Nehemaea 9 - Buka Blahi Ka Cheke Holo

Naiknore ne cheke thakledi nakhibodire

¹ Ka varadaki fati narane ka nhigra tuanala, naiknodi Israel igre khapru mala theome ghamu, nei pipichi ka pohe thona, nei ghiha nakrofu ka phaꞌudi re eghu, fagaglana gna te diꞌanagnafa eidi nakhibodi re.

² Iheire teke karha mei ka vikegna Israel kolho te kegra ka vido igne, eghuteuna theo kaisei mae ka keha vikere te au baludi mare na. Mare cheke thakledi nakhibodi re baludi puhidi kuꞌedi te diꞌa tifa ra.

³ Kate kegra teu ka vido igne, mare iuꞌiju ka buka nogna Vetula nodi Lord God na nabagna thilo aoa, aonu mare cheke thakledi nakhibodi re eghuteuna tarai ka nodi Lord God keha thilo aoa re.

⁴ Hatimare mae Livaet ne kegra haghe ka lada na ne eha fabiꞌo ka nodi Lord God. Nanghadi mae igre, mae Jesua, nei mae Bani, nei mae Kadmiel, nei mae Sebanaea, nei mae Buni, nei mae Serabaea, nei keha mae Bani, nei mae Kenani.

⁵ Eghuteuna keha tothoghei ka mae Livaet igre na nanghadire mae Jesu, nei mae Kadmiel, nei mae Bani, nei mae Hasabnea, nei mae Serebaea, nei mae Hodaea, nei mae Sebanaea, nei mae Petahaea, mae igre ne eha eghu fabiꞌo, “Tahati kafe kegra haghe cheke fakelini noda Lord God mae ihei te karha fabrahu tifa te tifa!” “God! Ghehati magnahaghei te pala hagheni nanghamu iagho na. Nu nomi glealeꞌa ghehati igne theo nafugna kolho. Nanghamu iagho na biꞌo fara, eghume nomi glealeꞌa ghehati igne theome naba ka tathamu iagho na.

⁶ Iagho kaisei Lord kolho. Iagho kolho teke vuavuha maloa baludi gobigna lepo te au ke lamnagna, nei nauthoglu baludi gobigna lepo te au ke lamnagna, nei thongna baludi gobigna lepo te au ke lamnagna. Eghuteuna iagho tusu lao karha na ka glepo igre. Eghuteuna engel kligna re pogho soru tarai ka iagho.

⁷ “Lord God kaisei iagho ngala teke vahini mae Ebram teke batu fajiflani ka namono Ur jare Babilonia, eghuteuna iagho tughu nanghagna na neke Ebraham.

⁸ Iagho filo glanini gaoghathogna mana na au rheta ka iagho, eghuteuna iagho neke eni kaisei nhaꞌa cheke ka mana. Iagho neke nhaꞌa cheke mala tusu lao ka vikegna mana na nodi vido glose vikegna mae Kenan, nei vikegna mae Het, nei vikegna mae Amo, nei vikegna mae Peris, nei vikegna mae Jebus, nei vikegna mae Gigas. Eghuteuna iagho tajini nou nhaꞌa cheke na, naugna puhimu iagho na doglo fara.

⁹ “Eghuteuna kate au teku kuꞌemi ghehati Ijep ra, iagho neke filodi maedi Ijep gre neke paradi fara mare. Eghuteuna kate jifla mare Ijep te tei ka Thongna Ukru na iagho neke nomhidi mare neke tanhi ka iagho mala toghodi.

¹⁰ Iagho neke edi fagaglana nei kofubobhoi biꞌo neke jaglo nodi naiknore. Ka puhi igne iagho neke tapla faparini king gna Ijep, baludi nogna mae biꞌo nei keha naikno gna kantri tuana. Naugna iagho lasedi naikno igre fahaehaghe fara, eghuteuna mare paradi fara nou naikno iagho re. Ka puhi igne, iagho fakakhana nou nolaghi na ka mare. Eghuteuna nanghamu iagho na fnakno klignalahu ghilei mei posa gognarogne.

¹¹ Eghuteuna iagho neke fota pea thongna na neke eni kaisei nabrou mala kasa nou naiknore ka glose te moja. Nu iheire teke ngolho leghudi nou naikno iagho re, mare ne knoho ka thongna te mamhara jateula thina te plulu ka nhorora ra neu.

¹² Ka narane na, iagho au ke lamna grokho biꞌo mala tei ke uludi mala leghu nigho mare. Eghuteuna ka bongi na, iagho au ke lamna khaꞌaghi biꞌo, eghuteuna naphaemu iagho na falalase nabroudi mare.

¹³ “Iagho neke soru mei funu kligna ka Thogele Sanai neke cheke ka nou naiknore. Eghuteuna iagho neke tusu ranghidi cheke te doglo, nei Vetula te tutuani, nei famane farirhiu te keli.

