Profet Jeremaea 12 - Buka Blahi Ka Cheke Holo

Profet Jeremaea diꞌanagnafa ne toreniLord

¹ Lord, iagho eni fabrahu puhi te doglo na, eghume, iara theome tangomana te fapholai balumu iagho na. Nu iara magnahaghei te ghusna ka iagho eidi keha puhi te theome raꞌe glola ka gaoghathogu na. Ba, ne faꞌunha si mae te diꞌa puhidire igre te au fakeli nodi koba grea? Ba, ne faꞌunha si mae te theome namo ka iagho igre te au ka nakarha te keli igrea?

² Iagho liliseidi ka nauthoglu igne jateula mae ihei te joꞌu gano ka nagare na te karha kelidi nei ure teura neu. Neuba mare ne famane cheke eimu iagho koba, nu mare theome ghatho tahu nigho iagho kolho.

³ Nu iagho Lord, iagho lase fakeli ghau iara. Eghuteuna iagho filodihi nogu gloku iara re, nei puhigu iara te ghatho tahu nigho iagho gre eghu. Atha fadelei naikno te diꞌa igre mala falelehe, jateula mae te atha fadelei sipu te mala falelehe te ghamu ra eghu. Iagho tajidiu ghilei thoke mei nodi narane te mala lehe na.

⁴ Ba, niha fata moja fabrahu si glose, nei buburu teu te mala ghamudi buluka igrea? Gognaro na buluka nei nanghaji teu igre la theo ghedi gano la lehe. Naugna naikno te au ka namono igne mare leghuni kolho puhi te diꞌa na. Eghuteuna keha na igne, mare cheke eghu koba, “Lord theome tangomana te lasedi unha te thoke ghita tahati igre.”

⁵ Lord ne cheke eghu ka iara, “Jeremaea, jame te fangenghele iagho baludi mare te babaꞌo na, faꞌunha eghu iagho tangomana te fangenghele ka hose na? Eghuteuna jame te uka iagho ka vido te gae na, faꞌunha eghu iagho tangomana te daka mata rhegna khoꞌu Jordan?

⁶ Neuba thabusimu iagho igre baludi thofno tharaknamu iagho re, mare jaola figri tagru nigho iagho. Mare loku fodu baludi mae naoka mala cheke balu diꞌatadi ka iagho. Eghume, neuba mare ne cheke famane cheke eimu iagho, nu iagho thosei fatutuani di.”

⁷ Lord ne cheke eghu, “Iara ginauna tei kokodi nogu naiknore. Uve, iara ginauna theome magnahaghedi iheire teke vahi fadeleidi mala nogu naikno iara teku igre. Iara ginauna lisa laodi iheire te namhadi fara iara igre ka khamedi mae naoka.

⁸ Nogu naikno iara igre figri tagru ghau iara. Mare thofno ngara ghau iara jateula lion namhata eghu. Naꞌa ku'e fabiꞌo, eghuteuna naugna igne, mare theome magnahaghei ghau iara.

⁹ Nogu glose iara na gognarona jateula nodi namono khuma mata eghu, aheva nanghaji biꞌo te flalo falithui te mala ghamu glepo te glepo te lehe re. Ghotilo tei! Kilo meidi glepo te tautagu te gnafa ka namhata na are mala mei ghamu ghedi!

¹⁰ Kmana mae lida di keha kantri igre goigoni di nogu naikno iara Israel igre jateula kaisei mae te thofno goigoni nagare grep ra eghu. Nogu famane nagare iara igre mare ginauna goigoni fahui mala jateula namono nagou eghu.

¹¹ Mare ginauna eni nogu glose iara igne mala theo kaisei glepo nate tangomana nate kotu tagna na. Glose igne ginauna krogha kolho, eghuteuna naꞌa na jateula glose te tanhi ka iara ra eghu. Uve, hatimare mae naoka igre goigoni nogu glose iara na, eghuteuna theo kaisei nate kokhonini na.

¹² Mae naoka ginauna mei ke kligna thogele namono nagou mala goigoni gobigna lepo ka glose igne. Mae igre jateula nogu naflahi biꞌo iara Lord eghu, naugna iara teke kuru meidi re mala paradi naikno ka glose igne, eghuteuna theo kaisei naikno nate karha na.

¹³ Nogu naikno iara igre ginauna joꞌu famane sisi wit ka nagare, nu ka narane te mala atha gano na, mare na atha phono kolho. Mare ginauna loku heta, nu mare na theome tangomana nate filoni sisigna nodi gloku na. Tore! Sisi te atha ghotilo igre theome kmana, eghume ghotilo mamaja nomi fara kolho. Igne ikoi fara naugna iara Lord thono diꞌatagu fara ka ghotilo.”

¹⁴ Lord ne cheke eghu, “Iara ginauna atha fadelei naikno te diꞌa te au falithui ni nodi glose nogu naikno iara Israel. Uve, iara ginauna na jateula igne eghu na jaola atha fadelei naiknodi Juda igre ka nodi namono re.

¹⁵ Nu ke leghu na, iara ginauna nake kokhonidi, eghuteuna iara ginauna nake atha fapulodi ka nodi namono re.

¹⁶ Mare mala filo leghudi puhidi nogu naikno iara re. Tifa te mei na, mare neke farirhiudi nogu naikno iara re mala pogho soru ka god Baal, eghuteuna eni nodi nhaꞌa cheke na ka nanghagna Baal. Nu gognarona mare mala nhaꞌa cheke ka nanghagu iara Lord kolho.

¹⁷ Jame te eghu mare na, mare tangomana te mala kaisei ka nogu naikno iara igre. Nu jame te tirodi fanomho nei leghu ghau iara teu mare na, iara ginauna atha fajifladi gnafa mare. Iara Lord te chekeni igne!”