ihei te namha ghau iara na, mana ginauna dedei fara, eghuteuna mana ginauna au nogna kmana glepo ka sugagna na.

²² “Tifa na, Lord neke kulu vuavuha ghau iara, neke vuavuha nga gobigna nafnotu fateote'o gre.

²³ Funu tifa kani theome vuvuha nga teku Lord nauthoglu igne, mana neke vuavuha ghauhi iara neke kulu auhi.

²⁴ Kani theome aunga teku nhorora nei glokha khoꞌu teu igre. Iara neke kulu auhi.

^25-26 Ame vuavuha nga Lord thogele biꞌo, ba gukhu, ba glose, ba namono teu igre, iara neke kulu auhi.

²⁷ Iara neke kulu auhi balugna Lord ka narane teke lilisei mana maloa gne ka thofno vido mala augna na, eghuteuna mana lilisei vido aheva maloa gne nate tei thokeni nhorora na.

²⁸ Iara neke kulu auhi neke lilisei nga mana khoveo gne ka maloa na, eghuteuna neke tothora nga mana glokha khoꞌu teke au ke pari glose ra.

²⁹ Iara neke kulu auhi neke au nga nohi te mala mei snotogna thongna gne mala thosei haghe salaꞌuni vido aheva teke chekeni mana kani neke horo famaku nauthoglu igne ka mala augna na.

^30-31 Ka narane te edi Lord gloku igne, iara neke au balugna mana. Eghuteuna Lord neke vahi ghau iara mala toghoni ka nogna gloku na. Leuleghu narane na, God ne gleale'a fara, naugna iara ne au balugna mana. Iara thofno gleale'a fara te filoni nogna nauthoglu mana igne, nei jaola gleale'a fara ka nogna naikno mana re.”

³² “Goro sua, fanomho mei ka iara. Jame te leghudi ghotilo nogu cheke iara igre na, ghotilo ginauna na kelitami fara.

³³ Te mala lalase na, ghotilo fanomho ka nogu farirhiu iara igre. Jame te tiromi fanomho ghotilo na, ghotilo ginauna theome lalase.

³⁴ Mae ihei te fanomho ka iara na, mana mei ka nogu suga iara na mala farirhiuni iara. Eghuteuna ihei te au balugu iara na, mana ginauna gleale'a.

³⁵ Mae ihei te dei ghau iara na, mana ginauna hatini nakarha te keli na, eghuteuna Lord na kelitagna fara ka mana.

³⁶ Nu mae ihei te theome dei ghau iara na, mana goigoni ni kolho thegna, eghuteuna ihei te tirogna ghau iara na, mana magnahaghei fara te lehe na. Eghume igne ngala gaoghatho te keli nei doglo teuna.”