Profet Jeremaea 5 - Buka Blahi Ka Cheke Holo

Naiknodi Jerusalem ne figri tagruniLord

¹ Lord ne cheke eghu, “Ghotilo chari tafri ka nabrou biꞌo nei ka glalaba te gnafa ka namono biꞌo Jerusalem. Jame te filoni ghotilo kaisei mae te lase cheke tutuani nei eni unha puhi te doglo teuna, iara ginauna atha fadelei nakhibomi ghotilore.

² Kate eni ghotilo kaisei nhaꞌa cheke na, ghotilo cheke tutuani kligna ka nanghagu iara Lord. Nu ghotilo chaichaghi nei tharuma'ei cheke eghu kolho.”

³ Lord, iagho magnahaghedi iheire te cheke kate tutuani koba. Neuba iagho ne paradi, nu mare theome haimini te kabru ghedi na. Neuba iagho ne goigonidi, nu mare theome snakre nigho iagho te mala fadoglidire. Phaꞌudire maku fara jateula thina eghu. Eghuteuna mare thono tirodi te tughu nagnafa na.

⁴ Igne unha te ghathoni iara na, naikno igre kuma fara tutuani. Mare theome laseni puhigna Lord te doglo na, eghuteuna mare jaola theome laseni nogna vetula mana na.

⁵ Eghume, iara ginauna tei filodi nodi lida mae igre mala toutonu baludi. Jau mare tangomana te lase fakelidi nogna puhi te doglo nei nogna vetula teu mana re. Nu gaoghathodi mae lida te gnafa igre kaisei nanaba kolho te mala tirodi leghuni nogna vetula Lord na, eghuteuna mare leghudi kolho nodi puhi thedi te diꞌare.

⁶ Naugna igne, Lord ginauna paradi mae igre. Mana ginauna na jateula kaisei lion te jifla mei funu mata ra eghu mei falehedi mare. Eghuteuna kaisei khuma mata ginauna mei funu ka namono nagou mala mei goigonidi mare. Kaisei khurau biꞌo ginauna ofou rhedi namono biꞌo igre malagna ihei te jifla mei ka namono tuana mala kina sasakani theo tokagna. Uve, Lord ginauna paradi mare, naugna nakhibodire kmana fara, eghuteuna kmana fata mare tei kokoni Lord.

⁷ Lord ne cheke eghu ka iheire te au ka namono Jerusalem, “Iara theome tangomana te atha fadelei nakhibomi ghotilore. Naugna ghotilo ne tiromi figri mei ka iara, eghuteuna ghotilo ne leghuni mumuju god te theo kaisei nakarha tagna igne. Neuba iara ne tusu ari gobigna lepo te magnahaghedi ghotilore, nu ghotilo jateula mae te huhughuni puhigna tholaghi na te tei ka sugagna thau vine na ia neu ne theome au balugu iara.

⁸ Ghotilo jateula hose nalhaꞌugna te magnahaghei apla ka hose gaꞌasegna na ia neu ne magnahagheni khetogna mae kherami fofodu na.

⁹ Ba, na theome para ghami iara edi glepo te diꞌa tuare neu si ghotilo ia? Theo, iara ginauna paradi fara nafnata naikno te jateula ghotilo teu igre.

¹⁰ “Iara cheke ranghi ghami ghotilo mae naokara te mala haghe goigonidi nodi nagare grep naikno igre. Nu thosei goigoni fahui eghu. Kato koko gregedi gaju grep te gnafa are, naugna grege tuare theome nogu iara.

¹¹ Naiknodi phei kantri Juda ghe Israel igre figri thagru ghau iara.”

¹² Naiknodi Israel igre mare cheke chaichaghi eigu iara Lord. Mare ne cheke eghu, “Lord ginauna na theome para ghita tahati, eigna theo kaisei puhi biꞌo nate thoke ghita na. Hatimare mae naokare na theome mei magra ka tahati, eghuteuna narane behu na ginauna theome mei thoke ghita.

¹³ Mae profet igre chaichaghi kolho, eghuteuna mare theome laseni chekegna Lord na. Eghume unha te chekedi mare igre ginauna thoke mei ka mare thedi.” Igne chekegna Lord.

¹⁴ Naugna igne, Lord God mae ihei te au nolaghi fateote'o igne ne cheke eghu, “Jeremaea, cheke te tusu ari iara ka iagho igre ginauna na jateula khaꞌaghi eghu. Eghuteuna naiknore ginauna na jateula chara te nhako ka khaꞌaghira eghu.

¹⁵ Iara Lord, iara na cheke ranghi ghami ghotilo naiknomi Israel. Iara ginauna atha mei naiknodi keha kantri delei are mala magra ka ghotilo. Naikno igre neke au funu tifa ka nomi kantri ghotilo igne, nu ghotilo neke theome nomhini nodi cheke mare na.

