Nehemaea 5 - Buka Blahi Ka Cheke Holo

Nehemaea ne toghodi naikno te kuma re

¹ Ka narane tuare, kmana naikno Jiu ne kmoꞌe ka glepo, eghuteuna mare ne cheke balu diꞌatadi ka kheradire.

² Keha ka mare ne cheke eghu, “Ghehati au kmana thumi, eghuteuna ghehati magnahaghei gano, eigna te theo na ghehati ginauna lehe.”

³ Eghuteuna kehare ne cheke eghu, “Ka narane ninhigrana te theo gano te rofo igre, ghehati lisa lao ghemi thobi nei nomi nagare grep, nei jaola nomi suga teure ka khamedi mae te dedei igre mala tangomana ghehati te kaoni ka mare te mala foli ghemi gano na, mala theome lehe ghehati ka grofo.”

⁴ Eghuteuna kehare ne cheke eghu, “Ghehati jaola mala kaoni ka kherami re mala foli takis ka king maladi glose nei nomi nagare grep teu igre.

⁵ Neuba tahati mae Jiu gre ne kaisei vike kolho, eghuteuna thuda tahati gre kaisei nanaba ngala ka thudi keha kherada mae Jiu igre neu, nu ghehati na sabiri thumi gre ka mare mala nodi naikno sneka mare mala hata naba sileni mala foli ghemi gano. Keha thumi gaꞌase re, ghehati la sabirihi mala naikno sneka kolho. Eigna ghehati theome tangomana te eni kaisei glepo na, naugna glose nei nomi nagare grep teure, kherami ghehati igre la hatahi ka ghehati.”

⁶ Kate nomhidi iara nodi cheke naiknore igre, iara ne thono diꞌatagu fara. Eghume iara ne

⁷ hironi kaisei nabrou te mala fadoglini puhi biꞌo igne, aonu iara ne cheke faheta eghu ka mae biꞌo nei mae mala baubatu teu igre, “Ghotilo paradi fara kherami themire ka puhi te hata ghotilo nodi nagare nei thudi teu are!” Aonu iara ne kilo meidi mae igre mala mei ka kaisei faidu biꞌo mala fadoglini puhi biꞌo igne.

⁸ Ka faidu igne iara ne cheke eghu, “Kheraguro! Thono ninhigrana fara teke salo sileni mala teke foli fapulodi kherada teke sabiri tahati ka mae bongihehe te mala nodi naikno sneka mare ra. Nu gognarona ghotilo nhaꞌa lao puhi biꞌo ke klignadi kherada re, eghuteuna ghotilo sabiridi ka keha mae Jiu gre mala nodi naikno sneka mare!” Aonu mae mala baubatu igre ne kmu soru kolho ne theome ghagri kaisei cheke.

⁹ Aonu iara ne cheke eghu, “Unha te eni ghotilo igne theome doglo! Te keli na ghotilo jame ghatho tahuni God, eghuteuna leghuni mana mala theome famamaja ghita naikno bongihehe te naoka ka tahati igre.

¹⁰ Iara baludi mae kheragu nei nogu mae gloku teu gre, ghehati jaola ne tufa sileni nei gano eghu ka naiknore, eghuteuna thogheiro naiknore nake foli fapulo glepo igre. Nu ghotilo thosei ke hata nodi nagare nei thudi teu naiknore!

¹¹ Thobi nei nagare grep, nei nagare oliv, nei suga eghu teke hata ghotilo ka mare ra, gognarona ghotilo ke tusu fapulo ka mare. Eghuteuna ghotilo jaola ke tusu fapulo sileni teke hata ghotilo ra balu intres, neuba ghotilo ne hata sileni ba gano, ba waen, ba oliv oel.”

¹² Mae mala baubatu igre ne cheke eghu, “Ghehati ginauna thofno leghudi unha te chekedi iagho are. Gobigna lepo te chekedi iagho igre, ghehati ginauna nake tusu fapulo ka mare, eghuteuna ghehati ginauna thosei ke edi glepo igre.” Eghuteuna iara ne kilodi mae pris mala nhaꞌa cheke mae mala baubatu igre ke uludi mare.

¹³ Iara hata koko nhugha teke hugha teku iara na, eghuteuna iara ne bue tei ne cheke eghu, “God ginauna jateula igne eghu bue teini delei ihei te theome tajini nogna nhaꞌa cheke na. Uve, God ginauna hata fadelei nogna suga nei gobigna lepo eghu teke khotodi manare, eghuteuna ginauna theo kaisei glepo nate lisei fapulo malamu iagho na.” Mare te gnafa na ne kafe eha eghu fabiꞌo, “Amen! Leghuni unha te chekeni iagho tuana!” Eghuteuna mare te gnafa na ne kafe cheke fakelini Lord. Aonu mae mala baubatu igre ne tajini nhaꞌa cheke teke chekeni mare na.

¹⁴ King Atasekses neke vahi ghau iara mala mae gavana gna Juda. Aonu iara neke gavana gna Juda nabagna nabotho phei finogha, funu ka varadaki finogha gna King Atasekses te funei fruni Pesia ghilei mei posa ka tolufulu phei finogha gna mana. Ke lamnadi finogha igre, iara baludi mae kheragu gre ghehati theome ghamu gano te keli gavana nabagna te mala hata na.

¹⁵ Mae iheire teke gavana ke ulugu iara Juda igre neke paradi fara naiknore. Leuleghu fata na mare hata gano nei waen eghu ka naiknore, eghuteuna mare jaola hata vido kilo silva ka naiknore. Eghuteuna nodi mae gloku mae gavana gre jaola faparidi naiknore. Nu iara theome magnahaghei te eni igne, naugna iara ghatho tahuni God, eghuteuna iara magnahaghei te leghuni mana.

¹⁶ Leuleghu fata na iara loku heta mala ke babana fapulo gringni thina igne. Eghuteuna nogu mae gloku iara igre, ghehati theome foli kaisei vido glose. Theo.

¹⁷ Eghuteuna kehana teuna, leuleghu narane na, kaisei gobi glima fulu mae Jiu keha mae ka mare mae biꞌodi Juda, mare ghamu balugu iara ka sugagna gavana. Eghuteuna keha naiknodi ka keha kantri te namo Juda te mei filo ghau iara teu igre, mare jaola mei ghamu balugu iara.

¹⁸ Leuleghu narane na, mare falehe kaisei buluka, eghuteuna namno famane sipu, eghuteuna kmana kokorako mala ghamu ghehati. Eghuteuna leuleghu nabotho narane na, iara tufa soasopai nafnata waen ka naiknore. Naugna iara mae gavana, iara au nogu nolaghi te mala hata sileni ka naiknodi Juda mala foli gano. Nu neuba, iara theome magnahaghei te huhurudi mare mala foli, naugna iara laseni narane ninhigrana la thokedi mare.

¹⁹ Aonu Nehemaea ne tarai, “Nogu God, ghathodi glepo te keli teke edi iara ranghidi naikno igre.”