Profet Jeremaea 10 - Buka Blahi Ka Cheke Holo

God te sari naiknore theo nafudi kolho

¹ Ghotilo naiknomi Israel, fanomho fakeli ka unha te chekeni Lord ka ghotilo igne.

² Lord ne cheke eghu, “Thosei leghuni puhidi naiknodi keha kantri are. Eigna mare tangomana te filodi thua nafnata fagaglana te thakle mei ka maloa. Nu neuba mare ne mhaghudi fagaglana tuare, ghotilo thosei mhaghudi.

³ Nodi kastom mare igre theome tutuani nei theo nafudi eghu kolho. Ulu lahu na mare kato soru kaisei gaju, aonu iheire te lase sari igre ginau sari gaju igne mala horo mumuju god.

⁴ Gnafa teuna mare lalaoni mumuju igne ka silva nei ka gol. Aonu mare atha hama nei nila mala tutu famaku thinigna na mala theome uka pari.

⁵ Mumuju igre tharu maei kolho, jateula thotogale naikno te mala famamhaghu nanghaji ka nagare sopho ra eghu kolho. Mumuju god igre theome tangomana te cheke na nei jaola theome tangomana te nolo na. Ghotilo thosei mhaghudi, eigna mare theome tangomana te goigoni ghami ghotilo na, nei jaola theome tangomana te togho ghami ghotilo na.”

⁶ Lord, theo kaisei god te jateula iagho teuna! Nanghamu iagho na fnakno fara kligna lahu, eghuteuna iagho au nolaghi fateote'o.

⁷ Naikno te gnafa igre mala ghatho tahu nigho iagho, naugna iagho king frunidi kantri te gnafa igre. Theo kaisei mae glalase ba mae king te jateula iagho teu ka vido te gnafa ka nauthoglu igne.

⁸ Naiknore fameomekro nei theome lalase eghu. Mare theome tangomana te athini kaisei glalase ka mumuju teke hohoro ka gaju na.

⁹ Mae iheire te laseni gloku igne, mare lalaoni mumuju igre ka famane silva teke atha kantri Spen nei ka gol teke atha namono biꞌo Ufa. Aonu mare fapipichi mumuju igre ka famane pohe te ngonge jateula nogna pohe king eghu.

¹⁰ Nu Lord, iagho thofno God. Iagho God mae ihei te karha fabrahu, eghuteuna iagho ginauna king fabrahu tifa e tifa. Kate diꞌatamu iagho na, vido te gnafa ka nauthoglu igne ginauna nghali tongana, eghuteuna theo kaisei naikno ka keha kantri igre naba te kegra maku na.

¹¹ “Ghotilo cheke eghu ranghidi naikno bongihehe are, ‘Nomi god ghotilo are neke theome vuavuha nauthoglu ghe maloa igre, nu God mae ihei teke vuavuhadi nauthoglu ghe maloa igre ginauna goigonidi gnafa god igre mala dofidi ka nauthoglu igne.’ ”

Koje kilo fnaknoniLord

¹² Ka nogna gaoghatho te keli nei ka nogna glalase eghu thegna Lord neke vuavuha nauthoglu ghe maloa igre. Mana neke vuavuha glepo igre ka nogna nolaghi nei glalase eghu thegna.

¹³ Kate cheke mana na, naoglagna mana igne poha jateula fila eghu, eghuteuna khoꞌu ka maloa na soru poha fabiꞌo. Mana cheke ranghini khoveo na mala mei funu ka keha phile nauthoglu na. Mana cheke ranghini nakafli na mala phae ka nakhete biꞌo na, eghuteuna mana cheke ranghini nuri na mala jifla mei ka vido teke augna na.

¹⁴ Mae igre theome eghu. Mae igre fameomekro nei theome lalase eghu. Mae te hohoro mumuju ka gol igre ginauna mamaja nodi fara, naugna god te edi mare igre chaichaghi kolho. Eigna theo kaisei nakarha tadi.

¹⁵ Mumuju igre theo nafudi kolho, eghuteuna naiknore fameomekro fahaehaghedi glepo igre. Ka narane fate na, God ginauna roꞌe fahui glepo igre.

¹⁶ Nu nogna God mae Jekop igne theome jateula keha nafnata god are eghu. Mana ngala mae ihei teke vuavuhadi gobigna lepo ka nauthoglu igne. Eghuteuna vahi fadelei ghita tahati naiknoda Israel mala nogna naikno thegna. Nanghagna na Lord mae ihei te au nolaghi fateote'o.

Naoka ginauna mei magra Jerusalem

¹⁷ Ghotilo Jerusalem, hatimare mae naoka la mei kegra falithui ghamihi ghotilo. Ghotilo tarabana nomi gobigna lepore mala jifla ka namono igne!

¹⁸ Lord ne cheke eghu, “Ka narane igne, iara ginauna brue fajifla ghami ghotilo naikno te au ka namono igne. Iara ginauna tusu ari kaisei puhi biꞌo ka ghotilo mala haimini ghotilo.”

¹⁹ Naikno te gnafa te au ka namono biꞌo Jerusalem igre ginauna cheke eghu, “Tahati gne kokhoni ghita fara! Puhi biꞌo te thoke ghita tahati igne jateula thubu biꞌo te theome faghose te mafo ra eghu! Nu puhi biꞌo igne la mei para ghita fara.”

²⁰ Nogu suga tapuale iara na la groꞌehi, eghuteuna gnarho te mala loku famakugna na la khusuhi. Nogu naikno iara ra la rikha la tei dofidi. Theo ihei nga na teke babana fapulo nogu suga tapuale iara na.

²¹ Nogu mae mala baubatu iara ra, mare jateula mae ihei te theome reireghi fakelidi nogna sipu ra eghu. Mae igre theome lalase. Mare theome toreni Lord mala laseni gaoghathogna mana na. Eghume, mae igre theome eni kaisei gloku te keli, eghuteuna mae naoka igre la mei jateula khuma mata te bruedi sipu ra lau la brue fajifladi naiknore la tei tafri.

²² Fanomho mei ghotilo ia! Igne nonomho na. Naoglagna armi biꞌo na la nomhi laoni ke raru. Mare ginauna mei goigonidi namono biꞌo te au ka kantri Juda igre mala krogha jateula namono nagou eghu mala nodi vido mala au khuma mata kolho.

Mae Jeremaea ne toreni God mala toghodi naiknore

²³ Lord, te laseni iara na, theo kaisei naikno ka ghehati te naba te mala batu ghami te mala leghuni nabrou te magnahagheni ghehati na.

²⁴ Lord fadoglini nakarhagu gne, nu eni ka puhi te doglo kolho. Jame te fadogli ghau iara iagho kate diꞌatamu na, iara ginauna na theo nafugu kolho.

²⁵ Fakakhana te diꞌatamu na sagho ka naiknodi keha kantri te theome ghatho tahu nigho are, nei iheire te theome tarai ka iagho teu are. Naugna, mare neke goigoni ghami ghehati vikegna mae Jekop, eghuteuna mare jaola goigoni nomi glose nei nomi suga teu ghehati gre.