Proveb 1 - Buka Blahi Ka Cheke Holo

Famane cheke te mala togho ghita

¹ Nogna famane cheke mae Solomon king gna Israel, thugna king Devet.

² Famane cheke igre tusu ranghi ghita gaoghatho te keli, eghuteuna farirhiu ghita mala lasedi tahati unha te ninhigrana.

³ Cheke te au ka buka na igre ginauna farirhiu ghita mala leghuni tahati puhi te keli na, nei mala eni unha puhi te doglo na.

⁴ Jame ihei te au tagna katha vido glalase na, cheke igre ginauna toghoni mana mala hata gaoghatho te keli. Eghuteuna cheke igre ginauna tusu lao gaoghatho te keli ka naikno majaghani re mala batuni mare ka puhi te keli na.

⁵ Buka igne ginauna toghoni mae ihei te lalase fara mala biꞌo salaꞌui mana nogna glalase na. Eghuteuna mana ginauna farirhiudi iheire te au tadi gaoghatho te keli mala leghuni mare nabrou te keli na.

⁶ Te lase fakelidi tahati gaoghathodi famane cheke igre na, tahati ginauna tangomana te lasedi nogna cheke mae te lalase na.

⁷ Fufunu gna glalase na, iagho ghatho tahuni Lord. Nu naikno te fameomekro na tirogna fanomho nei leghuni eghu famane farirhiu na.

Cheke mala toghodi naikno majaghani

⁸ Thuguo, iagho mala fanomho ka nodi cheke idomu kmamu are, eghuteuna thosei thododi nodi farirhiu repa re.

⁹ Nodi farirhiu repa igre ginauna togho nigho iagho mala naikno keli, jateula te jukla famane sisi ka phaꞌumi nei babaꞌo famane khekeve te siasigla ka graramu ra eghu.

¹⁰ Thuguo, thosei leghudi nodi cheke famaemahe naikno te diꞌa are.

¹¹ Glahu cheke eghu mare ka iagho, “Iagho mei balumi ghehati! Tahati na ari poru ofou ke mata nabrou mala aknu falehedi naikno te keli are mala nenei nodadi.

¹² Neuba mare ne au fakeli neu gognaro gre, tahati ginauna koko sorudi lamna beku.

¹³ Tahati ginauna hata thua nafnotu glepo te keli mala fafodu noda suga te gnafa gre.

¹⁴ Iagho mei balumi ghehati, tahati ginauna tufa gobigna lepo teke blau tahati ra.”

¹⁵ Thuguo, au fadelei ka naikno tuare, iagho thosei tei baludi.

¹⁶ Naugna leuleghu fata na mare magnahagheni fara te mala eni puhi te diꞌa na. Eghuteuna thiꞌadire kaikaliti mala falehe naikno.

¹⁷ Thono fameomekro fara jame te horo iagho phighoro na kate filo teu nanghaji na.

¹⁸ Nafnata naikno igre horo phighoro mala falehedi thedi kolho.

¹⁹ Mae te magnahaghei hata nogna kmana glepo thegna ka puhi te diꞌa na, nafnata mae igne ginauna khale kau glehe.

Ghotilo thosei thodoni gaoghatho te keli na

²⁰ Gaoghatho te keli nei doglo teuna jateula kaisei gaꞌase te kegra ka nabrou, ba ka maket te eha ka naiknora eghu.

²¹ Naꞌa jaola kegra ka grengatha gna namono na, ba ka vido aheva te au kmana naikno tagna na, naꞌa ne eha eghu ka mare:

²² “Ghotilo iheire te theome au tami gaoghatho te keli ra, ghotilo magnahaghei te au jateula tuana eghu fabrahu? Ghotilo jateula naikno te fameomekro eghu. Ghotilo theome magnahaghei te hata glalase te keli, eghuteuna ghotilo cheke fahaehaghe tagna. Niha nau koko nga ghotilo puhi igne?

²³ Ghotilo mala leghudi nogu cheke iara igre, eghuteuna iara ginauna farirhiu ghami ghotilo mala lase fakelidi nogu cheke iara igre.

²⁴ Iara kilo ghami ghotilo fabrahu mala mei ka iara, nu ghotilo tiromi mei.

²⁵ Ghotilo figri tagrudi nogu famane cheke iara igre, eghuteuna ghotilo thufu fara kate magnahaghei fadogli ghami iara na.

²⁶ Eghume, iara ginauna jaola eni nafnata puhi igne ka ghotilo. Kate thoke mei puhi biꞌo ka ghotilo na, iara ginauna maꞌe, nei cheke fahaehaghe eghu ka ghotilo.

²⁷ Narane diꞌa ginauna thoke ghami ghotilo jateula khoburu biꞌo eghu, eghuteuna puhi biꞌo nei khabru eghu ginauna goigoni ghami ghotilo jateula seseuru eghu.

²⁸ “Ka narane igne ghotilo ginauna kilo ghau iara mala togho ghami, nu iara ginauna na theome mei. Eghuteuna ghotilo ginauna fariuriu mala deni ghau iara, nu ghotilo ginauna theome filo ghau iara.

²⁹ Ghotilo tiromi hata glalase te keli, nei tiromi ghatho tahuni Lord.

³⁰ Kate magnahaghe fadogli ghami ghotilo teu iara na, ghotilo tiromi fanomho ka nogu farirhiu iara re.

³¹ Eghume, ghotilo ginauna hata taba te diꞌa eidi puhi te diꞌa te edi ghotilo ra.

³² Iheire te theome au tadi gaoghatho te keli na ginauna lehe, naugna mare ne figri tagru ghau iara. Eghuteuna naikno te fameomekro re ginauna lehe naugna ne tirodini puhi te doglo na.

³³ Nu iheire te fanomho ka iara re, mare ginauna au fakeli nodi fabrahu. Uve, mare ginauna theome mhaghuni kaisei glepo.”