Profet Jeremaea 8 - Buka Blahi Ka Cheke Holo

¹ “ ‘Lord ne cheke eghu: Ka narane igne hatimare mae naokare ginauna tei ka bekudi naikno te lehere mala atha fajifla nhubradi hatimare mae king nei hatimare mae biꞌo, nei hatimare mae pris, nei hatimare mae profet, nei keha naiknodi Jerusalem.

² Eghuteuna mare ginauna atha nhubra te magnahaghedi fara naiknore mala raba tafri ke kligna glose, ba ke pari naprai, glaba nei nathunu. Tifa na, mare tuturupuku soru toredi nhubra igre mala toghodi. Nu nhubra igre ginauna jateula chara eghu ke kligna glose. Eghuteuna theo kaisei naikno nate salo nhubra igre te mala giugilui na.

³ Eghuteuna ihei te au faleghu ka naiknodi Juda te diꞌa igre, iara ginauna brue fajifladi ka kantri igne mala tei au ka keha vido delei. Mare gaoghathodi na mare jame nabadi na mala lehe kolho. Igne chekegna Lord mae ihei te au nolaghi fateote'o!’

Hatimare mae Juda theome mamajadi nakhibodire

⁴ “Lord ne cheke eghu, ‘Jeremaea, iagho tei toutonu cheke igne ka naiknore, Iara Lord te chekeni igne. “ ‘Jame ihei te uka na, mana tangomana teke kegra haghe na. Eghuteuna jame ihei te snivi na, mana tangomana teke figri teke deni nabrou na.

⁵ Nu ghotilo naikno te au ka namono Jerusalem, ghotilo tei koko ghau iara, ghotilo tiromi teke figri mei ka iara na. Ghotilo fatutuanidi nomi chaichaghi themire neke tiromi pulo mei ka iara.

⁶ Leuleghu fata na iara fanomho fakeli koba ka ghotilo, nu ghotilo theome chekeni kaisei cheke te tutuani. Theo kaisei ka ghotilo te tughu puhigna te diꞌa na. Ghotilo te gnafa na jateula hose te chari umhu te tei ka magra ra eghu leghuni fabrahu kolho puhi te diꞌa na.

⁷ Nanghaji te biꞌo ka maloa na are laseni narane ka finogha na, eghuteuna balhu nei keha nanghaji te ikodi teu igre jaola laseni nhigra te rifu na flalo tei delei. Nu ghotilo nogu naikno iara igre theome lasedi nogu vetula iara Lord teke tusu ari ka ghotilo ra.

⁸ “ ‘Theome doglo te cheke eghu ghotilo na, “Ghehati lalase, naugna ghehati laseni fara nogna vetula Lord na.” Filo si ghotilo! Neubane mae velepuhidi vetula igre, mare chaichaghi kolho ke tuthughu nogna vetula God na.

⁹ Nomi mae glalase ghotilo re ginauna mamaja nodi fara na theome leghuni nodi nabrou te doglo na, naugna mare la tirodinihi chekegna Lord na. Nodi glalase mare igne theome keli na theome toghodi mare.

¹⁰ Eghume, iara ginauna na snakre lao khetodi mae igre ka keha mae delei, eghuteuna nodi vido glose mae igre nake snakre lao ka keha naiknoi mala ke khotodi. Neuba ihei ne fnakno ba theo, mare na kaisei nanaba ngala. Mare te gnafa na kafe magnahaghei sileni fara. Uve, neubane mae profet ba pris, mare jaola chaichaghidi naiknore.

¹¹ Ghotilo nogu naikno iara igre jateula te au thubu biꞌo ka thinimi ra eghu, nu hatimare mae profet nei mae pris teu igre filoni thubu igne jateula glepo ikoi eghu kolho ka gaoghathodi na, cheke eghu, “Thosei nanga nomi. Tahati au fakeliu kolho.” Nu ghotilo theome au fakeli kolho.

