Profet Jeremaea 47 - Buka Blahi Ka Cheke Holo

Nogna chekeLordeigna Filistia

¹ Lord neke tusu lao cheke igre ka profet Jeremaea eigna kantri Filistia ame mei magra nga king gna Ijep ka namono biꞌo Gasa.

² Lord ne cheke eghu, “Filo sagho! Naoka na ginauna thugha mei ke raru jateula kaisei nabritha biꞌo eghu. Mare ginauna kafe thugha mei thafru kantri igne baludi naikno te au ke lamnadi namono igre. Naiknore ginauna eha fabiꞌo mala toghodi, eghuteuna iheire te au ka kantri igne ginauna tanhi fabiꞌo,

³ naugna mare ne nomhidi naogladi hose nei chariot. Kate rikha na, kmadire na glaꞌe fara ka magra, naugna igne mare theome tangomana nate toghodi thudire.

⁴ Narane te mala goigonidi naiknodi Filistia igne la thoke meihi. Uve, Lord ginauna falehedi naiknodi Filistia, iheire teke jifla mei ka moumolu Krit tifa ra. Mana ginauna eni igne mala theome tangomana mare te toghodi phei namono Taea ghe Saedon jare Fonisia.

⁵ Naikno te au ka namono Gasa igre ginauna ghoighori phaꞌudire fagaglana eigna nodi diꞌanagnafa nei natanhi. Naikno te au ka namono Askelon igre ginauna au kmu kolho, naugna mare theome tangomana te cheke na. Ghotilo maemi Filistia te karha nga teura! Niha fata vahe fabrahu thinimi are si ghotilo ia, fagaglana nomi diꞌanagnafa na?

⁶ “Ghotilo tanhi cheke eghu fabrahu, ‘Lord! Nou naflahi mala magra iagho igne falehe ghami ghehati fabrahu ghilei tei gnafa niha nau? Ke lilisei fapulo sagho ka pipiha gna na mala thosei falehe ghami.’

⁷ Nu faꞌunha eghu ame gnafa nga naflahi igne? Nu iara Lord neke tusu ranghini gloku igne ka nogu naflahi na. Eghume naflahi igne na theome gnafa nogna gloku te mala falehedi naiknodi Askelon baludi keha naikno te au ka gratha ke raru.”