Nehemaea 6 - Buka Blahi Ka Cheke Holo

Mae naoka igre ne roghe poru mala goigonini Nehemaea

^1-2 Ghehati ne babana fahui gringni thina igne, jare theo kaisei khora te au tagna na. Nu ghehati theome nhaꞌa lao ngau bobothodi grengatha re. Kate nomhi mae Sanbalat, mae Tobaea, mae Gesem maegna Arebia, nei keha mae naoka te gnafa igre ne thoutonu eigna glepo igne, mae Sanbalat ghe mae Gesem, phiamare ne famei kaisei nonomho ka iara. Phiamare ne cheke eghu, “Iagho mei filo ghami ghepa ka namono Keferim jare ka Glogu Ono.” Nu iara lasedi phiamae igre magnahaghei te chaghi ghau iara mala goigoni ghau iara eghu kolho.

³ Aonu iara ne fatei keha mae mala cheke eghu ka phiamare, “Iara eniu gloku te ulu fara igne, eghume iara theome tangomana te soru jare na. Eghuteuna iara jaola theome tangomana te lisani gloku igne te ari filo ghami ghopa na.”

⁴ Fati fata phiamare te famei nafnata cheke igne ka iara na, nu leuleghu fata na iara jaola fatei nafnata cheke igne ka phiamare.

⁵ Aonu falima fata na, mae Sanbalat ne rioriso kaisei letas, eghuteuna mana theome famamhaku fakeli letas igne, nu mana tothorau kolho. Mana tusu lao letas igne ka nogna mae gloku na hata ne mei ka iara.

⁶ Cheke ka letas igne ne cheke eghu, “Naikno ka kantri te au faligoho ghita igre la nomhidihi keha nonomho, eghuteuna mae Gesem jaola chekeni igne. Te nomhini mare na ghotilo roghe poru mala magra ka king, naugna tuana teke babana fapulo ghotilo gringni thina igne. Nonomho igne jaola chekeni te iagho magnahaghei te nodi king mare.

⁷ Eghuteuna iagho la vavahi keha mae profet mala toutonu Jerusalem eimu iagho te king gna Juda iagho gognarona. Jau king gna Pesia na la nomhinihi eigna igne, eghume iara gaoghathogu na te keli na iagho mei filo ghau iara mala chekedi tapa glepo igre.”

⁸ Iara neke fatei nogu cheke tughu na ka mana. Iara ne cheke eghu, “Cheke te edi iagho igre theome tutuani! Iagho edi haghe kolho thoutonu te chaichaghi igre ka gaoghathomu themu!”

⁹ Mare fariuriu mala famamhaghu ghami ghehati, mala glaꞌe soru nei theome tangomana te gnafa na gloku igne eghu. Aonu iara ne tarai eghu, “God, farheta ghau mala loku fahui iara gloku igne.”

¹⁰ Ke leghu iara tei ne filoni mae Semaea, thugna mae Delaea, gragna mae Mehetabel, naugna mana fogra theome tangomana te jifla ka nogna suga na. Aonu mana ne cheke eghu ka iara, “Mae naokare ginauna mei mala falehe nigho iagho. Keha bongi mare na mei. Eghume tapa ginauna tei poru lamna ka nogna Sugablahi God. Tapa tei lamna ka Chogho Blahi gno, eghuteuna bibilakhi grengathare eghu.”

¹¹ Nu iara ne cheke eghu ka mana, “Iara theome nafnata naikno te mhaghu nei rikha me tei poru teura sia. Eghume iara theome naba te rikha te tei poru lamna ka nogna Sugablahi God na te mala fakarhini nakarhagu na. Theo fara.”

¹² Ke leghu na iara neke ghatho fakelini cheke igne eghuteuna iara laseni God neke theome chekeni igne ka mae Semaea. Theo. Mae Tobaea ghe mae Sanbalat neke folini mana mala eni mana cheke igne ka iara.

¹³ Phiamare ghathoni nogna cheke mae Semaea igne ginauna mhaghuni iara mala tei iara lamna Chogho Blahi, eghuteuna ka puhi igne iara ginauna au ka nakhibo. Jame te eni iara igne na, phiamare ginauna goigonini nanghagu iara na, eghuteuna famamaja ghau iara ka tathadi naiknore.

¹⁴ Aonu iara ne tarai, “God, ghathodi unha te edi ranghi ghau iara mae Tobaea ghe mae Sanbalat igre. Eghuteuna iagho jaola ghathoni gaꞌase profet Noadaea baludi keha profet teke fariuriu famamhaghu ghau iara ra.”

¹⁵ Gloku ka gringni thina igne gnafa ka varadaki glima narane gna nhigra Elul, eghuteuna ghehati neke khogla loku glimafulu phei narane kolho.

Gloku ka gringni thina na gnafahi

¹⁶ Kate nomhini mae naoka gre tela gnafahi gringni thina igne na, gaoghathodi mae naoka gre ne glaꞌe soru, naugna mare te gnafa baludi kantri te au faligoho ghami ghehati igre filo glani God te togho ghami ghehati te ghilei gnafa gloku igne.

^17-19 Ka narane tuare, nodi mae biꞌo mae Jiu gre rioriso tei kmana letas ka mae Tobaea, eghuteuna mana cheke tughu tei ka mare. Mae biꞌo igre te cheke ka iara na mae Tobaea gne kaisei mae keli fara, ke leghu mare ke tei cheke ka mae Tobaea unha te cheke iara ka mare re. Mare eni koba nafnata puhi igne naugna mae Tobaea gne tolaghi ka thugna gaꞌase mae Sekanaea thugna mae Ara. Eghuteuna mae Jehohanan thugna mae Tobaea gne mana tolaghi ka thugna gaꞌase mae Mesulam, thugna mae Berekaea. Eghuteuna mae Tobaea gne rioriso letas mei koba ka iara mala mhaghu iara eghu koba.