Profet Jeremaea 2 - Buka Blahi Ka Cheke Holo

Naiknodi Israel ne tei kokoniLord

¹ Lord ne cheke eghu ka iara,

² “Jeremaea, iagho tei cheke ka naikno te gnafa te au ka namono biꞌo Jerusalem, Lord ne cheke eghu: “Iara ghathoni fabrahu narane teke ghatho tahu ghau iara ghotilo ia. Ka narane igne ghotilo neke thofno namha ghau iara jateula gaꞌase te tolaghi majaghani te namhani fara khetogna na ia neku. Ghotilo neke leghu ghau iara fabrahu ka namono nagou te theome tangomana kaisei naikno te joꞌu gano tagna ia.

³ Ka narane tura ghotilo naiknomi Israel gre neke nogu naikno blahi iara. Ghotilo neke jateula gano majaghani ka nagare ra neku neke fafara mei ka iara nakarhami na. Kate mei fariuriu goigoni ghami naiknore, iara neke kegra tughu ghami ghotilo neke goigonidi mare.” Igne nogu cheke iara Lord.

⁴ Ghotilo tharakna te gnafa ka vikegna Israel ra, fanomho mei ka iara.

⁵ Lord ne cheke eghu, “Unha neku iara ka kuꞌemi ghotilo tifa ra site tei koko ghau iara ghotilo gnea? Mare neke tarai ka mumuju god te theo nakarha tadi. Eghuteuna mare jateula mumuju god teke sari thedi tura neku neke jaola neke theo nafudi kolho.

⁶ Mare ghatho ihoni teke atha fajifladi iara ka kantri Ijep tifa ra. Eghuteuna iara neke batudi neke tei ke lamna namono nagou. Namono te theo kaisei khoꞌu nei theo kaisei naikno tagna. Neuba iara ne fakarhidi, mare theome ghatho ghau nei hiro ghau eghu iara.

⁷ Iara neke atha mei ghami ghotilo ka namono te keli igne mala tangomana ghotilo te ima thua nafnata gano te keli te karha ka vido igne. Nu kate mei au ghotilo agne na, ghotilo goigoni ni fara nogu glose iara teke tusu ari ka ghotilo igne. Eghuteuna ghotilo eni puhi te thono diꞌa fara na ke ulugu iara.

⁸ Hatimare mae pris theome ghatho ghau iara. Mae te lasedi nogu farirhiu iara igre theome lase ghau iara. Hatimare mae mala baubatu igre figri tagru ghau iara. Eghuteuna hatimare mae profet igre jaola cheke fakelini nanghagna god Baal. Mare pogho soru ka mumuju god te theo nafugna igne.”

⁹ Lord ne cheke eghu, “Naugna te eni ghotilo nafnata puhi igne, iara ginauna nake fate ghami ngala ghotilo. Eghuteuna iara ginauna na jaola fatedi thumi nei vikemi teu ghotilo nate karha mei ka ghotilo ginaure.

¹⁰ Ghotilo atha vaka tei ke mosu Saeprus mala laseni puhidi mare na. Ghotilo neke kuruni kaisei mae neke tei ke maghati kantri Keda mala filoni puhidi mare na. Ba, unha nafnata puhi te keli nate tei filoni ghotilo jare na?

¹¹ Nodi god keha kantri igre theome god tutuani. Nu vike igre theome tughu nodi god re mala leghuni kaisei god majaghani kolho. Nu ghotilo nogu naikno iara igre tughu nomi god majaghani la tei koko ghau iara. Tore! God igre theome tangomana nate togho ghami ghotilo na!”

¹² Eghume, te chekeni iara Lord na igne, “Maloa, iagho ginauna jaglo nou fara ka puhidi naiknodi Israel te diꞌa fara igre!” Igne chekegna Lord.

¹³ Naugna nogu naikno iara igre ne edi phei najafra te thono diꞌa fara igre. Naikno igre figri tagru ghau iara. Iara jateula glokha te fura haghe te mala koꞌu te karha naiknora eghu, nu mare tei koko ghau iara. Eghuteuna, mare leghudi god teke sari thedire. Uve, god igre jateula baket teke horo kolho naikno, nu phosa me theo kaisei khoꞌu tagna teura eghu kolho.

