Proveb 31 - Buka Blahi Ka Cheke Holo

Nogna cheke King Lemuel

¹ Nogna famane cheke idogna King Lemuel, neke farirhiuni mana.

² Thuguo, iara teke fakarhi nigho na, eghuteuna iara thofno kelitagu fara. Iara neke toreni God eghuteuna mana neke tusu mei ka iara.

³ Iagho thosei nairu baludi goro gaꞌase are, naugna rehati tangomana te goigonidi mae biꞌo re.

⁴ Lemuel, theome doglo mae lida na te koꞌu te thaviru na, eghuteuna jame theome doglo mae biꞌo na te magnahaghei koꞌu beer fara na.

⁵ Glahu koꞌu mare theome ghathoni vetula na, eghuteuna mare ginauna na theome tangomana te toghodi naikno te kumare.

⁶ Beer nei waen teu igre maladi iheire te namo lehe, nei iheire te au diꞌanagnafa fara ka nakarhadi.

⁷ Lisa lao mala koꞌu mare mala tangomana mare ghatho ihodi nakarha te kuma, nei naꞌau diꞌanagnafa teu are.

⁸ Iagho mala cheke ranghidi iheire te theome tangomana te cheke fajifladi puhidi thedi re, eghuteuna iagho toghodi ka cheke. Eghuteuna iagho kegra heta ka fate te mala eni puhi te doglo na. Eghuteuna iagho toghodi naikno te kuma.

⁹ Kate gnokro ka kot na, iagho mala eni puhi te fadoglo na. Eghuteuna iagho toghodi naikno te kuma nei iheire te au ka nakarha te ninhigrana.

Puhigna gaꞌase te keli

¹⁰ Ninhigrana fara te khaeni iagho thofno gaꞌase te mala tolaghi tagna na. Nafnata gaꞌase igne famane fara salaꞌuni thina rubi.

¹¹ Khetogna gaꞌase igne ginauna ghatho tahuni naꞌa. Eghuteuna mana ginauna au nogna kmana glepo fara.

¹² Gaꞌase igne na toghoni fabrahu khetogna na, eghuteuna naꞌa theome goigonini khetogna na.

¹³ Leuleghu fata na naꞌa na rugusi fara, eghuteuna naꞌa na edi thua nafnata famane pohe te keli.

¹⁴ Leuleghu fata na naꞌa tei hiro gano eghuteuna hata mei ka suga na, naꞌa jateula vaka te hata kako te meira eghu.

¹⁵ Naꞌa tangomana te dofra haghe hamerane boibongi mala tarabana gano malagna tharaknagna na, eghuteuna nhaꞌa soru gloku ka nogna gaꞌase glokure.

¹⁶ Naꞌa hiro vido glose mala foli, eghuteuna tobi mala joꞌu grep tagna.

¹⁷ Naꞌa kaisei gaꞌase nheta, eghuteuna naꞌa loku heta fabrahu.

¹⁸ Naꞌa laseni fara te ei nogna bisnis na, eghuteuna kmana fata naꞌa loku bongiro.

¹⁹ Leuleghu fata na naꞌa susuki pohe.

²⁰ Naꞌa keli ranghidi iheire te kuma, nei toghodi naikno te au kokhonidi.

²¹ Ka vido te reka fara na naꞌa theome nanga nogna, naugna tharaknagna naꞌa na au nodi famane pohe.

²² Naꞌa horo famane pohe mala lalaoni ka sape, eghuteuna nogna pohe re famane pohe rija.

²³ Khetogna na, naiknore ghatho tahuni mana, eghuteuna mana mae biꞌo ka nodi namono na.

²⁴ Gaꞌase igne edi famane pohe, eghuteuna sabiri ka hatimare mae bisnis.

²⁵ Naiknore ghatho tahuni nei filo hagheni eghu naꞌa, eghuteuna naꞌa theome mhaghuni unha nate thoke mei ka nakarhagna na.

²⁶ Naꞌa chekedi koba cheke te keli nei cheke glalase teu te kelitadi keha naiknore, eghuteuna naiknore fatutuanidi nogna cheke naꞌa re.

²⁷ Leuleghu fata na naꞌa rugusi kolho, eghuteuna naꞌa reireghi fakelini tharaknagna na.

²⁸ Thugna re cheke gleale'a ka naꞌa, eghuteuna khetogna na jaola cheke faklignani naꞌa.

²⁹ Khetogna na cheke eghu ka naꞌa, “Kmana gaꞌase re keliu, nu iagho na thofno keli fara salaꞌudi reꞌe hui.”

³⁰ Keha gaꞌase re famane, nu chaichaghi kolho eghu. Keha gaꞌase re famane filodi re, nu katha vido kmoꞌei kolho eghuteuna hui. Nu gaꞌase te ghatho tahuni Lord na, nabagna te mala cheke fakelini na.

³¹ Naiknore mala ghatho tahuni nafnata gaꞌase te keli fara puhigna na igne. Eghuteuna nabadiu naiknore te ghatho tahuni eidi nogna gloku naꞌa re.