¹⁴ Iagho farirhiudi eigna nou narane Sabat blahi, nei vetula nei cheke eghu teke tusu lao iagho ka nou mae gloku Moses mala lase fakelini naiknore puhimu iagho na.

¹⁵ Kate rofo naiknore, iagho neke tusu ranghidi gano teke soru mei funugna kligna. Eghuteuna kate roi koꞌu naiknore, iagho neke tusu ranghidi khoꞌu teke jifla mei funu ke lamna thina. Eghuteuna iagho neke cheke ranghidi mala tei hata kasa glose mala khotogna mare glose teke kulu nhaꞌa chekehi iagho ka mare na.

¹⁶ “Nu kuꞌemi ghehati tifa ra neke fahaehaghe fara nei patugama fara neku, eghuteuna mare theome leghudi nou cheke iagho re.

^17-18 Mare tirodi fanomho ka iagho, eghuteuna mare ghatho ihodi kofubobhoi teke edi iagho ka mare ra. Mare patugama fara, eghuteuna mare figri tagru nigho, gognarona mare vahini kaisei mae mala batudi ke figri mala naikno sneka Ijep. Nu iagho God tarabana mala hata koko nakhibodi naiknore. Leuleghu fata na iagho kokhonidi naiknore, eghuteuna iagho keli fara ka mare. Iagho theome tangomana te ghosei te diꞌatamu na, eghuteuna leuleghu fata na iagho namhadi nei ghatho tahudi eghu fara naiknore. Mare eni kaisei mumuju sua buluka nalhaꞌugna, ne cheke eghu, ‘Ghotilo maemi Israel ra! Igne noda god tahati na, mae ihei teke batu fajifla ghita Ijep!’ Eghuteuna mare edi thua nafnata glepo te diꞌa te mala goigoni nigho. Nu neuba ngau, iagho theome tei kokodi mare.

¹⁹ “Naugna puhimu iagho te thofno kokhonidi naiknore, iagho neke theome lisa kokodi jare ka namono nagou na. Ka narane na gromno na kegra fadoglo haghe ne batudi ka nabrou na. Ka bongi na khaꞌaghi na kegra fadoglo haghe ne falalase ranghidi nabrou na.

²⁰ Tharungamu iagho na thofno keli fara, eghuteuna iagho kuruni mana mala farirhiudi mare. Iagho tusu ranghidi bret gna kligna te kiloi ‘manna’ mala ghamu mare, eghuteuna iagho tusu ranghidi khoꞌu mala koꞌu.

²¹ Phiatutu finogha iagho reireghi fakelidi ke lamna namono nagou, eghuteuna mare theome kmoꞌe ka kaisei glepo. Nodi pohere theome breku, eghuteuna ghahedire theome huge nei kabru.

²² “Iagho neke snakredi kuꞌemi ghehati ra neke magra ka King Sihon ka kantri Hesbon nei King Og gna kantri Basan. Eghuteuna mare tapla faparidi phiamare ne hata nodi vido glose phiamare re. Eghuteuna glose igne neke vido glosegna nodi kantri mare na.

²³ Iagho tusu ranghidi kuꞌemi ghehati ra kmana sua mala jateula nathunu te au ka maloa na are neu. Eghuteuna iagho neke hata meidi mala au ka namono aheva teke chekeni iagho ka kuꞌedi mare ra.

²⁴ Mare tei ne hata namono igne. Iagho neke tusu lao nolaghi mala uludi mare naiknodi Kenan baludi mae king nei keha naikno teke au ka namono igne, mala tangomana mare te edi unha te magnahaghedi mare re.

²⁵ Mare magra ne hata namono ringni te lithui ka thina nei glose te thofno keli fara teu igre. Mare neke hata suga te fodu ka famane glepo te keli nei seu teke dokhahi naikno teke au ka namono igne, nei nagare grep, nei nagare oliv, nei keha gaju te ure kmana sisi te keli tadi. Mare ghamu kmana gano fara ne ghilei blokha fara. Eghuteuna leuleghu fata na mare glealeꞌa fara ka glepo teke tusu lao iagho ka mare igre.

²⁶ “Nu neuba ngau, mare figri tagru nigho nei theome leghu nigho, nei theome magnahaghedi nou vetulare. Mare falehedi nou mae profet, mae iheire te mala cheke ranghidi mala teke pulo mei mare ka iagho. Mare edi thua nafnata glepo te diꞌa mala goigoni nigho iagho.

²⁷ Eghume naudi puhi igre, iagho neke snakredi mae naokare neke mei uludi nei paradi neku mare. Kate thoke mei puhi biꞌo igre ka mare na, mare neke tanhi ka iagho, eghuteuna iagho au neku kligna neke nomhidi nei toghodi neku mare. Naugna iagho neke kokhonidi fara mare neke kurudi keha mae lida mala fakarhidi ka nodi nolaghi mae naoka.