¹⁶ Nodi soldia mae igre thono rheta fara nei lalase eghu, eghuteuna mae igre laseni fara te fada falehe naikno ka phaloho na.

¹⁷ Mare ginauna atha fahui ghemi gano ghotilo te au ka nomi nagare nei ka nomi suga teu are. Eghuteuna mare ginauna na falelehe thumi nei nomi sipu nei nomi buluka teu ghotilo are. Eghuteuna mare ginauna goigonidi nomi gaju grep nei gaju fig teu ghotilo are. Uve, mae igre ginauna goigonidi fara nomi namono biꞌo ghotilo teke bara te maku ka thina igne.”

¹⁸ Nu Lord ne cheke eghu ka iara, “Kate mei mae naoka igre, iara ginauna na theome kafe goigoni ghami ghotilo hui.

¹⁹ Naiknore na ghusna eghu ka iagho, ‘Naugna unha si Lord te eni ka tahati glepo ignea?’ Iagho ginauna cheke eghu ranghidi, ‘Naugna ghotilo ne figri tagruni mana, eghuteuna ghotilo neke ghatho tahudi nodi god keha vikei. Eghume, ghotilo ginauna na tei au ka nodi vido glose keha vikei mala au ke paridi naikno tuare.’ ”

Lordne cheke faheta ka nogna naiknore

²⁰ “Lord ne cheke eghu ka mae Jeremaea, Jeremaea, iagho tei toutonuni nonomho igne ka vikegna mae Jekop te au ka kantri Juda.

²¹ Ghotilo fanomho fakeli ka nogu cheke iara igne! Ghotilo iheire te fameomekro nei theome laseni kaisei glepo teura. Ghotilo iheire te filo, nu theome filo glani kaisei glepo teura. Ghotilo iheire te fanomho, nu theome nomhi fakelini kaisei glepo teura.

²² Iara neke lilisei nusu mala fofotagna vido aheva te mala mei snoto thongna na. Neuba thongna na ne maraghata ba ne diꞌa rane, nu thongna na theome tangomana te mei salaꞌuni vido teke fofota mana igne. Naugna unha site theome mhaghu ghau iara nei theome mei bobolo teu ghotilo ke ulugu iara gnea?

²³ Tore, phaꞌumi ghotilore maku jateula thina eghu, eghuteuna leuleghu fata na ghotilo theome keli tami ka iara. Ghotilo theome magnahaghei ghau iara nei tei koko ghau iara.

²⁴ Iara kuru mei nakhete ka narane te mala joꞌu nei ka narane te mala karha gano nei narane te mala ghano nagare teu ghotilo ka finogha igre. Nu ghotilo theome ghatho tahu ghau iara God, nomi Lord.

²⁵ Nu neuba ghotilo ne edi kmana nafnata najafra nei nakhibo neu, puhi te edi ghotilo igre fanogra ghami themi te mala athini glepo te keli na.

²⁶ “Keha mae ka ghotilo ofo naikno koba ka geri nabrou mala eni puhi te diꞌa na. Mae igre jateula mae ihei te ofo nanghaji te mala fakhale ka nogna fangna ra eghu theome keli puhidire.

²⁷ Mare jateula kharaꞌo te fodu ka nanghajira eghu fodu nodi suga mae te diꞌa igre ka glepo teke atha mare ka puhi te chaghidi naiknore. Ka puhi igne mare dedei fara nei au nodi nolaghi biꞌo eghu.

²⁸ Leuleghu fata na mare ima gano te keli, mare boho biꞌo thiꞌadire. Mare theome gnafa te eni puhi te diꞌa na, ba puhi te fameomekro na ka goro sua te glehe kokoi. Eghuteuna kate thokedi puhi biꞌo naikno te kuma igre, mare tirodi toghodi nafnata naikno igre.

²⁹ Ba, na theome para ghami iara eidi glepo te diꞌa igre neu si ghotilo ia? Theo, iara na theome kokhonidi nafnata naikno jateula ghotilo teu igre. Theo fara.

³⁰ “Glepo te thono diꞌa fara pari lahu la thoke meihi ka kantri igne.

³¹ Kate toutonu na, mae profet igre chaghidi naiknore. Hatimare mae pris jaola eni kolho unha te magnahagheni thedi na. Eghuteuna ghotilo nogu naikno iara gre thono magnahagheni fara puhi te eni mare igne. Nu iara ginauna fakokhoana ghami ghotilo, eghuteuna puhimi ghotilo te diꞌa igne ginauna hui. Eghuteuna ka narane igre unha nate eni ghotilo na?”