Profet Jeremaea 6 - Buka Blahi Ka Cheke Holo

Lordne cheke faheta ka naikno te au ka namono Jerusalem

¹ Lord ne cheke eghu, “Ghotilo vikegna mae Benjamin ra, ghotilo jifla Jerusalem rikha tei poru! Ghotilo te au ka namono Tekoa mala kufli. Ghotilo te au ka namono biꞌo Bet-Hakerem, ghotilo ifu khaꞌaghi ka thogele ke leghu namono biꞌo, mala laseni naiknore tela meihi mae naokare. Puhi biꞌo igne na jifla mei ke raru mala mei goigoni ghami ghotilo.

² Tutuani, Jerusalem gne kaisei famane namono fara, jateula kaisei famane gaꞌase eghu, nu iara ginauna mei goigoni namono igne.

³ Nodi king mae naoka igre ginauna mei balu nogna mae soldia mala magra ka namono igne. Mae igre kmana fara jateula mae mala reireghi sipu nei tothoghei sipu te mei ghamu tafri gobigna te magnahaghedi ra eghu. Eghuteuna mae igre ginauna lilisei haghe nodi suga tapualere ka vido aheva te magnahagheni mare na.”

⁴ “Mae igre ginauna cheke eghu, Tahati tarabana mala magra! Tore, te keli na tahati tei magra kani naraneu. Nu fameomekro! Naprai gne la funu soruhi la namo romnohi.

⁵ Eghume, tahati na tei magra bongiro, eghuteuna tahati ginauna goigonidi nodi bara mare te rheta are.”

⁶ Lord mae ihei te au nolaghi fateote'o igne ne cheke eghu, “Ghotilo mae soldia ra kato soru gaju te au rhegna namono Jerusalem mala tothoghei balu thina nei glose eghu mala bligi mare te kegra te ruma lamna namono na. Ghotilo goigoni namono tuana, naugna naiknogna namono tuana ne faparidi fabrahu keha naiknore.

⁷ Puhidi naikno te diꞌa igre jateula glokha khoꞌu te loloro fabrahu ra eghu kolho. Leuleghu fata na iara nomhidi mae igre magra koba ka namono biꞌo igne goigonidi fara gobigna lepore. Namono igne jateula mae ihei te fogra fara nei jaola au kmana nafnera ka thinigna na teu ra eghu.

⁸ Ghotilo naiknomi Jerusalem! Ghotilo fanomho mei ka nogu cheke iara igne! Na eghunu tei koko ghami iara eghu, eghuteuna nomi namono ghotilo igne ginauna krogha jateula namono nagou ra eghu na theo kaisei naikno te au tagna na.”

⁹ Lord mae ihei te au nolaghi fateote'o igne ne cheke eghu, “Iara ginauna snakredi mae naokare mala atha fadelei naikno te gnafa ka kantri Israel, jateula mae ihei te atha fadelei sisi te gnafa ka gaju grep ra eghu. Mana ginauna na fapea fata filo fakeli glahula au meu keha sisi.”

¹⁰ Nu iara na cheke eghu, “Lord, ka ihei nate toutonuni iara na? Eghuteuna ihei nate fanomho ka chekegu iara na? Iara neke toutonuhi ka mare, nu mare tirodi fanomho neke fofotho khulidire. Mare jateula mae bongihehera eghu tirodi nomhini kaisei cheke te mei funu ka iagho na.

¹¹ Iara gognarona jaola diꞌatagu fara ka mare, jateula teke diꞌatamu iagho, Lord, ka mare ra eghu. Eghume, iara theome tangomana te loku famaku ka nagnafagu na diꞌatagu igne.” Aonu Lord ne cheke eghu ka iara, “Iagho atha tei diꞌatagu iara igne mala toatofa ke klignadi goro sua te nolo tafri ka nabrou are, ba ka goro mae majaghani te khapru fodu teu, ba ka goro mae biꞌo nei khetodi, ba goro naikno biꞌo teu are mala kafe haimini te diꞌatagu iara na.

¹² Iara ginauna paradi naiknogna kantri igne, eghuteuna iara ginauna snakre lao nodi suga, nodi nagare nei khetodi teu mae igre ka hatimare mae naoka.

¹³ Iheire te fnakno ba iheire te theome fnakno, mae igre kafe edi thua nafnata puhi te diꞌare mala atha nodi kmana sileni ka naiknore. Uve, neubane mae pris ba mae profet, mare chaichaghidi fara naiknore.

¹⁴ Ghotilo nogu naikno iara igre jateula te au thubu biꞌo ra eghu. Eghuteuna hatimare mae pris nei hatimare mae profet teu igre mare filoni thubu igne, nu mare ne jateula glepo te ikoi kolho neu ne cheke eghu ka naiknore, ‘Ghotilo thosei nanga nomi. Tahati keliu kolho.’ Nu theo eghu, mare theome au fakeli.

¹⁵ Ba, mae Israel gre mamajadi si puhi te diꞌa te edi mare igrea? Thono theo fara! Mare theome laseni te mamaja na. Naugna igne, iara ginauna paradi naikno igre eidi puhi te diꞌa te edi mare igre, eghuteuna mare ginauna na kafe lehe, jateula iheire tela lehehi tifara eghu.” Igne chekegna Lord.