²⁸ Kate au ka pharikeli na, mare ke funu edi puhi te diꞌa re, eghuteuna iagho snakredi mae naokare mala uludi nei funei frunidi eghu mare. Eghuteuna leuleghu fata na mare tanhi ari ka iagho, eghuteuna iagho nomhidi mare kligna. Naugna iagho kokhoni noudi fara mare, leuleghu fata na iagho fakarhidi ka nodi nolaghi mae naoka.

²⁹ “Iagho neke cheke faheta ka mare mala leghudi mare nou cheke iaghore, nu mare fahaehaghe fara nei theome leghudi eghu nou cheke iagho re. Jame ihei te leghudi nou vetula iagho re, mana tangomana te hatini u nakarha te keli na. Nu neuba ngau, mare patugama fara, eghuteuna mare figri tagruni vetula igne, eghuteuna mare tirodi fanomho nei leghu nigho eghu.

³⁰ Kmana finogha iagho snakre meini nou Tharunga te Blahi na ke klignadi hatimare mae profet, eghuteuna kurudi mae igre mala cheke faheta ka naiknore. Iagho neke ofodi naiknore mala fanomho ka cheke igre, nu mare ne tirodi. Eghume iagho snakredi naiknodi keha kantri are mala mei uludi mare.

³¹ Nu nou lolokeli iagho ranghidi naiknore thono biꞌo fara, eghume iagho theome figri tagrudi nei theome snakredihi te mala goigonidi re. God, leuleghu fata na iagho kokhonidi naiknore, nei iagho magnahaghedi fara mare!

³² “Nomi God, iagho fnakno fara nei au nolaghi biꞌo fateote'o, eghume ghehati mhaghu nomi te mei namo ka iagho na. Leuleghu fata na iagho tajini nou nhaꞌa cheke na neke ghatho tahu ghami ghehati. Funu ka narane teke mei king di Asiria teke goigoni ghami ghehati te ghilei mei posa ka narane gognarogne, ghehati au papara fara. Nomi king, nomi lida, nomi pris, nomi profet, nei kuꞌemi teku ghehati tifa ra, ghehati te gnafa na neke kafe au papara fara. Eghume puhi biꞌo igne theome tei koko ghami ghehati ghilei mei posa gognarogne.

³³ Leuleghu fata na ghehati tapla jafra ka nakhibo, eghuteuna iagho leghuni puhi te doglo na ne para ghami ghehati. Leuleghu fata na iagho leghuni nou nhaꞌa cheke na ne togho ghami ghehati. Neuba, ghehati ne theome gnafa te eni puhi te diꞌa na.

³⁴ Kuꞌemi, nomi king, lida, nei pris teku ghehati tifa ra, mare neke theome tajini nou Vetula iagho na. Iagho neke cheke faheta ka mare mala leghudi nou chekere neku, nu mare theome magnahaghei te fanomho ka nou cheke iagho re.

³⁵ Ka narane hatimare mae king teke funei frunidi nou naikno iagho ra, iagho neke thofno fablahidi kuꞌemi ghehati ra neke tusu glepo te keli ka mare. Mare au ka kantri biꞌo, eghuteuna glosegna kantri igne thofno keli fara. Nu neuba ngau, mare theome leghuni puhimu iagho te doglo na, eghuteuna mare theome figri nagnafadi re ka puhidi te diꞌa re.

³⁶ “God, ghehati tore nigho mala fanomho ka ghehati! Gognarona ghehati au jateula naikno sneka eghu ka kantri igne, kantri teke tusu lao iagho ka kuꞌemi tifa ra. Iagho neke tusu mei kantri te keli fara igne ka ghehati, nei glosegna na jaola keli fara mala tangomana ghehati te hata kmana gano nei keha sisi eghu te kotu tagna.

³⁷ Nu naugna te eni fabrahu ghehati puhi nakhibo na, king mala funei fruni ghami ghehati teku iagho igre, mare hata glepo te keli teke hata ghehati ka glose igne. Mare funei fruni fadiꞌa ghami ghehati mala tangomana mare te edi ka ghehati unha glepo te magnahaghei edi mare ka ghehati na, nei ka nomi buluka nei sipu teu ghehati gre. God, puhi biꞌo thoke ghami ghehati gognarogne!

³⁸ “God, naugna te thoke mei gobigna lepo igre, ghehati neke eni kaisei nhaꞌa cheke ka iagho, neke rioriso soru ni. Eghuteuna ghehati mae lida re, mae pris ra, nei mae Livaet ra, ghehati te gnafa na ne kafe rioriso nanghami re ne lisei soru nomi fagaglana re tagna.”