Proveb 30 - Buka Blahi Ka Cheke Holo

Nogna famane cheke mae Agua

¹ Igre nogna famane cheke mae Agua thugna mae Jake, teke cheke ranghidi mae Itiel ghe mae Ukal.

² Mana ne cheke eghu: “Iara theome jateula keha naikno are eghu, naugna iara theo kaisei glalase te keli ka phaꞌugu na.

³ Iara theome hatini kaisei gaoghatho te keli nei glalase eghu. Iara theome laseni God mae ihei te blahi tulao.

⁴ Ihei gne teke haghe kligna eghuteuna ke soru mei tekuna? Ihei gne teke louloku nuri na ka khamegna na? Ihei gne teke totoho nhorora na ka nogna pohe na? Ihei gne teke vuavuhani khukrugna nauthoglu igne? Ihei nanghagna mana na, ba nanghagna thugna mana na? Glahu laseni iagho!

⁵ “Chekegna God na thofno tutuani fara. Mana tangomana te bara fothidi iheire te mei hiro vido mala poru ka mana na.

⁶ Thosei tuthughu nogna cheke mana na, glahu diꞌatagna mana ka iagho, eghuteuna ke leghu na naiknore na laseni te kaisei mae chaichaghi iagho na.

⁷ “Lord, iara na ghusnadi phei glepo ka iagho. Tusu mei kani au ngau iara ka nauthoglu igne.

⁸ Glepo ulu lahu na, iara theome mala chaichaghi. Fapea glepo na, iara theome mala kuma fara ba dedei fara. Khogla tusu mei naba gano leuleghu narane.

⁹ Glahu dedei fara iara ghatho ihoni Lord. Glahu kuma fara iara blau glepo, eghuteuna famamajani nanghagna nogu God iara na.

¹⁰ “Thosei cheke fadiꞌa eigna mae gloku na ka nogna funei na, glahu mei mae gloku igne toreni God tibri nigho, eghuteuna iagho ginauna au papara eigna igne.

¹¹ “Keha maere cheke fadiꞌadi idodi kmadi re.

¹² Keha maere ne doglo eghu ka gaoghathodire, nu mare theome thofno snagla ka nakhibo.

¹³ Keha naiknore fahaehaghe fara, eghuteuna mare filo faparidi keha naiknore.

¹⁴ Keha naiknore jateula nasava eghu magnahaghei te ghamu fahuidi naikno te kumare.

^15-16 “Puhi khiri na au phei thugna gaꞌase. Nanghadire Tufa ghe Tufa. Aonu thilo glepo igre theome tangomana te chekeni, ‘La nabahi!’ Glepo igre: beku, gaꞌase te theo thugna, nei glose te khapra fara. Eghuteuna fafati glepo na, khaꞌaghi na theome tangomana te chekeni, ‘La nabahi!’

¹⁷ “Jame te tirou fanomho iagho ka idomu kmamure, eghuteuna cheke fadiꞌadi repa teuna, gaghata biꞌo ginauna mei biko fajifla phei tathamu iagho re, eghuteuna saroko ginauna ghamu thinimu iagho na.

^18-19 “Jare na thilo glepo te jaglo nogudi iara re, kaisei na, gaghata te flalo ka maloa, keha na, mogo te tagu ka glose, eghuteuna fatilo na, vaka te tei ke kligna thongna. Eghuteuna fafati glepo na iara theome laseni, igne puhigna mae nalhaꞌu te namhani gaꞌase na.

²⁰ “Igne puhigna gaꞌase tholaghi te eni puhi te diꞌa na, naꞌa tei thuru balugna kaisei mae ngau, naꞌa na ghamu nei dadalu eghu, aonu naꞌa na cheke eghu, ‘Iara theome eni kaisei najafra.’

^21-23 “Igre thilo glepo te fakheuni nauthoglu igne na: Kaisei mae gloku te kegra king, kaisei mae te fameomekro te dedei fara, eghuteuna gaꞌase igne theo kaisei nalhaꞌu te magnahagheini naꞌa, nu naꞌa tolaghi. Eghuteuna fafati glepo na thofno ninhigrana fara, gaꞌase gloku teke tughuni nogna nakrupe na.

²⁴ “Ka nauthoglu igne au fati nafnata glepo ikodi, nu reꞌe autadi famane gaoghatho te keli.

²⁵ Ulu lahu na, gnata, rehati theome nheta, nu rehati salofodu ghedi gano mala theome kmoꞌe gano ka nhigra nakhete.

²⁶ Fapea na, nakusi, rehati theome nheta, nu rehati horo nodi gnoku ka khora thina.

²⁷ Fatilo na, cheche, rehati theo nodi funei, nu kate flalo na rehati kaisei theidi jateula soldia eghu.

²⁸ Fafati na, garo, iagho tangomana te haboni, nu iagho jaola tangomana te filodi ka sugagna king.

^29-31 “Aonu thilo glepo igre te nolo tafri na ngala te glepo ulu ka mare na: Lion, naꞌa nheta fara theome mhaghuni kaisei glepo te tautagu. Khokorako nalhaꞌugna te nolo ke ulugna khokorako gaꞌasegna, nei nanigot nalhaꞌugna. Eghuteuna fafati na, king ne ghejeni fara kate nolo balu nogna armi na.

³² “Jame te leghuni iagho puhi fameomekro na, nei cheke fahaehaghe, ba iagho ghathoni puhi te mala eni puhi te diꞌa na, eghume iagho au kmu, thosei cheke.

³³ Jame te hata iagho milk ka buluka na te ngigno na, bata ginauna jifla mei. Jame te tuti iagho nehugna keha mae na, dadara ginauna jifla mei. Eghume jateula tuana eghu, jame te faꞌeiꞌei iagho te diꞌatadi naiknore na, magra ginauna jifla mei.”