¹² Ba, mare mamaja nodi fara te edi puhi te diꞌa tuare? Theo fara. Mare theome mamaja nodi kolho nafnata puhi igne. Naugna igne, iara ginauna goigoni fahuidi mae igre mala kafe lehe mare jateula mae iheire tela lehehi ra eghu. Igne nogu cheke iara Lord.

¹³ “ ‘Lord ne cheke eghu, “Te chekeni iara na, iara ginauna atha nodi glepo te keli mae igre. Nodi grep nei fig teu mare igre ginauna theo fuꞌadi, eghuteuna khakladi gaju igre ginauna gnhagha soru. Gobigna lepo teke tufa iara ka mare ra, iara ginauna nake atha fapulo mala theo nafudi kolho mare.” ’ ”

¹⁴ Nogna naikno God te au Juda igre ginauna cheke eghu, “Naugna unha site fiti gnokro teu kolho tahati gnea? Mei ghotilo, mala rikha tei tahati ka namono te bara te lithui mare ka thina are mala lehe jare. Noda Lord God la fate ghitahi te mala lehe tahati na. Mana jateula te famei pophoji raha te mala koꞌu tahati ra eghu, naugna tahati ne tapla jafra ka nakhibo.

¹⁵ Tahati magnahaghei te au ka pharikeli kolho, nu theo kaisei glepo te keli kolho te eni tahati na. Tahati magnahaghei te thoke mei narane te mala ghaota noda ka khabru na, nu mae naoka kolho te mei te famamhagu ghita na.

¹⁶ Noda naoka tahati igre la thoke mei funudi ke mosu namono biꞌo Dan. Tahati nomhi laodi naogladi nodi hose mala magra re. Hose igre ku'e fabiꞌo, eghuteuna glose na nghali, eigna armi biꞌo igne tarabana mala magra ka hose. Noda naoka tahati igre la ruma meihi ka noda vido tahati igne. Mare na mei goigoni noda glose tahati igne baludi gobigna lepo te au ke lamnagna, nei mala goigoni noda namono biꞌo tahati igne baludi naikno te au ke lamnagna.”

¹⁷ Lord ne cheke eghu, “Fanomho ghotilo ia! Iara ginauna na kuru mei mogo faghughumhu ka ghotilo mala kathi ghami ghotilo. Eghuteuna ghotilo ginauna na theo kaisei nabrou nate eni ghotilo ka mogo igre te mala rikha ghami na. Thono theo tutuani fara.” Igne chekegna Lord.

Profet Jeremaea ne diꞌanagnafadi nogna naiknore

¹⁸ Mae profet ne cheke eghu, “Iara diꞌanagnafagu fara la ghilei thofno glaꞌe soru gaoghathogu na.

¹⁹ Iara nomhidi nogu naiknore la tanhi eghu fabiꞌo, ‘Jame Lord na theome king ka Thogele Saion. Naugna unha si mana te theome togho ghita tahati gnea?’ ” Nu Lord ne cheke eghu, “Naugna unha si ghotilo nogu naikno iara gre te pogho soru te tarai ka nodi god keha kantri delei igrea? “Iara diꞌatagu fara ka nafnata puhi te pogho soru te tarai ghotilo ka god nate theome togho ghami ghotilo igre.”

²⁰ Naiknore ne eha eghu fabiꞌo, “Narane te mala dokha gano ka nagare na la salaꞌuhi, eghuteuna narane te mala salo fuꞌa gaju na la gnafahi. Nu God na theome fakarhi ghita.”

²¹ Iara mae Jeremaea, iara thofno diꞌanagnafagu fara, naugna nogu naikno iara igre la kokhonidi fara. Iara thofno diꞌanagnafagu fara la tanhi la ghilei glaꞌe soru gaoghathogu na.

²² Kmana meresin au ka nohi Gilead, eghuteuna mae dokta aula jare. Eghume, naugna unha si nogu naikno iara igre te theome keli grea?