Nehemaea 8 - Buka Blahi Ka Cheke Holo

Pris Esra ne iuꞌijuni buka vetula na

¹ Kate namo thoke ka fafitu nhigra ka finogha igne, vikegna Israel igne neke au fakeli ka nodi namonore. Ka narane tuana naiknore ne mei Jerusalem ne khapru ka glalaba biꞌo ke ulugna Grengatha Mala Hata Khoꞌu igne. Mare ne kilo meini Pris Esra, mae ihei te mae velepuhigna Vetula teke cheke mei God ka mae Moses mala leghuni naiknodi Israel, eghuteuna mare toreni mae Esra mala hata mei buka gna Vetula igne.

² Aonu ka narane ululahu ka nhigra igne, mae Esra hata ne mei buka igne, eghuteuna mana kegra haghe ke uludi mae nalhaꞌu, nei goro gaꞌase, nei goro sua iheire te tangomana te laseni unha te iuꞌijuni mana na.

³ Funu hamerane ghilei aublatha, Esra kegra haghe ulu ka glalaba biꞌo igne ne iuꞌiju fabiꞌo ranghidi mae nalhaꞌu, nei goro gaꞌase. Eghuteuna mare te gnafa na ne kafe fanomho fakeli ka cheke te au ka Vetula na igre.

⁴ Eghuteuna mae Esra ne kegra ka sape teke horo mare malagna narane igne teku na. Eghuteuna mae te kegra fei nhetagna mana re, mae Matitaea, nei mae Sema, nei mae Anaea, nei mae Iuraea, nei mae Hilkaea, nei mae Masea. Eghuteuna mae te kegra fei mairi gna manare, mae Pedaea, nei mae Misael, nei mae Malkaeja, nei mae Hasum, nei mae Hasbadana, nei mae Sekaraea, nei mae Mesulam.

⁵ Naiknore tangomana te filoni mae Esra na naugna mana kegra kligna ka sape thaba teke horo mare igne. Eghuteuna kate tothora mana buka na, naiknore ne kafe kegra haghe.

⁶ Mae Esra ne eha eghu fabiꞌo, “Tahati cheke fakelini Lord, God te fnakno kligna lahu!” Eghuteuna naiknore ne ngafa haghe khamedire ne eha eghu fabiꞌo, “Amen! Amen!” Aonu naiknore pogho soru pari ne thoke ka glose ro ne kilo fnaknoni Lord.

⁷ Kate kegra teu naiknore ka glalaba igne, mae Livaet nanghadire mae Jesua, nei mae Bani, nei mae Serabaea, nei mae Jamin, nei mae Akub, nei mae Sabetae, nei mae Hodaea, nei mae Masea, nei mae Kelita, nei mae Asaraea, nei mae Josabad, nei mae Hanan, nei mae Pelaea, mae igre toghodi naiknore mala laseni Vetula igne.

⁸ Mare ne iuꞌiju nogna Vetula God igne, aonu mare ne ruarutha ka nodi cheke thedi mala lase fakelidi mare cheke igre.

⁹ Kate nomhidi naiknore cheke ka Vetula na igre, mare diꞌanagnafa ne tanhi fabiꞌo. Nu iara mae Nehemaea gavana gna Juda balugna Pris Esra nei mae Livaet mae iheire te toghodi naiknore te mala laseni Vetula igne, ghehati ne cheke eghu ka naiknore, “Narane igne blahi fara ka Lord noda God. Eghume ghotilo thosei diꞌanagnafa nei tanhi eghu.”

¹⁰ Aonu iara ne cheke eghu ranghidi, “Ghotilo tei ka namono mala ei gaghamu biꞌo. Ghotilo ghamu gano te keli nei koꞌu waen te mamahe eghu, eghuteuna tufa keha gano nei waen eghu ka iheire te theome naba ghedi gano, naugna narane igne blahi ka noda Lord. Ghotilo thosei diꞌanagnafa nei tanhi eghu naugna Lord magnahaghei ghita tahati te glealeꞌa, eigna puhi glealeꞌa ngala te mala farheta ghita na.”

¹¹ Aonu mae Livaet gre ne farerheta gaoghathodi naiknore ne cheke eghu ranghidi, “Ghotilo megeu naugna gognarogne narane blahi, eghume ghotilo thosei diꞌanagnafa nei tanhi eghu.”

¹² Aonu naiknore ne kafe tei ka namono balu glealeꞌa, mare ghamu nei koꞌu nei tufa keha ka iheire te theome naba ghedi gano. Mare kelitadi fara naugna mare lase fakelidi cheke te iuꞌiju mae Esra ka mare igre.

^13-14 Hamerane, ka fapea narane ka nhigra igne, phaꞌu maedi ka tharakna te gnafa baludi mae pris nei mae Livaet teu igre ne kafe tei ka mae Pris Esra, mala farirhiudi cheke te au ka buka Vetula teke cheke Lord ranghini mae Moses mala toutonu mana ka naiknodi Israel teku tifa igre. Mare laseni eigna mae Moses neke rioriso buka igne, leuleghu finogha ka fafitu nhigra ka narane biꞌo igne naiknore mala au ka grorofe ikoi teke horo mare na.

¹⁵ Eghuteuna mana jaola neke cheke ka mare mala tei tongana Jerusalem nei ka namono te gnafa Juda mala toutonu cheke igre ka narane biꞌo igne. Mare mala cheke eghu, “Ghotilo tei ka thogele ro mala hata mei kmana gregedi gaju oliv, nei gaju matel, nei gaju thubo, nei keha gaju te au kmana khakladi tadi, mala horo grorofe tadi.” Jateula te chekeni ka buka Vetula na igne eghu.

¹⁶ Aonu naiknore tei ne hata ne mei ne horo grorofe igre ke kligna nodi suga, nei ke lamna glalaba lithuidi nodi suga re, nei ke lamna glalaba biꞌo lithuigna nogna Sugablahi God, nei ka glalaba biꞌo ke ulugna Grengatha mala Hata Khoꞌu igne, nei ka glalaba ke ulugna Grengatha Gna Efrem.

¹⁷ Eghuteuna naikno teke pulo mei funudi Babilonia igre ne horo nodi grorofe ikodi ne au tadi. Funu ka naranegna mae Josua thugna mae Nun te mei posa ka narane igne, vikegna Israel igne theome eni narane biꞌo igne. Eghuteuna mare te gnafa na ne thofno glealeꞌa fara.

¹⁸ Eghuteuna leuleghu narane, funu ka narane gaghamu ululahu te posa ka narane leghu lahu na, mae Esra ne iuꞌiju ka nogna Vetula God. Naiknore ne eni nakhapru biꞌo igne nabagna fitu narane, eghuteuna ka fahana narane na, mare khapru ne tarai leghuni unha te chekeni ka Vetula na.