Profet Jeremaea 4 - Buka Blahi Ka Cheke Holo

Naiknodi Israel mala ke pulo mei kaLord

¹ Lord ne cheke eghu, “Ghotilo naiknomi Israel. Jame magnahaghei mala ke pulo mei mala teke leghu ghau iara teuna, ghotilo koko mumuju god te ghatho tahudi ghotilo are.

² Jame te magnahaghei nhaꞌa cheke ghotilo ka nanghagu iara na, ghotilo cheke eghu, ‘Iara thofno nhaꞌa cheke ka nanghagna Lord mae ihei te karha te tifa.’ Jame te eni tutuani ghotilo igne na, iara ginauna fablahi ghami ghotilo naikno te gnafa ka nauthoglu igne.”

^3-4 Lord ne cheke eghu ka naiknodi Juda nei Jerusalem, “Ghotilo koko puhimi te diꞌare mala ke pulo mei ka iara. Eghuteuna ghotilo mala jateula mae te joꞌu gano majaghani ka glose majaghani ra eghu mala ke atha gaoghatho majaghani nei puhi majaghani eghu. Ghotilo naiknomi Juda nei Jerusalem teura, ghotilo koko gaoghatho te diꞌa te fodu ka thiꞌami are mala nogu naikno keli iara thegu. Jame te theome eghu ghotilo na, iara ginauna thono diꞌatagu fara ka puhi te edi ghotilo tuare. Eghuteuna diꞌatagu iara igne ginauna jateula khaꞌaghi te theome tangomana kaisei naikno te faleheni ra eghu.”

Puhi biꞌo ginau thoke mei ka naiknodi Juda

⁵ Lord ne cheke ka mae profet Jeremaea mala cheke eghu ranghidi naiknodi Juda nei Jerusalem, “Ghotilo tei kufli ka vido te gnafa ka kantri igne mala nomhini naiknore! Eghuteuna tahati te gnafa na ginauna kafe rikha tei poru ka namono te bara te lithui ka thina biꞌo.

⁶ Jeremaea! Rafe haghe flagi ka Thogele Saion mala filoni naiknore. Thosei au faleghu kaisei naikno, ghotilo te gnafa na mala kafe rikha tei poru. Naugna nomi naoka ghotilo te au ke raru igre ginauna mei goigoni ghami ghotilo.” Igne chekegna Lord na.

⁷ Mare ginauna na jateula lion te jifla mei ka nogna vido mala poru ra eghu. Mare na mei goigonidi fara nomi namono ghotilo igre. Eghuteuna theo kaisei naikno nate au teu ka namono igre na.

⁸ Eghume, tahati mala pipichi ka pohe thona nei tanhi fabiꞌo eghu, fagaglana eigna noda diꞌanagnafa na. Naugna Lord na diꞌatagna fabrahu ka tahati.

⁹ Lord ne cheke eghu, “Ka narane igne hatimare mae king baludi nogna mae funei te gnafare ginauna thofno mhaghu nodi fara. Eghuteuna nomi mae pris nei nomi mae profet teu ghotilo igre ginauna mhaghu nodi fara salaꞌui.”

¹⁰ Aonu iara na cheke eghu, “Lord God, iagho chaichaghidi kolho naiknodi Juda nei Jerusalem mala au mare ka pharikeli teku ia. Nu gognaro na mae naoka igre la meihi agne te mala falehe ghami ghehati na!”

Mae naoka igre na mei jateula nuri biꞌo eghu

¹¹ Kate mei mae naoka igre, Lord ginauna cheke eghu ka naiknodi Juda ghe Jerusalem, “Kaisei nuri biꞌo te thono brana fara na ginauna ghaghafa mei fei namono nagou. Nuri igne ginau mei ka nogu naikno iara igre. Nu theome nafnata nuri te mala toghodi mare te mala koko khunedi wit ra. Theo.

¹² Nuri igne ginauna rheta fara mala mei goigonidi mare. Tutuani fara, iara neke chekenihi te mala fatedi naiknore. Gognaro na iara magnahaghei te paradi.”

¹³ Aonu, mae Jeremaea ne cheke eghu ka naiknore, “Filo si ghotilo! Hatimare mae naoka! Mare ginauna mei jateula nuri blahi te mei balu gromno ra eghu. Nodi chariot mae igre ginauna mei jateula saeklon eghu. Eghuteuna nodi hosere umhu fara salaꞌuni gaghata te flalo ka maloa na ia.” Aonu ghotilo ginauna cheke eghu, “Tore, tahati gne lehehi!”

¹⁴ Ghotilo naiknomi Jerusalem, niha nau ame tughu nakarha nga eghu si ghotilo ia? Koko si ghotilo puhimi te diꞌare mala ke au klino, eghuteuna God ginauna na fakarhi ghami ghotilo.

