Profet Jeremaea 11 - Buka Blahi Ka Cheke Holo

Naiknore ne huhughuni nogna Nhaꞌa chekeLord

¹ Lord ne cheke eghu ka iara,

² “Jeremaea, iagho tei ka naikno te au ka namono Juda nei Jerusalem. Iagho cheke eghu ka mare, ‘Ghotilo fanomho mei ka cheke te au ke lamnagna nhaꞌa cheke teke eni iara balumi ghotilo igne!’

³ Iagho cheke eghu ka mare, ‘God noda Lord tahati maeda Israel igne, mana ne cheke eghu, “Ihei te theome leghuni nogu nhaꞌa cheke iara na, iara ginauna thofno parani mana.

⁴ Nhaꞌa cheke teke eni ka narane teke atha fajifladi iara ka kantri Ijep kuꞌemi ghotilo ra aheva teke au papara fara mare tagna na.” Iara neke cheke eghu ka mare, “Fanomho fakeli ka nogu cheke iara igre, eghuteuna leghudi gobigna lepo mala edi ghotilo teku iara ra! Jame te leghu ghau iara ghotilo na, ghotilo ginauna nogu naikno iara, eghuteuna iara nomi God ghotilo.

⁵ Eghuteuna iara neke tajini nogu nhaꞌa cheke na neke snakreni kaisei vido glose te biꞌo ka ghotilo.” Eghuteuna glose igne thofno keli fara ka gano na maladi mae kuꞌemi ghotilora.’ ” Igne namono te au ghotilo tagna gognarogne. Kate cheke te gnafa Lord cheke igre, iara ne cheke eghu, “Tutuani fara Lord, iagho tangomana te eni unha te chekeni iagho na!”

⁶ Aonu Lord ne cheke eghu ka iara, “Iagho tei ka namono biꞌo te au jare Juda nei heva heva Jerusalem mala toutonuni nogu cheke iara igne ka naiknore. Fanomho mei ka cheke te au ke lamnagna u nhaꞌa cheke teke eni iara balumi ghotilo igne, nei leghudi gobigna lepo te chekedi ka nhaꞌa cheke igne eghu!

⁷ Funu ka narane teke atha fajifladi iara ka kantri Ijep kuꞌemi ghotilo ra te ghilei mei posa ka narane gognaro igne, iara chekeni koba igne ka mare, ‘Leghu ghau iara.’

⁸ Nu mare theome fanomho ka iara, ba leghu ghau iara. Mare maku fara phaꞌudire ne leghudi kolho gaoghathodi thedi te diꞌa re. Eghume, iara na tibridi mare, leghuni nhaꞌa cheke igne.”

⁹ Lord jaola neke cheke eghu ka iara, “Naiknodi Jerusalem nei keha naiknodi Juda teu igre mare roghe fodu te mala tirodi leghuni nogu cheke iara na.

¹⁰ Mare figri neke edi puhi teke edi mae kuꞌedi tifara ne tirodi fanomho ka nogu cheke iara re. Mare theome gnafa te tarai ka mumuju god na. Hatimare mae Israel tifara nei hatimare mae Juda gognarogre, mare kafe huhughuni u nhaꞌa cheke teke eni iara baludi mae kuꞌedi mare tifara.

¹¹ Aonu Lord ne cheke eghu, iara ginauna na goigonidi mare, eghuteuna theo kaisei naikno ka ghotilo nate rikhani puhi biꞌo igne. Neuba mare ne tanhi ka iara, iara na theome fanomho ka mare.

¹² Naiknodi Jerusalem nei keha naiknodi Juda teu igre ginauna tei tanhi ka god te chaichaghi te gahu insens nei tarai teu mare tadi igre. Nu kate posa mei puhi biꞌo ka mare na, god igre ginauna theome tangomana te toghodi mare ka narane igne.

