Profet Jeremaea 44 - Buka Blahi Ka Cheke Holo

Nogna chekeLordranghidi naikno di Juda te au Ijep

¹ Lord neke tusu lao nogna cheke na ka mae Jeremaea, mala cheke mana ka naikno di Juda te au Ijep. Keha ka naikno igre mare tei au ke raru Ijep ka thilo namono Migdol, Tapanes nei Memfis, eghuteuna kehare tei au ka nohi Patros ke mata Ijep.

² Aonu profet ne cheke eghu, “Lord mae ihei te au nolaghi fateote'o nei nodi God maedi Israel teu igne, mana ne cheke eghu, Ghotilo filonihi puhi biꞌo te snakreni iara te thokeni Jerusalem nei ka keha nomi namono ghotilo ra. Gognarona, theo kaisei naikno te au ka namono, nei ka suga teu ra, eghuteuna gringni thina biꞌo ia la thono diꞌa farahi,

³ naugna naiknore ne leghuni fabrahu puhi te diꞌa na. Iara diꞌatagu fara naugna mare ne gahu insens ka mumuju. Neuba mare baludi kuꞌedi teu tifa ra theome lasedi mumuju te pogho soru mare tadi igre.

⁴ Leuleghu fata na iara kurudi koba hatimare mae profet nogu mae gloku iara ra, mala mei cheke eghu ka mare, ‘Ghotilo thosei eni glepo te diꞌa te tiroguni fara iara igne!’

⁵ Nu mare tirodi fanomho ka nodi cheke hatimare mae profet ra. Mare tirodi koko puhidi te diꞌare, eghuteuna mare gahu insens koba mala tarai ka mumuju.

⁶ Naugna igne, iara falalase diꞌatagu na ka mare jateula khaꞌaghi ngaja te theo kaisei naikno te puri faleheni ra eghu. Iara neke goigoni namonodi Juda, nei nabrou te gnafa Jerusalem. Uve, glepo igre diꞌa fabrahu ghilei mei posa ka narane gognarogne.

⁷ “Lord God mae ihei te au nolaghi fateote'o, nodi God maedi Israel igne ne cheke eghu, ‘Naugna unha si ghotilo te atha mei puhi biꞌo te goigoni ghami themi ignea? Jame te eni ghotilo puhi igne na, mae nalhaꞌu te gnafa, gaꞌase te gnafa, nei sua te gnafa nei gegeꞌe te gnafa teu igre ginauna lehe, eghuteuna theo kaisei ka vikegna Juda igre nate karha na.

⁸ Iara diꞌatagu fara ka puhi te tarai ghotilo ka mumuju teke edi themi are, eghuteuna ghotilo gahu insens mala pogho soru ka keha god di Ijep. Ghotilo ginauna goigoni ghami themi kolho. Eghuteuna naikno gna nauthoglu igne ginauna cheke fadiꞌa ghami ghotilo. Naiknore ginauna cheke faparidi nanghami ghotilore mala thoke mei puhi biꞌo ka ghotilo.

⁹ Ba, ghotilo ghatho ihodihi puhi te diꞌa teke edi kuꞌemi tifa ra? Ba, ghotilo ghatho ihodihi puhi te diꞌa teke edi hatimare mae king di Juda balu khetodi ra? Ghotilo baludi khetomi are jaola teke leghuni puhi te diꞌa na ka namono Juda, nei ka nabrou Jerusalem.

¹⁰ Mei te posa gognarogne, ghotilo naiknomi Juda maku fara phaꞌumire jateula thina eghu theome ghatho tahu ghau iara. Eghuteuna ghotilo jaola tiromi leghudi nogu vetula iara teke tusu ari iara ka ghotilo nei ka kuꞌemi ghotilo tifa ra.’

¹¹ “Eghume igne unha te chekeni Lord mae ihei te au nolaghi fateote'o nodi God maedi Israel: ‘Iara ginauna theome ke tughu gaoghathogu na, eghuteuna iara ginauna goigoni ghami ghotilo gnafa.

¹² Iara ginauna paradi fara iheire fateo te au faleghu ka namono Juda, eghuteuna magnahaghei fara te mei au Ijep. Neuba ne mae biꞌo, ba fiti mae kolho, mare te gnafa na ginauna lehe Ijep ka magra, ba ka vido te rofo. Kate nomhini igne, naiknodi keha kantri igre ginauna rhana nodi fara na cheke fadiꞌa ghami ghotilo. Eghuteuna naiknore ginauna tibri ghami ghotilo mala thoke mei puhi biꞌo ka ghotilo.

¹³ Iara ginauna paradi iheire te tei au Ijep ka vido te magra, ka vido te theo gano, ba ka vido te fogra biꞌo, jateula teke paradi iara naikno di Jerusalem.