¹⁵ Kaisei nonomho na mei funu ke raru ka nohi Dan nei ka thogele te au ka nohi Efrem. Nonomho igne eigna kaisei puhi biꞌo ginauna thoke mei ka mare.

¹⁶ Lord ne cheke eghu, “Ghotilo cheke ranghidi naiknodi keha kantri are nei jaola ranghini Jerusalem nafnata nonomho te diꞌa igne. Gognarona mae naoka igre na mei funudi ka kantri te khaba mala magra ka ghotilo. Mae igre ginauna na eha fabiꞌo kate mei snura ka namono te gnafa igre Juda.

¹⁷ Mare ginauna mei kegra faligohoni namono biꞌo Jerusalem jateula kaisei mae te reireghi nagare te bara te ligoho ra eghu. Nu mare na eni igne, naugna ghotilo naiknomi Jerusalem nei Juda teu igre ne figri tagru ghau iara.

¹⁸ Naꞌau papara igre thoke ghami ghotilo, naugna ghotilo ne edi puhi te diꞌare.” Igne chekegna Lord.

Profet Jeremaea ne diꞌanagnafa ka nogna naiknore

¹⁹ Iara diꞌa nagnafagu fara, eghuteuna iara haimini te kabru ka thiꞌagu na. Iara theome tangomana te au snoto na, naugna iara nomhidi naogladi khufli, nei nomhidi hatimare mae naoka te eha fabiꞌo kate posa mei mare ka magra na.

²⁰ Kate thoke mei kaisei puhi biꞌo ka namono igre na, keha puhi biꞌo ginauna na jaola nake thoke mei ka mare thogheiro. Hatimare mae naoka igre thofno goigonidi fara naiknogna vido kantri igne ne ghilei diꞌa pari lahu. Mae igre thofno paꞌe fadiꞌa nomi suga tapuale ghehati re.

²¹ Niha fata filoni si iara flagi magra ignea? Niha fata nomhini si iara naoglagna khufli ignea?

²² Lord ne cheke eghu, “Nogu naikno iara igre theome au tadi kaisei gaoghatho te keli. Mare jateula sua te theome lalase nei fagoigoli tafri teura eghu theome lase ghau iara. Mare laseni kolho te mala eni puhi te diꞌa na, nu mare theome tangomana te eni unha puhi te keli na.”

Jeremaea ne filoni kaisei mifi

²³ Ka mifi igne iara ne theome filoni kaisei glepo ka nauthoglu igne. Kate filo haghe iara kligna na, iara ne filoni maloa na ne kafe romno soru.

²⁴ Eghuteuna thogelere ne kafe nghali ne kheu tongana, eghuteuna gukhu te gnafare ne jaola ne thugha tafri ne theome au snoto.

²⁵ Ka vido igne iara ne theome filoni kaisei naikno, ba kaisei nanghaji.

²⁶ Namono te keli ia kela kaisei namono nagou kolho. Eghuteuna namono te gnafa teke au ka vido tuana ra jaola groꞌe dofidi, naugna Lord ne diꞌatagna fara ne snakredi mae naoka igre ne eni nafnata puhi igne.

²⁷ Lord ne cheke eghu, “Nauthoglu igne ginauna krogha, nu iara na theome goigonini eghu.

²⁸ Gobigna lepo ka nauthoglu na igre ginauna tanhi, eghuteuna maloa igne ginauna romno soru. Naugna igne, nogu cheke nei gaoghatho teu iara te mala edi glepo igre ginauna na theome ke tughu.”

²⁹ Kate nomhidi naogladi mae soldia te saghe ka hose nei mae te pala jata teu igre, naiknore na jifla kokodi nodi namonore na kafe rikha. Kehare na tei poru mata, eghuteuna kehare na tei poru ka thogele ro. Aonu namono te gnafa igre na krogha na theo kaisei naikno te au jare na.

³⁰ Jerusalem, kate groꞌe na, unha nate eni iagho ginauna? Iagho pipichi ka pohe ukru nei lalaoni ka glepo teke hohoro ka gol. Eghuteuna peda fakeli tathamu na. Nafnata glalaoni igre theome mala togho ghami ghotilo. Naugna mae kherami fofodu ghotilora tirodi ghamihi ghotilo, eghuteuna gognarona mare magnahaghei fara te falehe ghami ghotilo na.

³¹ Iara ne nomhini kaisei naogla jateula natanhi gaꞌase te namo karha sua majaghani ra neu. Igne nogna natanhi namono biꞌo Jerusalem te kmoꞌe gnafa ne cheke eghu, “Tutuani fara, naoka igre magnahaghei te mei falehe ghau iara!”