Proveb 17 - Buka Blahi Ka Cheke Holo

¹ Kakatha gano moja ka nakarha te muana na, thofno keli fara salaꞌuni kmana gano ka gaghamu ka nakarha te fodu ka fapholai.

² Mae gloku te autagna gaoghatho keli na ginauna funei fruni ni thugna mae funei te diꞌa puhigna. Eghuteuna kate lehe mae funei igne na, mae gloku igne ginauna hata kasa nogna glepo mae funei na.

³ Naikno na tangomana te fariuriudi gol ghe silva ka khaꞌaghi. Nu Lord na tangomana te fariuriuni thiꞌagna naikno na.

⁴ Mae te diꞌa na magnahaghei te fanomho ka cheke te diꞌa. Eghuteuna mae te chaichaghi na kelitagna te fanomho ka chaghi na.

⁵ Jame te cheke faparini iagho naikno te kuma na, iagho cheke faparini God mae ihei teke vuavuhani naikno na. Jame te gleale'a iagho ka puhi biꞌo te thokeni keha mae na, iagho ginauna au papara.

⁶ Kuꞌedi kavedire fahaehaghedi fara gradire, eghuteuna goro suare jaola kelitadi fara ka kmadi idodi.

⁷ Theome doglo te cheke fahaehaghe mae te fameomekro na. Eghuteuna theome doglo mae funei te cheke chaichaghi na.

⁸ Keha naiknore te ghathoni na te tufa sileni keha naiknore na mala atha unha glepo te magnahagheni mare na eghu. Mare te ghathoni na igne ginauna loku leuleghu fata.

⁹ Jame te hata fadelei iagho nakhibogna mae kheragna fofodu na, ghopa ginauna au fakeli. Nu jame teke tonuni iagho nakhibo na, iagho roꞌeni fofodu na.

¹⁰ Cheke faheta ka mae te au tagna gaoghatho te keli na ghosei tughu nakarhagna na. Nu naikno te fameomekro na neubane purini kaisei gobi fata, mana theome tangomana te tughu nakarha na.

¹¹ Glehe na mei jateula kaisei nonomho te diꞌa eghu ka mae te magnahaghei te faꞌeiꞌei puhi biꞌo koba na.

¹² Iagho mhaghuni idogna sua khuma te blau mare thugna na. Nu te keli na iagho mala mhaghuni tulao puhigna mae te fameomekro na.

¹³ Jame te foli fapulo iagho glepo te keli ka glepo te diꞌa na, glepo te diꞌa tuana ginauna au fabrahu ka tharaknamu iagho na.

¹⁴ Fufunu gna faripholai na jateula khoꞌu te jifla mei ka khora ikoi ka baket ra eghu, fakhusuni ame khora biꞌo nga baket na nei ame biꞌo nga magra na eghu.

¹⁵ Jame mae mala fate snakre fajiflani mae te diꞌa na, ba parani mae te keli na. Lord na tirognadi phei puhi igre.

¹⁶ Theome keli te foli skul fi ka mae te theome autagna gaoghatho te keli na, naugna mana ne tirogna hiohiro.

¹⁷ Kheramu iagho na namha nigho iagho fabrahu. Eghuteuna thabusimu na togho nigho ka vido te ninhigrana.

¹⁸ Mae te theome autagna glalase na, mana nhaꞌa cheke mala foli falehe nogna kaoni keha mae na.

¹⁹ Mae te magnahaghei fapholai na, mana magnahaghei nakhibo. Mae te magnahaghei cheke fahaehaghe na, mana magnahaghei puhi biꞌo.

²⁰ Ihei te fodu ka gaoghatho te diꞌa na, mana ginauna theome au fakeli. Eghuteuna ihei te cheke diꞌa fabrahu na ginauna khale ka puhi biꞌo.

²¹ Mae te fameomekro thugna na, diꞌanagnafa fabrahu. Kmagna mae te fameomekro na, theome gleale'a.

²² Nakarhagna mae te gleale'a na, thofno keli fara. Nakarhagna mae te diꞌanagnafa na, thono diꞌa fara.

²³ Mae fate te diꞌa na, hata unha te tusu poru tagna na, eghuteuna ka fate na mana ginauna goigonini mae te doglo na.

²⁴ Mae te lalase na, hironi gaoghatho te keli na. Nu mae te fameomekro na hiro thua nafnata gaoghatho heva heva.

²⁵ Sua te fameomekro na, mana fadiꞌa nagnafani fabrahu kmagna na. Eghuteuna fatanhini idogna teke fakarhini na.

²⁶ Theome doglo te parani ihei te theo nakhibogna na. Eghuteuna theome keli te purini mae te keli na.

²⁷ Mae te theome raꞌe cheke na, mana autagna gaoghatho te keli na. Mae te au kmu kolho na, mana lalase.

²⁸ Iagho laseni, neuba mana ne fameomekro, te ghathoni mare na mae igne autagna gaoghatho te keli nei glalase eghu jame te theome cheke mana na.