Profet Daniel 9 - Buka Blahi Ka Cheke Holo

Mae Daniel ne toreni God mala toghoni Israel

¹ Darius, thugna King Sekses ka kantri Media te king gna Babilonia gognarona.

² Ka finogha ululahu te king mae Darius igne, iara ne hironi chekegna God na ka Buka Blahi na. Ka igne iara ne ghathoni kaisei nogna cheke Lord teke cheke mana ka profet Jeremaea. Mana neke cheke eigna namono biꞌo Jerusalem teke groꞌe ka mae naoka ra. Eghuteuna namono biꞌo igne ginauna theome tangomana na teke babana fapulo na ghilei thokeni fitu salei finogha.

^3-4 Iara theome ghamu, aonu iara ne pipichi ka pohe te thona, eghuteuna iara gnokro pari ke kligna nakrofu, fagaglana gna nogu diꞌanagnafa na. Aonu iara tarai ne cheke eghu ka Lord nogu God, “God, iagho nomi funei ghehati. Iagho thofno fnakno fara. Iagho tajini fabrahu nou nhaꞌa cheke teke eni iagho baludi nou naiknore. Eghuteuna iagho namhadi iheire te namha nighore, ba iheire te leghudi nou cheke re.

⁵ Ghehati naikno diꞌa fara. Ghehati edi puhi te diꞌare ka tathamu iagho na. Ghehati theome leghudi nou vetula nei cheke teu iaghore.

⁶ Ghehati theome fanomho ka nodi cheke hatimare mae profet, nou mae gloku iagho igre. Iagho neke kuru mei mae igre mala cheke ranghidi nomi mae king, nomi mae funei, kuꞌemi ba kavemi, nei iheire fateo te au ka kantri Israel.

⁷ “Lord, iagho edi fabrahu unha te doglore. Nu ghehati famamaja ghami themi kolho kate edi fabrahu puhi te diꞌa gre. Naiknodi Juda nei Jerusalem, baludi naikno te gnafa Israel te khi teidi iagho te tei au tafri ke lamnagna nauthoglu igne, ghehati te gnafa na kaisei nanaba ngala. Ghehati te gnafa na theome tajini nomi nhaꞌa cheke teke eni balumu iagho ia.

⁸ Lord, hatimare mae king, nei hatimare mae funei nei hatimare mae kuꞌemi ghehatira, ghehati te gnafa na kafe edi unha te naba te mala mamajadi re, eghuteuna ghehati tapla jafra ke ulumu iagho.

⁹ Neuba ghehati ne theome keli ranghi nigho iagho, iagho kokhoni ghami ghehati fabrahu kolho, nei hata fadelei nakhibomi ghehati re.

¹⁰ Lord God, iagho ngala nomi God ghehati na. Iagho chekehi ka ghehati te mala leghudi nou vetula iagho teke chekedi hatimare mae profet, nou mae gloku iagho ra. Nu ghehati theome leghudi kolho eghu.

¹¹ Ghehati naiknomi Israel te gnafa na theome leghudi kolho nou vetula iaghore, nei jaola theome leghu nigho iagho. “Ghehati tapla jafra ranghi nigho iagho, naugna igne, puhi biꞌo te rioriso soru nou mae gloku iagho Moses ka vetula na igre, iagho teke edi re mala thoke ghami ghehati.

¹² Iagho para ghamihi ghehati baludi nomi mae mala baubatu gre, jateula teke chekeni iagho tifa ia eghu. Iagho ngala teke snakreni glepo te diꞌa igne mala goigonini fara namono biꞌo Jerusalem, salaꞌudi keha namono teke goigoni ka nauthoglu igne.

¹³ Hoholo te biꞌo igre thoke ghami ghehati jateula te chekeni ka nogna vetula mae Moses ia eghu. Nu funu tifa te ghilei mei posa ka narane gognarogne, ghehati tapla jafra fabrahu kolho. Ghehati theome tughu nagnafa nei jaola theome leghuni chekemu iagho te tutuani na.

¹⁴ Lord, iagho tarabanahi te mala para ghami ghehati na, naugna iagho eni kolho unha puhi te doglo na, nu ghehati theome tangomana te leghuni nou cheke iagho na.

¹⁵ “Lord, iagho nomi God ghehati. Tifa na iagho neke hata fajifla ghami Ijep. Eghuteuna naiknore ghatho tahuni nou nolaghi biꞌo iagho na. Nu funu tifa te ghilei mei posa ka narane gognarogne, ghehati tapla jafra fabrahu ka nakhibo.

¹⁶ Lord, tifa na iagho neke keli fara ka nou naiknore. Iagho thosei diꞌatamu ka namono Jerusalem. Naugna Saion gne nou Thogele Blahi iagho. Naiknodi keha kantri te namo ka ghehati igre cheke fadiꞌani nei cheke faparini eghu Jerusalem. Eghuteuna jaola eidi nakhibomi ghehati baludi glepo te diꞌa teke edi kuꞌemi ghehati tifa ra.