God na parani Israel eigna nakhibo

¹⁴ Lord ne cheke eghu, “Ghotilo nogu naikno iara ra, ghotilo theome naikno sneka. Theo, ghotilo theome thudi naikno sneka. Naugna unha si mae naoka igre te mei goigoni ghami ghotilo gnea?

¹⁵ Mae naoka igre jateula lion te rofo te ku'e fabiꞌora eghu. Mare goigonidi nei faghamu khaꞌaghidi eghu nomi namono ghotilo igre la theo kaisei naikno te au tadire. Eghuteuna mare jaola goigonidi fara nomi vido glose ghotilo igre.

¹⁶ Iheire te au ka phei namono biꞌo Memfis ghe Tapanes ka kantri Ijep igre, mare famamaja ghami ghotilo ne ghoighori fagae phaꞌumi ghotilore.

¹⁷ Ghotilo faꞌeiꞌei puhi ne thoke ghami themi. Kate batu ghami iara ka puhi te doglo na, ghotilo tiromi leghu ghau iara nomi God.

¹⁸ Ba, ghotilo tei ka kantri Ijep mala mei togho ghami mare? Ba, ghotilo magnahaghei tei koꞌu ka Khoꞌu biꞌo Nael? Ba, ghotilo tei ka kantri Asiria mala koꞌu ka Khoꞌu biꞌo Iufretis? Phei kantri igre theome tangomana nate fakarhi ghami ghotilo na!

¹⁹ Ghotilo tei koko ghau iara, eghume iara ginauna na snakre ghami ghotilo mala tei au fakhaba ka iara mala eni fabrahu ghotilo puhi te diꞌa na. Eghuteuna ghotilo ginauna na au papara fabrahu jare. Naugna igne, ghotilo ginauna filo glani puhi te tei koko ghau iara na, nei theome ghatho tahu ghau iara teuna. Igne thofno puhi diꞌa fara, naugna igne, ghotilo ginauna au papara.” Igne chekegna Lord God mae ihei te au nolaghi fateote'o.

²⁰ Lord ne cheke eghu, “Funu tifa te mei na, iara neke tei koko ghami ghotilo, eigna nakarha te diꞌa te eni ghotilo igne jateula naikno sneka eghu. Nu ghotilo tiromi te loku ranghi ghau iara na. Ghotilo tei koko ghauhi iara, eghuteuna gognarona ghotilo tarai tafri kolho ka keha god te chaichaghi igre ke kligna thogele nei ke pari gaju. Ghotilo jateula gaꞌase vine te tei kokoni khetogna na ia eghu.

²¹ Nu kaisei iara ngala teke lisei ghami ghotilo ka nogu glose na jateula mae ihei te joꞌu kaisei famane gaju grep te keli fara fuꞌagna na ia neku. Eghume, naugna unha si ghotilo te jateula grep nathuꞌa te raha fuꞌagna na ia teu gnea?

²² Neuba ghotilo ne fariuriu titihi fagae nakhibomire jateula mae ihei te fariuriu titihi fagae nogna pohe vegha na teu ra neu, nu iara Lord filodiu ngala nakhibomi ghotilo re.” Igne chekegna Lord God.

Hatimare mae Israel jateula gaꞌase te tei kokoni khetogna ia eghu

²³ Lord ne cheke eghu, “Naugna unha si ghotilo te chekeni koba ne theome tarai ka god Baal teu gnea? Ghaoghatho fakeli si ghotilo eidi glepo te diꞌa te edi ghotilo jare ka gloha Hinom! Ghotilo jateula kamel gaꞌasegna te hiro kamel nalhaꞌugna teu te tei tafri te theome au snoto ra eghu puhimire.

²⁴ Uve, ghotilo jateula dongki mhata te noli te au fabrahu ka namono nagou ra eghu. Te thoke mei nogna narane te mala hironi dongki nalhaꞌugna na, naꞌa na nghalu leghuni vido aheva te au teu dongki nalhaꞌugna igne. Kate tei thafoni nalhaꞌugna na, theo ihei nga nate fasnotoni unha te magnahagheni naꞌa na. Dongki nalhaꞌugna igne na theome hironi naꞌa ka narane igne, naugna mana bligi fara ranghini te deni nogna na.