Naiknodi Israel tirodi leghuniLord

¹⁶ Lord ne cheke eghu ka nogna naiknore, “Ghotilo ghaoghatho fakeli mala laseni nabrou aheva nate leghuni ghotilo na. Ghotilo mala filoni famane nabrou teke leghuni mae kuꞌeda tifa ra. Eghuteuna ghotilo mala jaola leghuni nabrou igne. Jame te eni ghotilo igne na, ghotilo ginauna na au fakeli nei na au ka pharikeli ka nakarhami na.” Nu ghotilo tiromi neke cheke eghu, “Theo! Ghehati theome magnahaghei te leghuni nabrou te keli igne!

¹⁷ Iara neke lilisei mae greireghi mala togho ghami ghotilo, neke cheke eghu ka ghotilo, ‘Ghotilo fanomho fakeli kate kufli mae greireghi igre.’ Nu ghotilo neke cheke eghu, ‘Ghehati theome tangomana te fanomho ka nodi cheke mae greireghi igre na.’ ”

¹⁸ Aonu Lord ne cheke eghu, “Ghotilo naikno ka keha kantri ra fanomho mei. Iara ginauna na chekedi unha nate thokedi nogu naikno iara igre.

¹⁹ Ghotilo naikno te gnafa ka nauthoglu ignera, famane fanomho mei! Kaisei puhi biꞌo ginauna thokedi nogu naikno iara igre, naugna mare ne leghuni fabrahu puhi te diꞌa na. Mare theome fanomho ka nogu cheke iara re, nei tirodi leghudi nogu vetula iara re.

²⁰ Ghotilo nogu naikno iara ra! Neuba ghotilo ne gahu insens te famane sisiri keligna teke tei atha ghotilo ka kantri Seba, ba keha nafnata insens teke tei atha mei ghotilo ka vido te khaba. Nu iara ginauna na theome magnahaghedi glepo igre. Iara jaola theome magnahaghedi keha nafnata fafara te tusu mei ghotilo ka iara igre.”

²¹ Naugna igne, Lord ne cheke eghu, “Iara ginauna lilisei kaisei glepo biꞌo ka nabrou na mala nogra mare. Mae kmadi baludi thudire ginauna kafe totokhei uka. Eghuteuna naikno te gnafare ginauna kafe lehe.”

Hatimare mae naoka ginau jifla mei ke raru

²² Lord ne cheke eghu, “Filo ghotilo ia, kaisei armi biꞌo ginauna jifla mei funugna kate khaba ke raru! Nu gognarona mare tarabanahi nodi glepo mala magrare.

²³ Mae igre theome kokhoni ni ihei, nu mare magnahagheini fara te goigonini ihei. Mare atha phaloho nei goru. Kate chari te mei na, naogladi nodi hosere mae igre ginauna mei jateula naogla galo te poha ka khalaꞌera eghu. Jerusalem! Gognarona mare tarabana mala magra ka ghotilo.”

²⁴ Ghotilo naiknomi Jerusalem ginauna cheke eghu, “Tahati nomho thoutonu eidi mare, eghuteuna tahati la mhaghu noda fara la ghilei glaꞌe soru thinidare. Diꞌa nagnafa igne kabru ka nagnafada gre jateula gaꞌase te karha sua ra eghu.

²⁵ Tahati theome tangomana te jifla kosi na, ba te tei ka nabrou na, naugna mae naoka igre la tarabanahi te mala falehe ghita na. Uve, kmana glepo fara te au falithui ghita te mhaghudi tahati re.”

²⁶ Aonu Lord ne cheke eghu, “Ghotilo nogu naikno iara ra, ghotilo pipichi ka pohe thona, eghuteuna ghotilo thuru pepele pari ke kligna nakrofu, fagaglanagna te diꞌanagnafa ghotilo na. Ghotilo tanhi fabiꞌo, jateula repa tolaghi te lehe thudi na ia eghu. Ghotilo tanhi balu diꞌanagnafa, naugna mae naoka te mala mei goigoni ghami ghotilo igre ginauna ghosei mei magri ghami ghotilo.”

²⁷ Lord ne cheke eghu ka iara, “Jeremaea, iara neke vahi nigho iagho mala jateula mae ihei te gahu silva ka khaꞌaghi te mala khoko thonagna na ia eghu. Iagho fariu riudi nogu naikno iara igre mala laseni puhi te keli ba diꞌa.

²⁸ Mae igre thono faꞌiho fara phaꞌudire. Uve, phaꞌudire maku fara jateula bras ba aean eghu, eghuteuna mare tirodi fara te leghudi nogu cheke iara re. Mare te gnafa na la thono diꞌa farahi, eghuteuna mare tei tafri koba mala cheke fadiꞌani keha mae na.

²⁹ Mare la vuhai charahi, jateula chara silva eghu. Neuba iara ne eꞌei khaꞌaghi mala khoko chara igne neu, nu chara igne theome tangomana te khoko na. Uve, naikno igre theome gnafa te eni puhi te diꞌa na.

³⁰ Naugna mae igre jateula chara silva eghu kolho, iara Lord la figri tagrudihi naikno te diꞌa igre.”