Proveb 28 - Buka Blahi Ka Cheke Holo

¹ Naikno te diꞌa re tangomana te rikha na neubane theo kaisei mae te ngolhidire. Nu naikno te doglo na kegra heta jateula lion eghu.

² Kate magra farithedi naikno gna kaisei kantri, ginauna au kmana mae biꞌo, nu mae te autagna gaoghatho te keli nei lalase teuna ngala te mae biꞌo kantri na, mana ginauna eni kantri igne mala kegra heta.

³ Mae biꞌo te fakokhoanani naikno te kuma na, mana jateula nuri biꞌo te mei goigoni nagare ra eghu.

⁴ Iheire te huhughuni vetula na cheke fahaehagheni mae te diꞌa na, nu iheire te kelitadi ka vetula na, mare tirodini mae te diꞌa na.

⁵ Ihei te eni puhi te diꞌa na, theome laseni puhi te doglo na. Nu ihei te ghatho tahuni Lord na, thofno laseni puhi te doglo na.

⁶ Mae te kuma nu leghuni puhi te doglo na teuna, mana keli fara uluni mae dedei te leghuni puhi te diꞌa na.

⁷ Goro sua te leghudi unha te cheke ranghidire, mare au gaoghatho te keli fara. Nu sua te fofodu ka mae te diꞌa puhidire famamajadi idogna kmagna re.

⁸ Keha naiknore dedei fara ka puhi te diꞌa kate foli mare intres biꞌo ka kaoni. Nu dedei igne ginauna tei ka khamegna mae ihei te keli ranghidi iheire te kuma.

⁹ Jame iagho te theome fanomho ka unha te chekeni ka vetula na, Lord ginauna theome fanomho ka nou tharai iagho na.

¹⁰ Ihei te batuni naikno te doglo na te mala eni puhi te diꞌa na, mana ginauna khale ka phighoro teke eni thegna na. Nu ihei te theome eni kaisei najafra na ginauna atha glepo te keli ka khamegna God.

¹¹ Mae te dedei na ne mae glalase eghu ka gaoghathogna na, nu mae te kuma te autagna gaoghatho te keli na laseni puhigna mae te dedei igne.

¹² Kate funei mae te doglo na, naiknore kelitadi fara. Nu kate baubatu mae te diꞌa na, naiknore poruni mana.

¹³ Jame te pophoru iagho nakhibomure, iagho ginauna na theome au fakeli. Nu jame te cheke thakledi iagho nakhibomure, eghuteuna figri tagrudi iagho nakhibo igre teuna, God ginauna kokhoni nigho iagho.

¹⁴ Mae te ghatho tahuni Lord na, mana ginauna glealeꞌa fara. Nu ihei te patugama na ginauna thokeni puhi biꞌo.

¹⁵ Mae lida gna kantri te eni puhi te diꞌa na, eghuteuna tapla faparidi naikno te kumare teuna, mana jateula lion te rofo fara, ba jateula bosu mata te chari te mei ra eghu kolho.

¹⁶ Mae lida gna kantri te theo tagna kaisei gaoghatho te keli na, mana ginauna fakokhoanadi naiknore. Nu mae lida te theome hata nodi sileni naiknore, mana ginauna funei fabrahu.

¹⁷ Thosei toghoni ihei te nabagna te mala au papara na, naugna mana neke falehe naikno. Mana ginauna na theome au snoto ghilei lehe.

¹⁸ Ihei te leghuni puhi te doglo na, ginauna au fakeli. Nu ihei te leghuni puhi te diꞌa na, mana ginauna au papara.

¹⁹ Ihei te loku heta ka nagare na, ginauna au ghegna kmana gano. Nu ihei te theome eni kaisei gloku na, mana ginauna kuma fabrahu.

²⁰ Ihei te loku heta te mala ghosei te dedei na, God ginauna theome toghoni mana. Nu ihei te leghuni puhi te doglo na, God ginauna fablahini mana.

²¹ Theome doglo mae mala fate na te phile ka keha na, eghuteuna faparini keha na teu ka fate na. Nu kakatha vido gano kolho te mala famaemaheni mae fate igne.

²² Mae te loku famaku nogna glepore, mana tangomana te loku heta fara te mala ghosei te dedei na, mana theome laseni nate thono kuma fara ginauna.

²³ Jame te fadoglini iagho puhigna keha mae na, mana ginauna kelitagna fara ka iagho. Puhi igne thofno keli fara uluni puhi te cheke famaemahe na.

²⁴ Ihei te blau nodi glepo idogna kmagna re, eghuteuna cheke eghu teuna, “Iara theome eni kaisei puhi te diꞌa.” Mae igne jateula naikno aknu poru eghu.

²⁵ Mae te khiri fara na mala vuhai faripholai. Nu mae te rouronu ka Lord na ginauna au ka nakarha te keli.

²⁶ Mae te ronuni nogna gaoghatho thegna na, mana mae fameomekro kolho. Nu mae te rouronu ka gaoghatho te keli na ginauna au fakeli.

²⁷ Ihei te toghoni naikno te kuma na, ginauna na theome kmoꞌe ka kaisei glepo. Nu ihei te theome toghodi naikno te kuma na, mare ginauna cheke fadiꞌa ni mana.

²⁸ Kate baubatu mae lida te diꞌa na, naiknore ginauna poru. Nu kate lehe mae lida te diꞌa igre na, naikno te doglo nate ke lida na.