¹⁴ Theo kaisei naikno gna Juda te mei au Ijep igre nate rikha, ba nate karha teke figri Juda na. Neuba mare ne magnahaghei fara teke figri na, keha naikno ghu kolho nate rikha teke figri na.’ ”

¹⁵ Kmana mae lasedi khetodire te gahu insens te tarai ka keha god delei, nei gaꞌase te kegra fabrahu ka vido igne baludi kmana naikno di Juda te mei funudi ke raru nei ke mata Ijep. Mare ne cheke eghu ka mae Jeremaea,

¹⁶ “Jeremaea, ghehati tiromi fanomho ka nonomho te mei toutonu iagho ka nanghagna Lord igne!

¹⁷ Ghehati ginauna edi gobigna lepo igre jateula teke chekedihi ghehati ra eghu. Ghehati ginauna gahu insens nei tarai eghu ka god gaꞌase Kuin gna Kligna igne. Eghuteuna ghehati ginauna tofa waen fabrahu ka naꞌa, jateula teke edi kuꞌemi, nomi king, nei nomi mae mala baubatura. Mare neke edi glepo igre ka namono te gnafa agne Juda nei Jerusalem. Ka narane tuare tahati neke au gheda kmana gano neke au fakeli noda neke theome thoke ghita kaisei puhi biꞌo.

¹⁸ Nu funu ka narane te theome gahu insens nei tofa waen teu ghehati ka Kuin gna Kligna na, ghehati kmoꞌe ka gobigna lepo igre. Eghuteuna noda naikno tahati gre lehe ka magra nei ka theo gano.”

¹⁹ Goro gaꞌasere jaola ne cheke eghu, “Kate horo bret te mala fafara na, ghehati horo jateula thotoghale gna Kuin gna Kligna igne eghu. Ghehati gahu insens nei tofa waen eghu mala pogho soru ka naꞌa. Eghuteuna khetomi ghehati gre lasenihi unha te eni ghehati na!”

²⁰ Aonu mae Jeremaea ne cheke eghu ka mae nalhaꞌu nei gaꞌase eghu te cheke tughu ka mana igre,

²¹ “Kani au teku tahati Juda tifa ra, ghotilo baludi kuꞌemi, nomi king, nomi funei nei keha maedi Juda tekura, ghotilo neke gahu insens ka namono Juda, nei heva heva agne Jerusalem. Ne theome lasedi nei ghatho ihodi neu Lord glepo igre neu si ghotilo ia? Theo! Mana theome ghatho ihodi unha te edi ghotilo tura!

²² Diꞌatagna God na biꞌo fara eidi glepo te diꞌa fara te edi ghotilo ra. Naugna igne, mana neke thofno goigonidi fara nomi kantri ghotilore. Eghuteuna kantri igre gognarona theo kaisei naikno te au tadire. Eghuteuna, naiknore ginauna tibri ghami ghotilo mala thoke mei puhi biꞌo ka ghotilo.

²³ Puhi biꞌo igre ginauna thoke mei ka ghotilo eidi nakhibo te gahu insens nei tarai fabrahu teu ghotilo ka mumuju god igre. Eghuteuna ghotilo tiromi leghudi nogna cheke nei nogna vetula teu manare.”

²⁴ Aonu mae Jeremaea ne cheke eghu ka mae nalhaꞌu nei gaꞌase teu igre, “Ghotilo naiknomi Juda te au Ijep ra, fanomho mei ka nogna cheke Lord igre!

²⁵ Lord mae ihei te au nolaghi fateote'o, nodi God mae Israel igne ne cheke eghu: ‘Ghotilo te gnafa baludi khetomi ra, ghotilo neke nhaꞌa cheke ka Kuin gna Kligna mala gahu insens, tofa waen nei tarai eghu ka naꞌa.’ “Tutuani fara, ghotilo mala thofno tathaji nhaꞌa cheke igne!

²⁶ Nu ghotilo fanomho mei ka nogna cheke Lord igne. ‘Iara Lord lisei soru ka ghotilo naiknodi Juda nhaꞌa cheke igne. Nu iara theome snakreni kaisei naikno gna Juda te cheke eghu na, “Iara eni nhaꞌa cheke igne ka Nanghagna Lord mae ihei te karha te tifa.”

²⁷ Iara ginauna filoni unha puhi biꞌo nate thoke mei ka mare na, naiknodi Juda te au teu Ijep igre ginauna lehe ka magra, ba lehe ka vido te theo gano na.

²⁸ Ginauna na kehaghu kolho na teke rikha teke pulo mei Juda. Mare ginauna laseni chekegna ihei te doglo na, chekegu iara, ba chekedi mare!

²⁹ “ ‘Iara ginauna tusu ari ka ghotilo kaisei fagaglana mala laseni ghotilo nate para ghami iara agne na.’

³⁰ Igne unha te chekeni Lord eimi ghotilo na: ‘Iara ginauna snakreni King Hofa gna Ijep ka khamedi mae naoka te magnahaghei faleheni mana re, jateula teke snakreni iara King Sedekaea ka khame gna King Nebukadnesa teke faleheni mana ia eghu.’ ”