Profet Jeremaea 1 - Buka Blahi Ka Cheke Holo

Cheke ulu lahu

¹ Igre nogna cheke mae Jeremaea thugna mae Hilkaea. Mana kaisei mae pris ka namono Anatot ka nodi nohi vikegna Benjamin.

² God neke cheke ka mae Jeremaea ka fabotho thilo finogha te funei fruni king Josaea thugna mae Amon. King Josaea neke funei ka kantri Juda nabagna varadaki finogha.

³ Funu ka narane te funei fruni king Jehoakim thugna king Josaea igre, Lord ne cheke koba ka mae Jeremaea ne ghilei tei gnafa kate nabotho kaisei finogha te funei mae king Sedekaea, fapea thugna mae Josaea. Falima nhigra ka finogha leghu lahu te king mae Sedekaea igne, armigna Babilonia igne ne atha naiknodi Jerusalem ne tei ka kantri delei.

God ne vahini mae Jeremaea mala kaisei mae profet

⁴ Igne nonomho teke chekeni God ka iara na. Mana neke cheke eghu ka iara,

⁵ “Jeremaea, kani au teku iagho ka thiꞌagna idomu na, iara neke lase nighohi. Theome karha nga teku iagho na, iara neke vahi nigho iagho mala nogu mae profet iara. Iagho mala toutonuni chekegu iara na ka kantri te gnafa ka nauthoglu igne.”

⁶ Aonu iara ne cheke eghu, “Nu Lord God, iara mae majaghani fara. Iara theome raꞌe lase cheke fakeli!”

⁷ Nu mana ne cheke eghu ka iara, “Thosei chekeni iagho ne mae majaghani fara teuna. Iara ginauna kuru tei nigho iagho ka naikno te gnafa ka vido aheva nate tei iagho na. Eghuteuna iagho ginauna toutonu ranghidi gobigna lepo te chekedi iara ka iagho igre.

⁸ Iagho thosei mhaghudi naiknore, naugna iara ginauna na batu nigho iagho.” Igne chekegna Lord teke cheke mei ka iara na.

⁹ Aonu, Lord ne habo ka foflogu iara na, ne cheke eghu, “Filo sagho! Iara gognarona tusu ari ka iagho nogu cheke na mala tei toutonu iagho ka naiknore.

¹⁰ Ka narane igne, iara ginauna na tusu ari nolaghi ka iagho mala cheke iagho ke uludi kmana naikno ka kantri te gnafa igre. Igne nolaghi mala paꞌe soru, nolaghi mala goigoni, nolaghi mala ke babana fapulo nei nolaghi mala ke farerheta fapulo.”

¹¹ God ne cheke eghu ka iara, “Jeremaea. Unha te filoni iagho gognarona?” Iara ne cheke eghu, “Iara filoni kaisei grege gaju te kiloi amon.”

¹² Aonu Lord na ne cheke eghu ka iara, “Doglo fara! Iara ginauna na filo fakelini nogu cheke na mala thoke mei tutuani.”

¹³ Aonu God neke fapea cheke eghu ka iara, “Unha ngau eghu te filoni iagho na?” Aonu iara ne cheke eghu, “Iara filoni kaisei suspen ghurau ke raru. Eghuteuna suspen igne namo thofa mei ka tahati agne.”

¹⁴ Aonu Lord ne cheke eghu ka iara, “Uve, kaisei puhi biꞌo ginauna jifla mei ke raru mala mei goigonidi naikno te au ka kantri igne.

¹⁵ Naugna iara gognarona kilo meidi hatimare mae king baludi naikno te gnafa te au ka kantri ke raru. “Hatimare mae king igre ginauna mei lisei soru nodi sape nafnaknore ke uludi grengatha te gnafa ka gringni gna namono biꞌo Jerusalem. Aonu mare ginauna na jaola mei kegra faligohoni namono igne. Eghuteuna mare ginauna eni kaisei nafnata puhi te diꞌa fara ka keha namono igre Juda.

¹⁶ Iara diꞌatagu fara ka puhi te diꞌa te edi nogu naikno iara igre, naugna mare ne figri tagru ghau iara. Eghuteuna mare theome gnafa te gahu insens nei tarai teu ka mumuju god teke sari thedi igre.

¹⁷ “Jeremaea! Iagho tarabana mala tei toutonuni nogu cheke iara igre ka naiknore. Iagho thosei mhaghu ba suaraghi. Jame te mhaghudi iagho naiknore, iara ginauna famamhaghu nigho ke uludi mare.

¹⁸ Iara ginauna farerheta nigho iagho jateula namono te bara te ligoho ka thina, ba jateula kaisei khegra aean eghu. Uve, iagho ginauna kegra heta tutuani fara jateula gringni teke horo ka bras eghu ke uludi hatimare mae king, hatimare mae funei, hatimare mae pris, nei naiknodi Juda.

¹⁹ Mare ginauna diꞌatadi fara ka iagho, nu mare ginauna na theome tangomana te tapla fapari nigho iagho na. Naugna iara ginauna na au balumu iagho mala reireghi fakeli nigho. Igne chekegna Lord!”