¹⁷ “God, fanomho mei ka nogu tharai iara nou mae gloku gne. Iara tore nigho mala ke babana fapulo iagho nou Sugablahi gne mala laseni naiknore te iagho ngala Lord na.

¹⁸ God, figri mei fanomho ka ghehati, eghuteuna filo mei ka puhi biꞌo te thoke ghami ghehati gognarogne. Eghuteuna iagho jaola filo meini puhi biꞌo te au ka nou namono biꞌo iagho igne. Ghehati tarai koba ka iagho, naugna iagho kokhoni ghami ghehati fabrahu, theome naugna te naikno doglo ghehati na.

¹⁹ Lord, fanomho sagho ka nomi tharai ghehati gre. Lord, hata fadelei sagho nakhibomi ghehati gre. Lord, fanomho mei ka ghehati sagho mala togho ghami. Faghose sagho, thosei ofo mala laseni naiknore te iagho God na. Kate au fakeli nou namono iagho Jerusalem igne nei ghehati nou naikno iagho gre au fakeli langau teuna, ghehati te gnafa na ginauna ghatho tahuni nanghamu iagho na.”

Gabriel ne rurutha gaoghathogna cheke teke tusu lao God ka mae Daniel igne

²⁰ Kate tarai na, iara ne cheke thakledi nakhibogu te gnafare, baludi nakhibodi nogu naikno iara Israel. Eghuteuna iara toreni Lord, nogu God mala ke babana fapulo nogna Sugablahi na.

²¹ Kate tarai teu iara na, Engel Gabriel mae ihei teke filoni iara ka nogu mifi na flalo ne soru ka vido te au teu iara na. Ka vido igne thono namo fara ka vido narane mala fafara fei grafi na.

²² Mana ne cheke eghu ka iara, “Daniel, iara soru mei mala togho nigho iagho mala laseni gaoghathogna cheke igne.

²³ Kate funu tarai iagho na, God na la nomhi nighohi. Tuana te meini iara na mala chekeni cheke tughu gna na ka iagho, naugna mana namha nigho iagho fara. Gognarona iagho fanomho fakeli kate rurutha iara gaoghathogna mifi igne.

²⁴ “God na liliseihi fati gobi nheva salei finogha te mala toghodi nou naikno iaghore balugna namono biꞌo Jerusalem. Ka gnafadi narane tuare, mana ginauna koko fahui nakhibomi nei puhimi teu ghotilo te diꞌare. Eghuteuna mana ginauna lilisei gaoghatho te doglo ka nogna naiknore mala au fakeli tifa tifa. Eghuteuna mifi nei nodi cheke hatimare mae profet teu igre ginauna thoke mei tutuani. Funu gognarogne, Sugablahi igne ginauna thono blahi fara.

²⁵ “Iagho mala lase fakelini igne. Funu ka narane te jifla mei cheke igne ka hatimare mae profet eigna te mala ke babana fapulo namono biꞌo Jerusalem teku igne ginauna theome faghose ghilei thokeni narane nate vavahi God kaisei mae, eghuteuna ginauna na thokeni phia tutu nheva finogha. Eghuteuna ka narane tuana, mare ginauna nake babana fapulo namono biꞌo Jerusalem, balu nabrou nei vido mala poru teu igre ginauna thokeni fati gobi tolufulu fati finogha. Nu ginauna na kmana puhi biꞌo na thoke mei.

²⁶ Ka gnafadi narane igre, mae te vavahi God igne, mare ginauna faleheni mana ka puhi te theome doglo. Nogna armi kaisei mae king te rheta fara na ginauna ruma mei ke lamnagna namono biꞌo Jerusalem. Mare ginauna mei goigoni namono biꞌo igne balugna nogna Sugablahi God na. Armi igne ginauna mei jateula kaisei nabritha biꞌo te mei goigoni gobigna lepo ra eghu. Magra biꞌo igne ginauna na theome gnafa ghilei thokeni narane leghu lahu na. Glepo igre ginauna thoke mei leghuni unha teke chekeni God na.

²⁷ King igne ginauna eni kaisei nhaꞌa cheke baludi kmana naikno nabagna fitu finogha. Farihoteidi narane tuare, mana ginauna na theome snakredi naiknore mala fafara, ba tusu lao kaisei glepo ka God. King ginauna lilisei haghe kaisei glepo te thono diꞌa fara ke lamnagna nogna Sugablahi God na. Glepo tuana ginauna au ka vido tuana ghilei thokeni narane leghu lahu teke lilisei God malagna mae ihei teke eni glepo te diꞌa igne.”