²⁵ Ghotilo thosei tei leghudi keha nafnata god igre, na eghunu babaꞌo ghahemi nei moja foflomi teure eghu. Nu ghotilo mala cheke eghu koba, ‘Iara theome tangomana te au snoto na, naugna iara magnahagheni fara te leghudi keha god igre. Eghuteuna iara theome tangomana teke figri na.’ ”

²⁶ Aonu Lord ne cheke eghu, “Ghotilo naiknomi Israel baludi nomi mae mala baubatura, ghotilo ginauna na mamaja nomi jateula mae ihei te blau te lolhoku mae pulis ra eghu. Tutuani, hatimare mae king nei hatimare mae biꞌo, nei hatimare mae pris, nei hatimare mae profet teu igre na jaola mamaja nodi fara.

²⁷ Naugna mare ne tarai ka mumuju god teke sari ka gaju nei ka thina. Te ghathoni ghotilo na glepo igre ginauna na tusu ranghi ghami nakarha te keli eghu. Naugna igne te tei koko ghau iara ghotilo gognarona. Nu kate thoke ghami puhi biꞌo na, ghotilo ginauna na mei tanhi ka iara mala fakarhi ghami.

²⁸ Nu aheva gne nomi god ghotilo te mala fakarhi ghami ka puhi biꞌo te thoke ghami ghotilo na? Tore ghotilo ka nomi god tuare eghu mala fakarhi ghami! Ghotilo maemi Juda, ghotilo au nomi kmana god ka namonomire, ba, god igre nabadi te mei fakarhi ghami ghotilo na?”

²⁹ Lord ne cheke eghu, “Naugna unha si ghotilo te nguru ngau ka iara gnea? Iara theome diꞌatagu ka ghotilo. Nu ghotilo tiromi ghau iara!

³⁰ Iara neke para ghami ghotilo, naugna iara magnahaghei te fadoglodi puhimi ghotilore, nu ghotilo tiromi tughu puhimi te diꞌare. Eghuteuna ghotilo jateula lion te rofo ra neu ne falehedi koba nogu mae profet iara ra.

³¹ “Ghotilo maemi Israel ra, fanomho ka nogna cheke Lord igne! “Iara neke theome tei koko ghami ghotilo ka namono nagou ia. Theo! Naugna unha si ghotilo ne snaglahi themi teu te tirodi leghu ghau iara gnea?

³² Ba, gaꞌase te jifla kokoni nogna suga na te mala tolaghi na, naꞌa tangomana te ghatho ihodi nogna famane pohe nei khome teure? Theo fara! Nu ghotilo nogu naikno iara gre, ghotilo ghatho iho ghau iara fabrahu.

³³ Ghotilo kaisei nanaba kolho ka gaꞌase glalaba te hiro nalhaꞌu tafri are. Gaꞌase vine na jaola khasidi ka puhimi ghotilo te diꞌare.

³⁴ Ghotilo chaghidi naikno te kuma te theome eni kaisei najafra na. Eghuteuna mae te kuma igne ne theome ruma ne blau ka nomi sugare. Neuba, puhi te eni ghotilo igne jateula puhigna mae ihei te faleheni mae kheragna fofodu na ia eghu. Puhi te eni ghotilo ka naikno te kumare igne goigoni ghami fara ghotilo, jateula vido dadara te goigoni nomi pohe ghotilo ra eghu.

³⁵ Neuba, te chekeni ghotilo na, puhimi ghotilore doglou kolho eghu koba, uve, iara theome diꞌatagu ka ghotilo. Nu iara ginauna na para ghami ghotilo, naugna ghotilo ne cheke chaichaghi koba, eigna iara neke theome eni kaisei najafra.

³⁶ Naugna unha si ghotilo te tei tafri te leghudi nodi god keha kantri delei igrea, ba mala togho ghami mare? Hatimare mae Ijep ginauna na theome togho ghami ghotilo jateula hatimare mae Asiria teke theome togho ghami ghotilora eghu.

³⁷ Eghuteuna ghotilo ginauna mamaja nomi nei diꞌanagnafami eghu kate jifla kokoni ghotilo vido igne, naugna iara theome magnahaghei ghami ghotilo. Eghuteuna kantri Ijep te rouronuni ghotilo igne ginauna theome tangomana te togho ghami ghotilo na.”