Profet Jeremaea 41 - Buka Blahi Ka Cheke Holo

¹ Ka fafitu nhigra ka finogha igne, mae Ismael atha balugna nabotho mae ne tei filoni mae gavana Gedalaea Mispa. Mae Ismael igne thugna mae Netanaea, thugna mae Elisama, kaisei mae ka vike gna mae king, eghuteuna mana kaisei nogna mae biꞌo mana. Kate ghamu teu mare balugna mae Gedalaea igne,

² Ismael baludi nabotho mae igre kegra haghe ne atha nodi naflahi re ne aknu faleheni mae Gedalaea.

³ Mare jaola ne aknu falehe naiknodi Juda teke au balugna mae Gedalaea Mispa igre, eghuteuna mare jaola ne aknu falehe mae soldia di Babilonia te au ka namono igne.

⁴ Ka narane ke leghugna igne, kate theo kaisei naikno te laseni tela lehehi mae Gedalaea na,

⁵ nhanasalei mae mei funudi ka namono Sekem, Saelo, nei Samaria. Mare mei ne namo Mispa. Mare atha mei keha wit, nei insens mala fafara ka Sugablahi na. Mare ghoighori gremohodire nei rerheku nodi pohere, eghuteuna mare vaevahe thinidire, fagaglana gna nodi diꞌanagnafa na.

⁶ Mae Ismael jifla Mispa ne mei thafodi mare. Kate nolo te tei na, mana tanhi fabiꞌo. Eghuteuna kate thoke ka mare na, mana ne cheke eghu, “Ghotilo mei filoni mae Gedalaea!”

⁷ Nu kate posa mare ka namono na, mae Ismael baludi nabotho mae igre ne aknu falehedi mare. Eghuteuna koko soru pari thinidire lamna khora khoꞌu.

⁸ Nabotho mae igre ne cheke eghu ka mae Ismael, “Iagho thosei aknu falehe ghami ghehati! Ghehati au keha wit, bali, oliv oel, nei jurukuli.” Kate nomhini igne, mae Ismael ne theome aknu falehedi mare, nu mana ne snakre teidi mare.

⁹ Khora khoꞌu aheva te koko soru mae Ismael thinidi mae igre thono biꞌo fara. Khora igne neke dokha mae King Asa tifa mala fodu khoꞌu kani teke mei mae king Basa gna Israel teke magra ka mana na. Nu mae Ismael neke fafodu khora khoꞌu igne ka thinidi mae te lehe.

¹⁰ Thugna gaꞌase king nei keha naiknodi Mispa eghu teke lisei soru mae Nebusaradan mae funeidi nogna armi mae king gna Babilonia ke parigna nogna nolaghi mae Gedalaea igre ne kafe atha mae Ismael ne tei balugna ka kantri Amon.

¹¹ Kate nomhini mae Johanan thugna mae Karea baludi nogna mae komandare glepo te diꞌa te eni mae Ismael igne,

¹² mare ne tei ke leghugna mana. Eghuteuna mare tei ne thafoni mae Johanan rhegna khora khoꞌu Gebiꞌon.

^13-14 Kate filoni mae Johanan baludi nogna mae soldiare, naikno teke atha mae Ismael Mispa igre ne thofno keli tadi fara, mare figri ne chari ne tei ka mae Johanan.

¹⁵ Nu mae Ismael baludi nhana mae igre, ne rikhani ne tei poru ka kantri Amon.

Mare rikha ne tei Ijep

¹⁶ Mae Johanan, thugna mae Karea baludi hatimare nogna mae komanda igre neke atha fapulo naiknodi Mispa teke atha mae Ismael ke leghugna teke faleheni mae Gedalaea. Mana neke atha balugna mae soldia, goro gaꞌase balu thudi, nei nogna mae biꞌo king neke jifla Gibeon.

^17-18 Mae igre mhaghudi fara maedi Babilonia igre, naugna mae Ismael ne faleheni mae Gedalaea, mae ihei teke vavahi mae king gna Babilonia te mala gavana ka kantri igne. Aonu mare ne leghuni nabrou te tei posa Ijep, mala tangomana mare te rikhadi maedi Babilonia. Namono ululahu te tei mare te au tagna na, kaisei namono rhegna Betlehem, nanghagna na, Gerut-Kimham.