¹³ Ghotilo naiknomi Juda! Ghotilo au nomi kmana god, nanaba ka nomi namono biꞌo ghotilo are. Eghuteuna nomi olta ghotilo te mala tarai ka god Baal igre jaola kmana fara nanaba ka nabrougna namono Jerusalem.

¹⁴ “Jeremaea, iagho thosei taraidi naikno igre, eghuteuna iagho thosei tanhi mei ka iara ka nanghadi mare. Iagho thosei tore ghau iara mala toghodi mare, naugna iara ginauna na theome fanomho ka narane te eha mei mare ka vido te thoke mei ka mare puhi biꞌo igne.

¹⁵ “Iara namha ghami ghotilo, nu ghotilo edi kmana puhi te diꞌa fara. Eghume, mei mala unha si ghotilo ka nogu Sugablahi iara ignea? Ba? Nafnahi blahi te fafara ghotilo igre nate fakarhi ghami ghotilo na? Theo! Naugna kate edi ghotilo glepo te diꞌare, ghotilo neke keli tami fara.”

¹⁶ Teke chekeni iara ka ghotilo tifa ia, ghotilo jateula kaisei famane gaju oliv te keli khaklagna nei fuꞌagna teura neku. Nu gognarona, iara na goigoni ghami ghotilo, jateula fila nei nakafli eghu te goigonidi gaju oliv te klopa gregedira eghu.

¹⁷ Iara Lord mae ihei te au nolaghi fateote'o, iara neke nhaꞌa soru ghami ghotilo ka vido te au ghotilo igne, jateula mae ihei te joꞌu famane gaju oliv ka nogna nagare na ia neku. Nu gognarona, iara ginauna na snakre mei puhi biꞌo mala thoke ghami ghotilo. Naugna ghotilo naiknomi Israel nei naiknomi Juda teu igre leghuni fabrahu puhi te diꞌa na. Ghotilo tarai koba ka god Baal, nafnata puhi te diꞌa te eni fabrahu ghotilo igne te diꞌataguni iara ka ghotilo na.

Mare roghe mala faleheni mae Jeremaea

¹⁸ Kaisei narane, Lord ne falalase ka iara te magnahaghei falehe ghau iara nogu naoka re.

¹⁹ Iara theome laseni gaoghatho te diꞌa te eni mare ranghi ghau iara igne! Iara jateula sipu ikoi te atha te tei mare te mala falelehe ia eghu kolho. Mare roghe ne cheke eghu, “Mei ghotilo mala falehe tahati mae igne, mala jateula gaju te kato soru te goigoni fuꞌagna ra eghu. Tahati na faleheni mae igne mala theo kaisei naikno teke ghathoni mana na.” Aonu mana ne cheke eghu,

²⁰ “Lord, iagho mae ihei te au nolaghi fateote'o! Kaisei iagho ngala te tangomana te fateni naikno na ka puhi te doglo. Iara lisa ari ka khamemu iagho puhi te diꞌa te eni fabrahu mare ka iara igne. Eghuteuna iara magnahaghei te filoni unha nate tughu fapulo iagho ka mare puhi te diꞌa teke eni mare ka iara igne.”

²¹ Hatimare mae te au ka namono Anatot igre, mare magnahaghei te falehe ghau iara ne cheke eghu ka iara, “Iagho thosei toutonuni nanghagna Lord igne! Jame te eni iagho nafnata cheke igne na, ghehati ginauna falehe nigho iagho!” Nu Lord ne nomhini nogu cheke iara igne ne cheke eghu,

²² “Iara Lord mae ihei te au nolaghi fateote'o igne ginauna paradi mae igre. Iara ginauna kuru meidi mae naokare mala falehedi hatimare mae majaghani te au ka namono Anatot. Eghuteuna ka narane igne namono Anatot igne ginauna theo gano, eghuteuna thudi mae igre ginauna lehe ka grofo.

²³ Iara la vahinihi narane te mala roꞌeni namono Anatot. Eghuteuna ka narane igne, ginauna na theo kaisei naikno ka namono igne nate karha na.”